Ƀơi să Tà Hine, tơring anai him lăng dăp glăi mơ̆ng 24 boh plơi dŏ glăi 12 boh plơi. Tui hăng jơlan gah ngă bruă, klâo boh plơi Đà Thành, Đà Phước hăng Đà An amra pơmut hrŏm jing plơi Đà An. Tơdơi kơ pơmut hrŏm, plơi phrâo hơmâo 775 boh sang anŏ hăng 3.300 čô mơnuih, jing plơi prong hloh mơ̆ng să. Ơi Hồ Đấu, Khua ping gah plơi Đà Phước, să Tà Hine, tơring čar Lâm Đồng brơi thâo: “Dăp glăi anom bruă kơnuk kơna kiăng ngă bruă amuñ hloh, tŭ yua hloh, jing kâo tŭ biă djơh anun. Kâo iâu pơthưr mơnuih ƀôn sang, neh met wa, sang anŏ ngă tui klă tơlơi pơtrun mơ̆ng kơnuk kơna kơ bruă pơƀut glăi plơi pla”.

Hrŏm hăng Tà Hine, să Bảo Lâm 1 ăt glăk ngă tui anun mơn, dăp glăi mrô plơi pla hơbôt, ngă bruă tŭ yua. Tơdơi kơ pơmut glăi, să hrŏ trun 19 anih wai lăng plơi pla hăng hrŏ trun 57 čô mơnuih mă bruă amăng plơi, tui anun plai mơn rơngiă prăk kơnuk kơna, bruă mă mơ̆ng khul grup kơđi čar amăng plơi jing klă tui mơn.

Tui hăng ơi Nguyễn Đức Thanh, Kơ-iăng khua jơnum min mơnuih ƀôn sang să Bảo Lâm 1, bruă dăp glăi, pơmut hrŏm plơi pla hơmâo ngă lơm sem lăng tong ten laih mrô ană mơnuih, kual lŏn, anih anom, jơlan nao rai, gru phun đưm hlâo hăng gru grua mơnuih ƀôn sang kiăng hơmâo abih bang tŭ ư: “Ƀing gơmơi lăng yom djŏp tơlơi kơ mrô ană mơnuih, anih dŏ, kual lŏn, anih anom, jơlan nao rai, giong anun guai plơi pla, gru phun, gru grua mơnuih ƀôn sang đah mơ̆ng thâo pơmut hrŏm plơi pla. Ngă hiư̆m pă kiăng abih bang mơnuih ƀôn sang tŭ ư pơmut plơi pla, kiăng akŏ pơjing tơlơi bơwih ƀong mơnuih mơnam đĭ hloh”.

Tui hăng tơlơi sem lăng abih bang mơ̆ng tơring čar Lâm Đồng, ră anai tơring čar hơmâo 2.773 boh plơi, ƀut plơi pla. Ngă tui tơlơi git gai mơ̆ng Ping gah tơring čar, hơdôm boh tơring glăk pơkra jơlan hơdră pơhrŏ trun mơ̆ng 50% mrô plơi tơdơi kơ dăp glăi. Mơ̆ng tơlơi tŭ ư hrŏm mơ̆ng mơnuih ƀôn sang wơ̆t hăng tơlơi gir mơ̆ng gong gai plơi pla, bruă dăp glăi plơi pla glăk pơjing rai phun atur či pơđĭ tui anŏ tŭ yua wai lăng, bơwih brơi mơnuih ƀôn sang klă hloh, djơ̆ hăng tơlơi kiăng đĭ kyar pơ anăp anai./.