Amăng plơi Chăm Lâm Thuận, să Hàm Thuận Bắc, tơring čar Lâm Đồng, ơi Thông Long arăng hmư̆ hing lĕ mơnuih thâo ayŭp đing saranai. Ƀu djơ̆ kơnong tui anun ñu ăt pơtô brơi ƀing čơđai amăng plơi pla, djru brơi mơnuih djuai ania Chăm djă pioh gông brô̆ gru grua djuai ania, pơgôp djă pioh anŏ yôm phara mơng djuai ania.

Yă Thông Thị Hạnh, Khua anom bruă djop djuai ania mơnuih mơnam plơi Lâm Thuận, să Hàm Thuận Bắc, brơi thâo, ơi Long ƀu djơ̆ kơnong mơnuih ba gru amăng pơđĭ kyar bơwih ƀong huă, man pơdong plơi pla phrâo đôč ôh mơ̆ ăt gir run mut hrŏm pơjing Ping gah, pơjing anih anom kơđi čar, djă pioh hăng tŏ tui hơdôm gru grua hiam mơng djuai ania Chăm. “Hlâo adih sang anŏ ơi Thông Long tơnap tap biă mă, yua kơ pran gir run ră anai tơlơi hơdip sang anŏ jơnap ƀiă yơh. Ơi Long ăt djă pioh gru grua djuai ania, hăng thâo ayŭp đing saranai, hăng ăt pơtô brơi ƀing čơđai ayŭp đing saranai kiăng yua amăng hrơi ngui ngor amăng plơi pla. Ră anai hơmâo lu mơnuih kiăo tui hrăm ayŭp đing saranai”.

Ră anai mah thun tha laih samơ̆ ơi Thông Long ăt abih pran jua hăng bruă pơđĭ kyar tơlơi hơdip djuai ania Chăm ƀơi anai. Hrŏm hăng bruă gum hrŏm hăng Khua wai lăng plơi Lâm Thuận, să Hàm Thuận Bắc, ñu ăt ruah ngă tha plơi, mơnuih wai lăng bruă pơphun ngui ngor, ngă yang rơbang ƀơi pra yang Pô Chei ƀơi anai, pơgôp djă pioh gru grua djuai ania Chăm amăng plơi pla.

Amăng bơyan pơdơi prong, ơi Thông Long juăt pơphun pơtô ayŭp đing saranai brơi ƀing hlăk ai čơđai. Er mơñi mơng đing saranai hmư̆ lăng ai ñu amuñ ayŭp samơ̆ kiăng mut hrŏm hăng hơgor ghi năng, paranưng rơkâo mơnuih ayŭp thâo, sit biă ñu thâo hyuh ayŭp brơi lăp djơ̆. Yua anun ƀu djơ̆ hlơi hlơi lêng kơ thâo ayŭp. Ơi Thông Long brơi thâo, mah mrô mơnuih nao hrăm aset đôč samơ̆ ñu ăt hok mơ-ak pơtô brơi. Ră anai ƀing mơnuih yua ñu pơtô brơi ayŭp đing saranai amra tŏ tui ba ngui amăng hơdôm hrơi ngui ngă yang amăng plơi pla. “Kâo ăt kiăo tui hrăm ñu pơtô brơi ayŭp đing saranai sui laih, yua kâo pel ĕp hlâo anun bruă hrăm ñu tañ ƀiă. Kâo ayŭp đing saranai mơng kiăo tui hrăm truh ră anai, tơdơi anai amra pơtô glăi ƀing čơđai amăng plơi pla, ană tơčô amăng sang anŏ. Kâo čang rơmang pơgôp djă pioh gru grua djuai ania Chăm gơmơi, anăm brơi rơngiă hĭ, hăng čang rơmang ƀing ană tơčô mô yâo tŏ tui hăng mă yua djơ̆ amăng hrơi ngui ngă yang gru grua pioh glăi mơng đưm hlâo, kiăng djă pioh gru grua djuai ania Chăm jai hrơi hiam klă tui”.

Hăng mơnuih djuai ania Chăm, er đing saranai lĕ er mơñi mơyang, pơlir ană mơnuih hăng yang rơbang. Er mơñi anai amra ƀu rơngiă ôh yua hơmâo ƀing mơnuih, ƀing čơđai kiăo tui hrăm kiăng tŏ tui hăng djă pioh. Lơm er đing saranai mơñi hrŏm hăng jua hơgor ghi năng, paranưng hmư̆ tơ-ua amăng plơi pla djuai ania Chăm ăt lĕ er mơñi pioh glăi mơng djuai ania, pơtă rĭm čô mơnuih thâo glăm ba amăng bruă djă pioh gru grua, djă pioh er mơñi mơng đing saranai hăng čang rơmang tơlơi hơdip hơđong hăng yâo mơ-ak./.