Hơneč mă bơyan không pang anai, mơnuih ƀôn sang amăng plơi Kim Môn, să Chư A Thai, tơring čar Gia Lai pok pơhai bruă man pơkra jơlan amăng plơi pla, pok prong 8 met. Kiăng man pơkra tañ giong, lu sang anŏ hơmâo ruh hĭ pơga, poyơr lŏn mơnai. Sang anŏ ơi Phạm Văn Hùng lĕ sa amăng hơdôm boh sang anŏ ba jơlan hlâo, ruh hĭ abih pơga, pơyơr rơbêh 74 met karê lŏn sang. Dŏ amăng sang giăm jơlan glăk pok prong, ơi Hùng hok mơ-ak lơm ƀuh plơi pla jai hrơi pơplih phrâo:

“Sang anŏ gơmơi hơmâo pơyơr lŏn sang rôk tui ară jơlan hơđăp prong 3 met, ƀing gơmơi tŭ ư hrŏm hăng Kơnuk kơna čuk pơkra jơlan kiăng plơi pla agaih rơnăk, jơlan nao rai gêh gal ƀiă, bruă pơgŭ pơgiăng gơnam tam ăt hruaih mơn. Mơnuih ƀôn sang jum dar anai lêng kơ ha pran pơyơr lŏn kiăng kơ hrŏm hăng Kơnuk kơna čuk pơkra jơlan”.

Hlâo adih, yak nao bơyan yuă hơpuă, rơbêh pơprong ƀu dưi mut nao tơl anih pơdŭ pơgiăng gơnam đang hmua yua jơlan anet, lu anih răm rai. Kiăng kơ pok prong hơdôm ară jơlan amăng plơi pla, hrŏm hăng ƀing apăn bruă ƀơi să, mơnuih ƀôn sang ăt pơtô pơblang, pơsur tơdruă mut hrŏm. Ơi Dương Văn Phon, dŏ amăng plơi Hải Yên brơi thâo, hăng neh met wa ƀơi anai, pơyơr ha bơnah lŏn kiăng hơmâo jơlan nao rai prong rơhaih ră anai hăng kơñ pơgi lĕ tơlơi kiăng ngă.

“Ƀu djơ̆ kơnong ƀing apăn bruă nao juh alum, mơnuih ƀôn sang ƀing gơmơi ăt pơsur pran jua tơdruă, neh met wa yua abih bang, abih bang mơnuih mơng anun lêng kơ gir run. Mah ƀing gơmơi rơngiă ƀiă lŏn mơnai, samơ̆ tơlơi dưi lĕ hơmâo kơnuk kơna pơkra brơi jơlan prong rơhaih kiăng nao rai gêh gal, ƀu djơ̆ kơnong brơi rơnuk ƀing gơmơi đôč ôh, ăt pioh glăi ană tơčô tơdơi hơmâo jơlan hiam, ngă tui anun kah mơng dưi pơđĭ kyar bơwih ƀong huă”.

Ơi Trần Văn Nguyên, Khua git gai Ping gah ngă rah Khua plơi Hải Yên, să Chư A Thai brơi thâo, tơlơi hok mơ-ak hloh lĕ 79 boh sang anŏ amăng dua boh plơi rôk tui jơlan, abih bang lêng kơ tŭ ư pơyơr lŏn ngă jơlan, tơlơi anai brơi ƀuh tơlơi mut hrŏm kiăng ngă tui tơlơi črâo trun mơng Kơnuk kơna.

“Neh met wa hur har pran jua yua hơmâo jơlan phrâo hiam hruaih. Lơm pơtô pơblang brơi neh met wa hlơi hlơi lêng kơ tŭ ư pơyơr lŏn, ruh hĭ pơga hlâo anun hơmâo man pơkra sir kjăp. Lơm hơmâo Ping gah, kơnuk kơna man pơkra brơi jơlan anai, neh met wa hok mơ-ak biă mă.”

Să Chư A Thai lĕ kual ngă hmua pơdai phun ƀơi kual Yŭ tơring čar Gia Lai. Pơsit tong jơlan glông lĕ tơlơi pơtrut pơđĭ kyar, să hơmâo tuh pơ alin man pơkra 18 ară jơlan pơlir plơi pla hăng abih tih prăk tuh pơ alin rơbêh 17,4 klai prăk. Amăng anun, mơnuih ƀôn sang hơmâo pơyơr giăm 5.000 met karê lŏn pơkra jơlan, pơgôp rơbêh 1,1 klai prăk. Ơi Phạm Văn Lượng, kơ-iăng Khua git gai Ping gah, Khua Jơnum min mơnuih ƀon sang să Chư A Thai brơi thâo, să glăk tŏ tui pok pơhai man pơkra dong 7 ară jơlan phrâo hăng tŭ mă tơlơi bơtŭ ư mơng mơnuih ƀôn sang.

“Bruă pok pơhai man pơkra hơdôm ară jơlan hơmâo tơlơi mut hrŏm mơng neh met wa amăng djop plơi pla, djru brơi gong gai ƀon lan pok pơhai tañ hơdôm akŏ bruă anai. Lơm pok pơhai bruă anai ƀing gơmơi hơmâo akŏ pơjing grup hyu pơtrut pơsur, pơblang brơi bruă pơhrui glăi lŏn mơnai hăng hơmâo pơphun hyu pơtô pơblang, djop anih anom kơđi čar amăng plơi pla ăt gum hrŏm hyu pơblang brơi neh met wa ngă tui bruă pơsur pơyơr lŏn čuk pơkra jơlan glông”.

Hơdôm ară jơlan glăk ƀơƀrư̆ pok prong ƀơi să Chư A Thai, tơring čar Gia Lai ƀu djơ̆ kơnong ngă gêh gal brơi bruă nao rai, bơwih ƀong ngă hmua đôč ôh mơ̆ ăt pơdah brơi pran gum pơgôp, ha pran mơng mơnuih ƀôn sang amăng man pơdong plơi pla phrâo./.