Ƀơi 5 boh să ter guai dêh čar: Bơ Y, Ia Tơi, Ia Đal, Đak Long hăng Đak Plô, tơring čar Quảng Ngãi, hơdôm kơčăo bruă man pơdong sang hră kơnuk kơna čem rông lu gưl mơ̆ng gưl sa-gưl dua hlăk pơphun man pơdong mơ̆ng blan 3/2026. Anai lĕ, ƀu kơnong yak nao amăng bruă tuh pơ alin čuk pơkra jơlan, man pơdong sang hră đôč ôh, dŏ pơgôp hrŏm kiăng pơjing atur pơđĭ kyar sui thun kơ kual giăm guai dêh čar, kual plơi pla mơnuih ƀôn sang djuai ƀiă gah yŭ tơring čar Quảng Ngãi.

Ƀơi să Bơ Y, sa boh sang hră hiam klă, hơmâo djop gơnam yua jing sa tơlơi čang rơmang sui laih mơ̆ng nai pơtô, čơđai sang hră pơ anai. Nai neh pơtô hrăm hră Võ thị Tuyên, pơtô sang hră gưl sa hăng gưl dua Đak Sŭ, să Bơ Y, čang rơmang kơčăo bruă anai tuh pơ alin man pơdong djơ̆ hnơ̆ng pơkă:

“Ră anai, dưi hơmâo Ping gah hăng kơnuk kơna đing nao biă mă man pơdong sang hră đôm lăm lu gưl, sit mơ̆n amra či hơmâo sang hră hiam klă, kơjăp hloh. Mơ̆ng anun, amra ngă gêh găl kơ ƀing nai pơtô hăng čơđai sang hră ngă djơ̆ tơlơi gơgrong pơtô hăng hrăm mơ̆ng pô ta. Ƀing  čơđai sang hră ăt amra hơmâo anŏ gêh găl hrăm hră ƀơi sab oh sang hră hiam phrâo hloh”.

Ră anai, tơring čar Quảng Ngãi hlăk man pơdong 9 boh sang hră đôm lăm lu gưl ƀơi să ter guai dêh čar. Hơdôm kơčăo bruă dưi ngă tui sa hnơ̆ng, hơmâo tơlơi gum hrŏm plah wah gong gai kơnuk kơna hăng mơnuih ƀôn sang.

Ƀơi să guai dêh čar Yuk Nông, bruă ruah anih man pơdong sang hră dưi tơña laih anun pơhaih rơđah rơđong, hơmâo mơnuih ƀôn sang ngă hrŏm. Kual lŏn ƀơi plơi Ngọc Hiệp, prong rơhaih 4,2 hektar, dưi ruah ngă anih man pơdong sang hră. Ơi Trần Cao Bảo Việt, Khua Jơnum min mơnuih ƀôn sang să Yuk Nông, tơring čar Quảng Ngãi, brơi thâo, să hơmâo dăp hơdră pơkra hơdră, kiăng ba yua sang hră anih hrăm klă hloh:

“Lơ̆m man pơdong sang hră lu gưl gơmơi hơmâo bơtŭ ư hrŏm tong ten biă mă hăng mơnuih ƀôn sang, biă mă ñu mơnuih ƀôn sang dŏ jum dar plơi Ngọc Hiệp, plơi Yuk Ñâi 3, bruă pok pơhai ngă tui truh ră anai djơ̆ hnơ̆ng pơkă”.

Ƀơi anih dŏ man pơdong sang hră đôm lăm lu gưl sang hră gưl sa-gưl dua Yuk Nông, hơdôm rơtuh čô mơnuih mă bruă, kông ñơn hrŏm hăng lu mơta  rơdêh măi mok mă bruă, dŏ ngă bruă na nao. Thượng tá, Vũ Thanh Khương, (gah phun kông ty 319 Ding jum ling tơhan), Khua git gai bruă mă man pơdong sang hră lăi pơtong, sang bruă gơñu amra ngă djơ̆ hnơ̆ng pơkă man pơdong sang hră truh blan 7 pơ anăp:

“Pơtong rơđah anai lĕ bruă kơđi čar yom pơphăn biă mă, ƀing gơmơi pơtum abih pran jua, tơhnal mă bruă, mơnuih hơmâo gơnam yua kiăng djop brơi bruă mă. Yap truh mông anai, puih kơđông anom bruă pok pơhai 13/13 črăn bruă hăng anih dŏ man pơdong ră anai hơmâo giăm 200 čô kông ñơn ăt kah hăng 10 boh măi, rơdêh, gơnam yua mă bruă pok pơhai sa amăng plĕ dŏ mă bruă, pơblih nao rai hrơi mlam, pơđĭ tui mông mă bruă, grup mơnuih pơdơi hneč mă pơblih nao rai yua amăng mông gêh găl adai bơyan không, pơtrut hmar bruă mă, kiăng tañ giong djơ̆ hrơi blan pơkă”.

Tui hăng Khul wai lăng kơčăo bruă tuh pơ alin čuk pơkra jơlan, djru mơnuih ƀôn sang hăng tuh tia pơkra tơring čar Quảng Ngãi, hơdôm kơčăo bruă man pơdong sang hră lu gưl ƀơi Yuk Nông, Sa Long, Rơkơi hăng Mơrai hlăk pok pơhai sa amăng plĕ. Amăng anun, kơčăo bruă ƀơi să Rơkơi hơmâo năng ai 43%, Yuk Nông hăng Sa Long hơmâo năng ai 40%, dŏ glăi Mơrai 22% rơnoh bruă hlăk ngă.

Hrŏm hăng 4 kơčăo bruă hlăk man pơdong, čuk pơkra, 5 kơčăo bruă ƀơi hơdôm să Bơ Y, Ia Đal, Ia Tơi, Đak Long hăng Đak Plô ăt hlăk man pơdong, ngă giong tui ƀơƀrư̆. Yă Y Ngok, Kơ-iăng Khua Jơnum min mơnuih ƀôn sang tơring čar Quảng Ngãi pơtrun hiăp djop anom bruă, djop să prăp lui djop anŏ gêh găl pioh pơđĭ tui boh tŭ yua man pơdong sang hră lu gưl sit ngă giong:

“Truh thun hrăm phrâo 2026-2027, pơđut črăn 1, 4 boh sang hră amra ngă giong hăng ba yua, ƀing khua mua, nai pơtô khom djop kiăng pok pơhai mơ̆ng akŏ thun hrăm phrâo. Pô tuh pơ alin pok pơhai ngă tui, prăp lui mơnuih git gai wai lăng, nai pơtô kơ thun hrăm 2027-2028 dơ̆ng lơ̆m 5 boh sang hră dŏ glăi sit ngă giong. Kâo ăt rơkâo gơnong bruă pơtô hăng pơjuăt tơring čar Quảng Ngãi đing nao pok pơhai mơ̆ng ră anai kiăng ƀing ta dưi ngă djop anŏ kiăng bruă mă jao pơ anăp adih”.

Hơdôm boh sang hră đôm lăm lu gưl hlăk ngă giong tui ƀơi anih giăm guai dêh čar tơring čar Quảng Ngãi, ƀu kơnong jing ring bruă pơtô hrăm đôč ôh, dŏ jing ringbruă mơ̆ng tơlơi đăo kơnang. Mơnuih ƀôn sang kual giăm guai dêh čar tơring čar Quảng Ngãi dŏ tơguan hrơi ring bruă ngă giong kiăng ƀing ană amôn ta pô dưi mut hrăm amăng anih hrăm, sang hră hiam klă hloh.