Să Tà Năng, tơring čar Lâm Đồng hơmâo kual lŏn mơnai prong rơbêh 25.800 ektar, mrô mơnuih giăm 14.000 čô mơnuih, amăng anun mơnuih djuai ania ƀiă truh giăm 78%. Tơdơi kơ 1 thun pok pơhai, truh ră anai wŏt Ping gah tơring čar, Jơnum min mơnuih ƀon sang, Jơnum min djop djuai ania mơnuih mơnam Việt Nam să phrâo hơmâo abih bang 41 biên chế hăng dŏ kơƀah 21 biên chế. Ơi Nguyễn Tiến Điền, Khua git gai Ping gah să Tà Năng brơi thâo, lơm bruă mă glăk lu biă mă mơ̆ anom bruă Ping gah să hơmâo kơnong 2 biên chế, Khul pơjing Ping gah hơmâo 3 biên chế, Jơnum min pel ĕp 2 biên chế, khul jơnum min djop djuai ania ƀu hơmâo mơnuih apăn bruă ngă bruă phun hăng khul gong gai kơƀah truh 9 biên chế. Mah tui anun tơlơi thâo thăi amăng bruă mă mơng ƀing apăn bruă să ăt aka ƀu bơkơnar:

“Kơnong hơmâo 4 čô mơnuih ngă khua apăn akŏ hơmâo khua git gai Ping gah, kơ-iăng khua git gai Ping, Khua git gai să hăng 1 kơ-iăng khua git gai lĕ ƀing mơnuih mơng tơring čar, tơring glông glăi mă bruă, dŏ glăi hơdôm biên chế lĕ yua dŏ glăi mơng hrơi 2 boh să pơmut hrŏm, yua anun mơnuih mă bruă kiăng ngă djơ̆ tơlơi rơkâo, bruă jao ră anai ăt tơnap tap mơn. Yua kơ ngă bruă biên chế, anun sa, dua čô mơnuih apăn bruă amra ngă lu bruă phara. Ră anai sa čô mơnuih apăn bruă amra ngă mơng 4-5 mơta bruă yua mơng gơnong bruă jao trun”.

Hăng bruă kơƀah ƀiên chế ƀơi să tơnap tap Tà Năng, bruă mơnuih apăn bruă ăt le tơlơi lông wŏt hăng hơdôm boh phường amăng tơring čar Lâm Đồng. Amăng anun, phường Xuân Trường-Đà Lạt, bruă mơnuih apăn bruă ăt jing tơlơi bơngơ̆t prong hloh. Yă Ngô Thị Mỹ Lợi, Khua git gai Ping gah phường Xuân Trường-Đà Lạt brơi thâo, bruă mă lu ƀiă pơhmu hăng să hơđăp, tơlơi glêh tơnap lơm lu bruă ngă kơ lu mơnuih apăn bruă rơkâo pơdơi bruă:

“Ƀing apăn bruă amăng phương Xuân Trường-Đà Lạt ră anai mă bruă glêh tơnap biă mă, mơnuih rơkâo pơdơi bruă glăk lu tui. Gưl Ping gah hơmâo laih 2 čô mơnuih rơkâo pơdơi. Hăng Jơnum min hơmâo 3 čô khua mua rơkâo pơdơi tui tơlơi rơkâo hajăn mơng ƀing gơñu, ƀu kiăng tui hơdră apah prăk hơget ôh. Truh ră anai ƀing gơmơi ăt tŭ mă dong 4 pok hră pơ-ar rơkâo pơdơi bruă”.

Tơdơi kơ pơmut hrŏm 3 boh tơring čar Dak Nông, Bình Thuận hăng Lâm Đồng, tơring čar Lâm Đồng phrâo hơmâo 124 boh să, phường, kual bul pơtâo. Bruă pơmut hrŏm, ngă hơbot anih anom amăng tơring čar Lâm Đồng ngă 2.529 čô mơnuih pơdơi bruă tui tơlơi pơtrun mrô 178; 145 čô mơnuih pơdơi tui tơlơi pơtrun mrô 07 hăng ngă tui bruă pơhrŏ trun ƀiên chế hăng 1.450 čô mơnuih mă bruă arăng jao ngă bruă phara gưl să. Tơlơi pơhing phrâo hloh mơng gơnong bruă wai lăng bruă mă tơring čar Lâm Đông, tơdơi kơ giăm 1 thun pơmut hrŏm, pơhmu hăng biên chế hơmâo jao ră anai gưl să kơƀah 823 biên chế, gưl gơnong bruă, sang bruă kơƀah 990 biên chế. Ơi Nguyễn Ngọc Phú, Kơ-iăng Khua Jơnum min mơnuih ƀon sang tơring čar Lâm Đồng brơi thâo, glăk hơmâo lu tơlơi glêh tơnap hăng ƀing apăn bruă gưl să hăng anai lĕ tơlơi ba truh kơ bruă ngă kơƀah lu mơnuih apăn bruă:

“Hơmâo lu bruă mă dŏ glăi mơng gưl tơring glông hăng lu bruă mơng gưl tơring čar jao glăi kơ să. Tơlơi glêh tap tal dua dong lĕ lu adơi ayong aka ƀu dưi ngă bruă hlâo adih mơng tơring glông hăng tơring čar. Bruă tal tlâo dong lĕ glêh tơnap amăng bruă mă rah, hrơi mông kiăng lăi pơthâo kiăng kơ tañ, laih dong kiăng ngă brơi hră pơ-ar djơ̆ hrơi mông mơng anom bruă ha bah amăng. Tơdah ƀu pơhlôm brơi kjăp bruă mă gưl să hăng pơhlôm brơi mơnuih apăn bruă gưl să, anai lĕ tơlơi gun prong, ƀing ta kiăng lăng nao tong ten kơ bruă anai”.

Amăng mông jơnum lăng glăi ha thun ngă tui hơbô̆ bruă gong gai ƀon lan 2 gưl, Ping gah tơring čar Lâm Đông lăi rơđah: bruă mă gưl să đĭ lu tui samơ̆ biên chế dŏ kơƀah, ba truh kơ bruă mơnuih apăn bruă khŏm ngă lu bruă phara, ngă glêh tơnap biă mă; bruă kah pơpha biên chế hăng hơdră djru brơi aka ƀu lăp djơ̆ hăng tơlơi kiăng hăng ƀu dưi pơsur mă bruă mơng ƀing apăn bruă ƀơi ƀon lan. Ơi Đỗ Thanh Bình, Ding kơna Ping gah gơnong glông, Khua ding jum wai lăng bruă mă brơi thâo, mơng tơlơi sit nik ha thun pok pơhai gong gai ƀon lan 2 gưl hăng pơsit tong thun 2026 lĕ “Thun hrưn đĭ klă bruă mă mơng ƀing apăn bruă ƀon lan”, Lâm Đồng kiăng pel ĕp, lăng glăi, hruă kjăp mơnuih apăn bruă gưl să; pơtrut kơtang bruă pơtô hrăm tui tơlơi rơkâo:

“Rĭm boh să, phường lăng glăi rĭm čô mơnuih apăn bruă, ba tơbiă tơlơi rơkâo pơtô hrăm. Laih dong pơlir hăng bruă jao ƀơi anih anom hăng hơmâo hơdră pơhưč mơnuih thâo rơgơi glăi mă bruă ƀơi ƀon lan. Đing nao bruă dưm dăp hăng pơsir hĭ hơdră djru brơi mơnuih ngă bruă jao phara. Djop gưl, gơnong bruă amăng tơring čar Lâm Đồng gơgrong, khut khăt amăng bruă ngă tui, đing nao pơsir hĭ hmao tlôn hơdôm tơlơi tơnap tap, gun găn, hơdôm tơlơi gun kiăng ba hơbô̆ bruă gong gai 2 gưl pok pơhai jai hrơi tŭ yua, klă ƀiă”.

Pơsir hĭ “tơlơi gun” kơ mơnuih mă bruă tơdơi kơ giăm 1 thun pok pơhai gong gai ƀon lan 2 gưl, lăng glăi mơng tơlơi sit nik, tơring čar Lâm Đồng glăk tŏ tui dưm dăp, ngă hơbot anih anom mă bruă amăng anih anom kơđi čar tui tơlơi git gai mơng gơnong glông. Hrŏm hăng anun Lâm Đông ăt đing nao hrưn đĭ klă bruă mă mơng ƀing apăn bruă, mơnuih mă bruă, sit biă ñu gưl ƀon lan; tŏ tui pel ĕp, dưm dăp mơnuih mă bruă lăp djơ̆ tơlơi rơkâo bruă jao; kơtưn pơtô hrăm bruă mă, yua boh thâo phrâo hăng tơlơi thâo thăi amăng ngă bruă kah mơng dưi pok pơhai klă gong gai ƀon lan 2 gưl brơi sit nik, tŭ yua lăng boh than ba glăi sit nik, djơ̆ pran mơnuih ƀôn sang, anom bơwih ƀong sĭ mơdrô lĕ tơlơi pơkă lăng bruă mă./.