Amăng pơdah thâo sĭ mơdrô online, ta lăi pơdah brơi ƀơi anăp mơta ƀudah pôr hmao klôn lơ̆m rơnuč blan 4/2026 yua Gơnong bruă Tuh tia pơkra ming hăng sĭ mơdrô tơring čar Gia Lai ngă hrŏm sang bruă wai lăng sĭ mơdrô amăng điện tử hăng bơwih ƀong huă mrô gah Ding jum wai lăng tuh tia pơkra ming hăng sĭ mơdrô pơphun, ƀañ it anung hla hơbơi teng Hoàng Đông, să Bình An, tơring čar Gia Lai arăng rơkâo hơdôm rơbâo mơta gơnam sĭ mơdrô amăng ƀiă mông đôč.

Amai Hồ Thị Mỹ Phúc pô sang bruă sĭ mơdrô anun brơi thâo, gơnam gơñu pơkra ming dưi pơkă gơnam OCOP 3 asar pơtŭ mơ̆ng thun 2019, samơ̆ yua hlâo adih kơnong sĭ mơdrô amăng kual lơ̆m tơring čar đôč, laih dơ̆ng ƀañ anai djă pioh ƀiă hrơi đôč. Tơdơi kơ ngă tui dưm amăng kơdung, hrip abih angin amăng lăm kơdung pơgang pioh sui hrơi hloh, gêh găl hăng bruă ba hyu pơdŭ pơgiăng nao pơ ataih hloh anun sĭ mơdrô amăng plăng internet gêh găl hloh, lu hră rơkâo blơi sa wơ̆t truh hơdôm rơtuh tơlô̆ ƀañ it.

“Rim wơ̆t Megalive mơ̆ng Gơnong bruă Tuh tia pơkra ming hăng sĭ mơdrô pơphun lĕ, gơnam sĭ mơdrô gơmơi lar tañ biă mă amăng facebook, lu mơnuih thâo hăng ƀuh. Anai lĕ hơdră djru kơ sang bruă mơdrô gơmơi pơđĭ kyar tañ hloh. Sa wơ̆t pơdah thâo sĭ mơdrô Megalive anun hơmâo hơdôm rơbâo pô rơkâo blơi. Gơmơi amra dưm amăng kơdung kơsu laih anun hrip hĭ angin amăng lăm, dưi djă piho 2-3 hrơi huăi ƀâo ih ôh, dưi ba truh pơ tơngan mơnuih blơi ƀong huă ƀañ it anung hla hơbơi teng ăt dŏ hiam đôč”.

Ăt tui anun mơ̆n, sang bruă ngă hrŏm gah hmua hăng mă akan hơdang Mỹ An, să Phù Mỹ Đông, tơring čar Gia Lai hlâo adih tơnap tap biă mă kơ anih hyu sĭ mơdrô mah gơnam gơñu pơkra rai ia ƀâo bơngưi, ia jrao ƀâo bơngưi dưi pơsit gơnam OCOP laih. Tơdơi kơ pơblih ngă sĭ mơdrô online, sang bruă ngă hrŏm hơmâo pok prong tui, lu anih anom rơkâo blơi hăng rơnoh prăk pơhrui glăi amăng dua thun laih rơgao ƀuh lu biă mă.

Amai Nguyễn Thụy Thúy Vi, Kơ-iăng khua Khul khua wai lăng sang bruă ngă hrŏm anun brơi thâo:

Sĭ mơdrô hăng điện tử ƀu kơnong djru ĕp anih blơi, mơnuih thâo krăn gơnam sĭ mơdrô ta lu tui đôč ôh, dŏ ngă gêh găl brơi plang tơlơi pơhing lăi pơthâo sĭ mơdrô ƀơi anăp mơta, hmao klôn, mơ̆ng anun ƀư̆ pơkra tui, pơjing gơnam sĭ mơdrô hăng hơdră lăi pơthâo sĭ mơdrô djơ̆ tui anŏ či kiăng.

“Hlâo adih, ƀing gơmơi sĭ mơdrô ƀơi tơring čar đôč samơ̆ tơdơi kơ anun ƀuh sĭ mơdrô amăng online lĕ gêh găl hloh anun pok pơhai bruă čơphil rup pơdah thâo anăn gơnam pơkra ming sĭ mơdrô, ngă clip video hăng pơdah thâo online anun yơh ƀing gơmơi hơmâo lu mơnuih đing nao laih anun pok pơhai pơđĭ kyar hơdôm wơ̆t livestream sĭ mơdrô pôr pơthâo amăng plăng tơlơi pơhing điện tử ƀudah pơdah thâo amăng fanpage thâo, pơčrâo rơđah gơnam mơ̆ng sang bruă ngă hrŏm, tơdơi kơ anun ƀuh rơnoh mrô đĭ tui, anun yơh gơmơi pơđĭ kyar jai hrơi tañ hăng kơtang hloh sĭ mơdrô online”.

Ră anai, Gia Lai hơmâo năng ai mơ̆ng 400-450 mơta gơnam sĭ mơdrô OCOP, lu biă mă ñu gơnam đang hmua hăng gơnam hơjăn tơring čar đôč hơmâo. Khă tui anun, hơdôm sang bruă pơkra ming gơnam OCOP ƀơi tơring čar ăt dŏ ƀiă hăng sĭ mơdrô anet đôč, dŏ kơƀah tơlơi thâo ba yua ia rơgơi mrô hăng hơdră lăi pơthâo gơnam sĭ mơdrô, ngă kơ lu bruă sĭ mơdrô aka ƀu hơđong biă mă ôh.

Lơ̆m dua thun laih rơgao, lu jơlan hơdră djru ba tơlơi thâo thăi hơdră sĭ mơdrô gơnam online, livestream, čih pơkra dăp hơdră mrô….hơmâo pok pơhai, djru mơnuih ngă hmua hăng sang bruă ngă hrŏm juăt tui ƀơƀrư̆ hăng anih anom sĭ mơdrô amăng atur ia rơgơi mrô. Mơ̆ng anun dưi pok prong anŏ sĭ mơdrô, dưi čih pioh polar tui anăn gơnam sĭ mơdrô kiăng arăng thâo.

Ơi Nguyễn Đình Kha, Kơ-iăng Khua Gơnong  bruă Tuh tia pơkra ming hăng sĭ mơdrô tơring čar Gia Lai brơi thâo, amăng thun blan pơ anăp, tơring čar ăt pơtong rơđah bruă sĭ mơdrô amăng plang điện tử yơh sap lang yom. Mơ̆ng thun 2026-2030, tơring čar anăp nao pơtrut kơtang bruă sĭ mơdrô amăng điện tử truh pơ tač rơngiao, mơ̆ng anun kiăng ƀu kơnong pơđĭ tui rơnoh gơnam đang hmua đôč ôh, dŏ yak nao ba anăn gơnam sĭ mơdrô mơ̆ng tơring čar thâo hmư̆ hing truh pơ jar kmar.

“Ƀing gơmơi dăp hơdră pơblih yua mrô gah anom bruă tuh tia pơkra ming hăng sĭ mơdrô. Amăng anun đing nao kơ bruă sĭ mơdrô ba yua atur mrô sĭ mơdrô amăng plang điện tử. Gah bruă sĭ mơdrô hăng tač rơngiao, gơmơi đing nao sĭ mơdrô pơtruh nao rai hăng ƀing blơi pơ dêh čar tač rơngiao, pơlir hăng anăn plăng sĭ mơdrô amăng điện tử jar kmar. Amăng blan 5 anai mơtam, gơmơi amra pơphun sa wơ̆t jơnum, pơčrong sai kơ atur ia rơgơi mrô pioh lăi pơthâo sĭ mơdrô amăng plang điện tử truh pơ dêh čar tač rơngiao”.

Pơblih yua mrô hlăk ngă pơblih tui hơdră sĭ mơdrô boh troh, gơnam đang hmua mơ̆ng Gia Lai, kiăng dưi pơtruh brơi pơ anih blơi yua, pok phrâo jơlan hơdră sĭ mơdrô beč bal hloh laih anun tŭ yua hloh. Lơ̆m mơnuih ngă hmua dưi ngă pô tong ten laih tơlơi pơhing či pôr hyu, hơdôm gơnam sĭ mơdrô hiam klă tŭ yua ƀơi tơring čar dưi nao hmar, truh tañ hloh pơ mơnuih blơi yua amra jing hơdră pơđĭ kyar tañ hăng hơđong hloh ƀơi anih anom sĭ mơdrô lu, prong tui.