Amăng adai ƀhrač pơđiă mơguah, ƀơi sang jơnum ƀut plơi Cao Thắng, phường Ea Kao lăng ir ar mơnuih ƀôn sang nao ngă hră pơar lŏn tơnah, akŏ sang, pơtong brơi anih dŏ kơ ană plơi pla. Ƀu ƀuh tơlơi hơmâo mơnuih ƀôn sang khom nao pơ ataih, lu anih dơ̆ng tah, dŏ tơguan sui hrơi kah hăng hlâo ôh, mơnuih apăn bruă amăng phường djă ba abih pơtum sa anih pơsir hră pơar tơl plơi pla anih mơnuih ƀôn sang dŏ kiăng bơwih brơi pơsir hră pơar kơ mơnuih ƀôn sang.

Ơi Lương Đình Trường, mơnuih ƀôn sang plơi Cao Thắng brơi thâo, lu thun laih rơgao hăng anai, mơnuih ƀôn sang bơngơ̆t hăng hŭi biă mă sit nao pơ anih ngă hră pơar yua ataih, laih dơ̆ng ƀu khin tơña kơ hlơi ôh. Tơ tă anai, ƀing apăn bruă glăi pơtô, pơčrâo ba tơl sang, rim čăl anun yơh djop pô hơ̆k mơak soh.

“Mơnuih ƀôn sang hŏk mơak biă mă laih anun mơnuih ƀôn sang rai pơ anai jơngum pioh rơkâo pơsir ngă brơi hră pơar. Khua mua mơnuih apăn bruă jĕ giăm mơnuih ƀôn sang, pơblang brơi rơđah, tơlơi anai lăp hăng jơlan hơdră mơ̆ng ping gah hăng kơnuk kơna”.

Tui hăng yă Đỗ Thị Nguyệt, Kơ-iăng khua anom bruă ngă hră pơar mơ̆ng kơnuk kơna phường Ea Kao, ƀu kơnong amăng mơguah blung a đôč ôh, phrâo pok pơhai ƀơi kual plơi pla hơmâo 170 čô mơnuih nao ngă hră pơar, lu hloh anŏ him lăng blung a.

“Hăng sa rơwang hrơi tơjuh yom hloh nao ngă hră pơar amăng kơnuk kơna, tơhnal pơkă mơ̆ng jơnum min mơnuih ƀôn sang phường gir run pơsir amăng 7 hrơi hăng hră pơar amuñ amĕ gêh găl amra brơi glăi boh tơhnal laih pơsir giong”.

Tơdơi kơ sa thun ngă tui hơbô̆ bruă gong gai kơnuk kơna 2 gưl, ƀơi Ea Kao, tơlơi mơ̆ mơnuih ƀôn sang hơmâo ƀuh rơđah ƀu kơnong ngă hră pơar tañ hmar hloh ôh, dŏ ƀuh khua mua apăn bruă jĕ giăm mơnuih ƀôn sang hloh, mă bruă prăp lui hlâo lăp.

Rôk tui jơlan ƀêtông glông 600 met phrâo ngă giong ƀơi ƀut plơi 5, ơi Dương Lê Sơn ƀu pơdŏp ôh tơlơi mơak amăng pran jua. Abih ha mơkrah rơnuk thun, jơlan nao rai anai ăt jơlan lŏn. Lu wơ̆t jơnum, jak iâu pơčruh ngăn pơkra jơlan lêng kơ lui ruh. Samơ̆ kơnong rơgao hơdôm blan ngă tui gong gai kơnuk kơna phrâo, mơnuih ƀôn sang sa pran jua pơyơr lŏn sang giăm 200 met karê hăng pơčruh 200 klăk prăk ngă jơlan.

“Gong gai dua gưl lĕ mă bruă hmar hăng beč bal hloh, djru mơnuih ƀôn sang amăng bruă pơđĭ kyar bơwih ƀong huă, mă bruă pơkra ming ăt kah hăng jơlan glông nao rai klă. Abih bang thâo gum pơgôp nao rai, djop mơnuih djru ba sa tơlơi pơmin, pơkra jơlan nao rai hiam klă lĕ gêh găl kơ abih bang mơ̆n, anun djop pô ngă hrŏm soh”.

Mơ̆ng hơdôm tơlơi ƀuh rơđah tui anun, phường Ea Kao pơphun bruă mă “Bruă čar, bruă plơi, lŏn yom hai ăt pơyơr mơ̆n” pioh pok pơhư prong jơlan glông nao rai, ming pơkra glăi, pơhrôp hiam plơi pla hăng pơtrut ngă bruă čơkă tuai hyu ngui. Ngă tui jơlan hơdră anai, lu sang anŏ mơnuih ƀôn sang hrŏm pra yang Phổ Hiền hơmâo pơyơr lŏn pok jơlan ter hang ia dơnao Ea Kao, pơjing jơlan rơbat tơkai, brơi mơnuih ƀôn sang rô nao rai. Khua ơi phơt Thích Phước Hiền, git gai pra yang Phổ Hiền lăi lĕ, bruă pơyơr lŏn sang kơnong pok brơi man ƀrô pioh kơ mơnuih ƀôn sang jĕ giăm rô nao rai đôč.

“Kiăng dưi pok jơlan rơbat nao rai hiam tui anun, pioh rơjang drơi jăn brơi ƀing tha rơma, ƀing phơt yơng. Kâo dŏ ƀơi pra yang Phổ Hiền hơ̆k mơak biă mă dưi ngă hrŏm ring bruă anai, pioh sa bruă ngă giam klă hlâo kơ thun 2030”.

Ƀu kơnong jơlan glông đôč ôh hiam klă, tơlơi pơhing pơgang rơnuk rơnua ƀơi kual plơi pla dưi pơblih tui rơđah mơ̆n. Ayong Hồ Hậu, mơnuih pô sang homestay ƀơi phường Ea Kao brơi thâo, lu bruă mă dưi hơmâo tơhan kông an pơsir hmar biă mă yua thâo kiăo tui, sem lăng jĕ giăm amăng plơi pla.

“Pơgang rơnuk rơnua klă hloh laih; bơhmutu kâo hơmâo anih ngă homestay ƀơi jơlan Nguyễn Trường Tộ, amăng sa tlam anun arăng klĕ dơ̆p, ĕp glăi kamera kâo ƀuh  laih anun ba rup pơdah pơ kông an. Mơguah hrơi tơdơi, kâo nao pơ sang bruă kông an, Khua kông an phường brơi thâo, hơmâo mă laih pô klĕ dơ̆p anun”.

Tơdơi kơ pơmut glăi phường, phường Ea Kao hơmâo mơ-it rơbêh 2000 pok hră pơsir kơđi tơlơi hăng pơsir giong hlâo kơ hrơi pơkă abih bang hră pơar ba mơ-it; hră pơar ngă amăng online giăm 99%; hnơ̆ng ngă mơak pran jua mơnuih ƀôn sang hăng sang bruă mơdrô lĕ lu biă mă. Lu tơhnal pơkă kơ tơlơi bơwih ƀongf huă-mơnuih mơnam dưi ngă rơgao hnơ̆ng pơkă, amăng anun prăk pơhrui glăi lu hloh anŏ pơkă lĕ 107% pơkă hăng rơnoh tơring čar jao.

Ơi Đặng Gia Duẩn, Khua git gai ping gah phường Ea Kao lăi lĕ, boh tơhnal prong hloh 1 thun ngă tui hơbô̆ bruă kơnuk kơna dua gưl lĕ hơmâo tơlơi tŭ ư hrŏm amăng mơnuih ƀôn sang laih anun bơtŭ ư pran jua amăng mơnuih apăn bruă.

“Tơlơi prong hloh lĕ ƀing gơmơi hơmâo ngă prăp lui hlâo hơmâo tơlơi tŭ ư hrŏm amăng mơnuih ƀôn sang, sa pran jua hăng ƀing ngă bruă gum hrŏm kiăng ngă amăng abih rơwang bruă thun 2025-2030. Ƀing gơmơi ăt hơmâo ngă hră pơtrun brơi pơblih phrâo ngă hră pơar hăng pơblih yua mrô, kơ bruă tuai čuă ngui lir hơbit hăng bruă sĭ mơdrô hăng pơkă hnơ̆ng. Thun blan pơ anăp, hrŏm hăng ngă tui djop hră pơtrun phun ƀing gơmơi amra pơtum abih pran jua amăng bruă pơđĭ rơnoh pơhrui truh dua mrô”.

Sa thun aka ƀu sui ôh, samơ̆ mơ̆ng hơdôm arăt jơlan hơmâo pok pơhư prong, hơdôm poh hră dưi pơsir amăng kual plơi pla truh hơmâo prăp lui klă gong gai kơnuk kơna dua gưl pơsir djơ̆ lăp…hơbô̆ bruă gong gai kơnuk kơna dua gưl ƀơi Ea Kao hlăk ngă bruă brơi ƀuh, pơblih rơđah biă mă mơ̆ng sa atur kơnuk kơna jĕ giăm mơnuih ƀôn sang, bơwih brơi kơ mơnuih ƀôn sang tŭ yua sit nik.