Sang anŏ ayong Điểu Đên jing sa amăng 60 boh sang anŏ djuai ania ƀiă ƀơi ƀon Bu Lum, să Quảng Trực, tơring čar Lâm Đồng rơmet gơnam glăi dŏ pơ anih pơdong sang phrâo yua kơnuk kơna man pơdong brơi. Tơlơi mơak mơ̆ng ñu wơt hăng neh met wa lơ̆m sang dŏ phrâo hơmâo apui lơtrik, jơlan hiam, sang hră, sang ia jrao. Ayong Điểu Đên lăi, apui amăng sang dŏ phrâo kơtang biă, hui đôč mơ̆ng thăm, anun jing ñu mă yua 2 klăk prăk kơnuk kơna brơi či blơi gŏ asơi pơkĕ apui lơtrik, gŏ če hơtuk ia pơkĕ apui mơn. Ră anai rơkơi bơnai ñu pơkom prăk či blơi hip rơ-ơ̆ či pioh gơnam, añăm pơtăm, blơi loa, măi mok či pĕ ngui gong brô̆ laih anun ñu čang rơmang plơi pla djuai ania ƀiă pơ să pơkŏn ăt hơmâo hnun mơn. Ayong Điểu Đên lăi: “Kâo lăng Ping gah, Kơnuk kơna lăng ba biă kơ mơnuih ƀôn sang pơ guai lŏn ia. Amăng ƀon anai neh met wa mơak biă, gơmơi lui abih sang anŏ hơđăp či glăi dŏ pơ anai, yua dah pơ anai hiam hloh, hơmâo apui lơtrik jing jơnap hloh. Kâo čang rơmang kơnuk kơna sem lăng, djru brơi plơi pla pơkŏn dong, hơdôm boh sang anŏ aka ƀu hơmâo apui kiăng gơñu dưi hơmâo apui yua kar hăng pơ anai mơn”.

Giăm ƀon Bu Lum lĕ ƀon Bu Dăr. Mơ̆ng hrơi hơmâo hrĕ apui lơtrik, lu sang anŏ dưm truă mă apui kơđen, truă camera pơčrang gah lan, kiăng rơđah kơ mơnuih nao rai lơ̆m mơmot mlăm, angin hơjan, laih dong djru ba mơnuih nao rai lơ̆m hơmâo tơlơi truh hơget thơ, wơ̆t hăng pơgang hŭi kơ hơmâo mơnuih hyu klĕ dŏp. Bruă wai lăng ƀon mơ̆ng Khua ƀon Bu Dăr - ơi Vũ Minh Tiến yua hnun mơn amuñ hloh, klă hloh: “Apui lơtrik hơmâo baih, jing pơplih lu biă kơ să pơ guai anai, neh met wa hai hok mơak mơn. Amăng ƀon anai, 2-3 boh sang mă yua hrŏm sa công tơ či pruih ia kơ đang hmua yua dah apui 3 pha mă yua klă hloh pơhmu hăng mă ƀong ia jâo. Apui pơčrang bang bơngač jing plai mơn hơmâo tơlơi truh pơjrom pơtlă, rơbuh rơbeč, lu sang anŏ truă camera dong hŭi kơ arăng klĕ dŏp gơnam”.

Bruă hơmâo apui lơtrik pơ guai dêh čar jing ngă gêh găl brơi anom bruă dưi wai lăng, pơgang ba lŏn ia, rơnuk rơnua ƀơi guai. Tui hăng Thượng tá Phan Văn Khá, Mơnuih apăn bruă kơđi čar Puih kơđông tơhan pơgang bah amăng jang Bu P’Răng, apui lơtrik hơmâo dăng, ngă kjăp hăng ngă hơđong mă bruă, bơwih brơi klă biă bruă git gai, pơhlom pơtruh tơlơi pơhing re se lơ̆m ngă bruă. Thượng tá Phan Văn Khá brơi thâo dong:“Bruă dăng hrĕ apui glăi pơ plơi pla ataih yaih djru đĭ kyar bơwih ƀong huă hăng pơhlôm pơgang rơnuk rơnua. Hăng neh met wa, lơ̆m hơmâo apui lĕ dưi mă yua măi mok, boh thâo ia rơgơi či đĭ kyar bơwih ƀong, hơđong tơlơi hơdip. Hăng ƀing khua, ling tơhan, apui lơtrik djru ngă klă bruă wai lăng pơgang lŏn ia, pơgang guai, pơtrut mă yua boh thâo ia rơgơi amăng bruă mă”.

Ơi Trần Minh Huy, Khua Anom bruă apui lơtrik Tuy Đức, Kông ti apui lơtrik Lâm Đồng (Phun kông ti Apui lơtrik kual Dơnung), brơi thâo pơ guai lŏn ia, plơi pla ataih yaih, bruă pơhlom apui yua rơnuk rơnua hăng hơmâo na nao ƀu kơnong kiăng đĭ kyar bơwih ƀong huă, mơnuih mơnam đôč ôh ăt gum hrŏm hăng gong gai wơ̆t hăng tơhan apăn bruă bong kjăp lŏn ia, rơnuk rơnua, akŏ pơdong guai čar ta hơđong kjăp: “Tuy Đức jing să ƀơi guai dêh čar, anun apui lơtrik tơnap biă mă, samơ̆ yua hơmâo lăng ba tuh pơ alin anun yơh truh ră anai hơđong laih apui yua, 99% plơi pla hơmâo apui yua. Hơdôm kơčăo bruă ngă hơđong plơi pla pơ guai jing bruă akŏ phun mơ̆ng Kơnuk kơna laih anun lơ̆m ngă lĕ hơmâo apui lơtrik, khŏm pơhlom brơi apui yua kơ mơnuih ƀôn sang pơ guai, pơhlom hơmâo apui amăng bruă wai lăng rơnuk rơnua pơgang lŏn ia”.

Hrup anun mơn, apui lơtrik sit nik djru lu biă amăng bruă đĭ kyar bơwih ƀong huă, hơđong tơlơi hơdip mơda, pơhlom hơđong plơi plal pơ kual ataih yaih, pơ guai să Dak Wil, tơring čar Lâm Đồng. Hơdôm thun laih rơgao, apui lơtrik dêh čar jing tơlơi pơtrut prong či đĭ kyar bơwih ƀong huă ƀơi să. Apui lơtrik hơđong jing djru mơnuih ƀôn sang khin blơi măi mok, măi pruih ia thâo pơkrem, mă yua boh thâo ngă hmua, pơkra gơnam, gơnam pơhrui hơmâo hloh hăng phun pla mơboh hloh kah hăng kơphê, tiu, sâu riêng hăng lu djuai boh troh. Khua jơnum min mơnuih ƀôn sang să Dak Wil ơi Hoàng Văn Tám pơsit: “Să lăng yom biă tơlơi gum pơgôp mơ̆ng anom bruă apui lơtrik lơ̆m tuh pơ alin pơkra apui lơtrik pơ să Dak Wil anai, jing plai laih tơlơi phara mơ̆ng să anai hăng hơdôm boh să pơkŏn. Apui lơtrik pơhlom hơmâo apui yua hơđong či ngă hmua pla pơjing, pơplih plơi pla, ngă gêh găl brơi să dưi pơkra apui, tŭi rơđah jơlan, mơnuih ƀôn sang nao rai mơak hloh, pơhlom brơi nao rai ƀơi jơlan rơnuk rơnua, hơđong plơi pla, pơgang mơnuih ngă soh”.

Apui lơtrik ƀu kơnong bơwih brơi bruă bơwih ƀong hơdip mơda, ngă hmua pla pơjing đôč ôh, ăt pơhlom brơi hơdôm ƀut plơi, hơdôm puih kơđông tơhan hăng ling tơhan glăk dŏ gak pơ guai. Biă ñu, bruă hơđong plơi pla pơ guai jing jơlan ngă bruă prong biă mơ̆ng Kơnuk kơna; amăng anun, apui lơtrik jing sa amăng hơdôm tơlơi kiăng hơmâo akŏ phun hnun kah mơnuih ƀôn sang mơ̆ng hơđong tơlơi hơdip mơda, đĭ kyar bơwih ƀong huă.