Ƀơi Sang bruă ngă hră să Tây Sơn, tơring čar Gia Lai, anih čơkă ngă hră lŏn leng kơ lu hloh naih pơkŏn. Mơnuih ƀôn sang nao ngă djŏp hră yơh: hră yua lŏn, hră jao glăi, hră tŭ mă lŏn arăng brơi, pơplih glăi anăn....Ƀơi anih čơkă hră, ƀing mă bruă mă yua ia rơgơi AI pơčrang lăng hră pơ-ar, pơhmu nao rai, ƀuh tơlơi hơget dŏ kơƀah hlâo či pơkra brơi. Lơm hră pơ-ar hơmâo mơit nao pơ Anom bruă Bơwih ƀong, mơnuih mă bruă pơkă lŏn mă yua AI mơn či pơđok, pơƀut hră pơ-ar, sem lăng anŏ găl ñu, djơ̆ tơlơi phiăn hă aka, laih anun sem lăng hơdră pơsir brơi hiưm pă.

Mơ̆ng 3 blan hăng anai, AI lŏn tơnah ha amăng plĕ hơmâo mă yua ƀơi lu anih či să Tây Sơn, mơ̆ng tŭ mă hră, čih pơkra truh kơ sem lăng hră pơ-ar. Yua hnun, mah rim blan hơmâo năng ai ha rơbâo pok hră, lu biă ñu lĕ hră yua lŏn, samơ̆ să huăi ngă kaih hră hơget ôh. Ơi Võ Ngọc Thương, mơnuih sem lăng hră pơ-ar, Sang bruă ngă hră să Tây Sơn brơi thâo: “Mơ̆ng hrơi pơphun mă yua, rim anih mă bruă hơmâo laih sa AI či ngă bruă klă hloh. Mă yua AI ñu klă, djru ba tơring gơmơi lu mơta bruă, djru ba lu mơnuih mă bruă pơ să pơkra hră pơ-ar tañ ƀiă. Lơ̆m sem lăng hră pơ-ar, AI ƀuh anŏ hơget aka ƀu djŏp kiăng pơhrua. Hăng ƀing mă bruă wai lăng hră pơ-ar, tơdah hơdôm pok hră gah anom apăn bruă lăi pơdơi ƀudah ƀu ngă brơi dong tah, jing kơnang kơ AI sem lăng, pơsit glăi dong. Tơlơi anai djru ta ngă bruă tŭ yua hloh”.

Kiăng hơmâo ia rơgơi ană mơnuih pơčeh phrâo hơmâo ƀing mă bruă să Tây Sơn hăng tơring pơkŏn amăng Gia Lai mă yua kar hăng anai, mơ̆ng akŏ thun 2026, ƀing mă bruă mơ̆ng Sang bruă ngă hră hăng Anih ngă hră yua lŏn tơring čar Gia Lai gum pơčrông sai, sem lăng hăng pơkra klă tui. Khul hơmâo mă yua hơdôm rơtuh hră pơ-ar bơdjơ̆ nao bruă mă, tơlơi phiăn, tơlơi pơkă lŏn tơnah hrŏm hăng lu hră pơ-ar sit nik hơmâo ruah mă či “pơtŏp rơguăt” ia rơgơi ană mơnuih ta pơčeh phrâo.

Ơi Đặng Hữu Bình, Khua anom bruă ngă hră yua lŏn tơring čar Gia Lai brơi thâo, mă yua boh thâo anai glăk lăp djơ̆ hăng bruă kiăng ngă: “AI lŏn tơnah pơƀut pơsir dua mơta bruă prong: Sa, pơtŏng glăi djŏp mơta hră pơ-ar djơ̆ hăng glăi. Dua lĕ anŏ gêh găl, djơ̆ tơlơi phiăn mơ̆ng hră pơ-ar đah mơ̆ng hơmâo jơlan pơsir brơi tañ hloh. Biă ñu, ƀơi gong gai dua gưl, adơi ayong ngă bruă pơkă lŏn, ƀing mă bruă gah anom bruă bơwih ƀong gưl să, hơmâo mơnuih hơđăp, hơmâo mơnuih phrâo mă bruă, jing bruă pơđok, thâo hluh djŏp bruă či ngă ƀu amuñ ôh, rơngiă lu mông. Yua hơmâo AI, mông pơkra brơi hră jing tañ hloh. Tơdơi kơ mă yua pô djru bruă AI anai, mrô hră pơ-ar ngă kaih jing aset tui laih”.

Ƀu kơnong dưi djru bruă mă, khul pơkra rai boh thâo anai ăt lăp đing nao anŏ hơgŏm tơlơi pơhing, hră pơ-ar. Hră pơ-ar yua boh thâo hơmâo pơkra, djă pioh ƀơi Sang bruă Jơnum min mơnuih ƀon sang tơring čar Gia Lai, hrŏm hăng hơdră pơgang ba tơlơi pơhing ană mơnuih amăng hră pơ-ar. Truh ră anai, mă yua ia rơgơi AI lŏn tơnah mơ̆ng Gia Lai hơmâo pơsit hăng anŏ klă, anŏ hơgŏm anăn, tơlơi pơhing pô nao ngă hră.

Tơring čar pok anih pơtŏp hrăm, ba yua ia rơgơi anai ƀơi abih bang 135 boh să, phường laih anun pơkra brơi hơdôm rơbâo hră pơ-ar tañ biă; mrô hră ngă kaih hrŏ jing 1/3 kơnong kơ 3 blan ngă tui. Mơ̆ng anun, Gia Lai glăk hla tui bruă ngă djơh anai mơn či pơkra boh thâo AI pơkŏn dong pơsir hĭ bruă pơkŏn. Ơi Lê Dũng Linh, Khua Sang bruă ngă hră pơ-ar tơring čar Gia Lai brơi thâo: “Tơdơi kơ pơkra giong AI lŏn tơnah, Khua jơnum min mơnuih ƀôn sang tơring čar Gia Lai jao kơ Sang bruă ngă hră pơ-ar ngă hrŏm hăng djŏp gơnong bruă pơkra hơbô̆ bruă pơkŏn dong hrup anun mơn. Him lăng Sang bruă amra man pơdong sa anih mă bruă pơphô bruă boh thâo mrô gah bruă bơwih ƀong mơnuih mơnam. Anai jing hơbô̆ bruă kơnang kơ hră pơ-ar hăng AI djru ƀing khua git gai bruă mă, ba tơbiă hơdră wai lăng gah bơwih ƀong huă mơnuih mơnam”.

Hăng AI lŏn tơnah, Gia Lai ƀu kơnong pơjing rai sa boh thâo djru ba ƀing khua, mơnuih mă bruă đôč ôh, ăt pơjing hơdră ngă bruă phrâo. Mơ̆ng tơlơi tơnap glăk hơmâo, tơring ĕp ƀuh hơdră pơsir phrâo kơ hơdôm bruă hơđăp, djru gong gai dua gưl mă bruă hruaih, tŭ yua hăng bơwih brơi mơnuih ƀôn sang klă hloh./.