Ƀơi Sang hră kơnuk kơna čem rông pơƀut gưl sa hăng gưl dua Dục Nông, ring bruă glăk hơmâo pơkra ƀiă či giong laih. Hrŏm hăng bruă man pơdong, sang hră ăt ječ ameč ngă bruă iâu čơđai mut hrăm, pơhlom brơi sang hră dưi pơtô hrăm hlao amăng thun hrăm phrâo 2026-2027. Tui hăng akŏ bruă, Sang hră kơnuk kơna čem rông pơƀut gưl sa hăng gưl dua Dục Nông hơmâo čơkă năng ai 1.680 čô čơđai sang hră. Amăng anun rơbêh kơ 1.140 čô čơđai hơmâo pơmut mơ̆ng Sang hră gưl sa hăng gưl dua Đăk Dục; năng ai 550 čô čơđai hơmâo ruah phrâo, kiăng hrăm hră hơmâo kơnuk kơna čem rông hlao amăng sang hră.

Tơdơi kơ hơmâo jao mrô čơđai kiăng ruah pơmut, sang hră hơmâo akŏ pơdong Khul git gai črâo bruă, Khul nai ruah čơđai; ngă hrŏm hăng gong gai, khul grup hăng Khul wai lăng djŏp djuai ania mơnuih mơnam ƀơi rim boh plơi pla, ƀôn ƀut nao pôr pơthâo, lăi pơhmư̆ djŏp tơlơi djru kơ čơđai hrăm hră kơnuk kơna čem rông hlao. Ơi Trần Đức Thư, Khua sang hră Kơnuk kơna čem rông pơƀut gưl sa hăng gưl dua Dục Nông brơi thâo, truh kơ ră anai, sang hră hơmâo ruah pơhrua rơbêh 360 čô čơđai hrăm phrâo, hơmâo rơbêh 65% rơnoh pơkă. Khă hnun, yua anai jing hơbô̆ bruă năng blung a phrâo pok pơhai pơ anai, anun bruă ruah čơđai hrăm ăt tơnap mơn, yua lu mơnuih dŏ bơngơ̆t mơn kơ bruă čem rông, tơlơi dŏ dong ƀong huă hăng wai lăng ană bă: “Hlâo dih aka bu hơmâo ôh sang hră đom lăng dŏ ƀong huă đih pơdơi hlao, anun jing amĭ ama sang anŏ ƀing čơđai dŏ bơngơ̆t mơn. Sang hră ngă hrŏm hăng ping gah, gong gai ƀôn lan hyu pôr pơthâo, iâu pơthưr amĭ ama ƀing čơđai kiăng thâo hluh, đăo kơnang, hăng hơ’et pran brơi ană bă gơñu nao sang hră”.

Hrŏm hăng ruah čơđai, tơring ăt čih pơkra hơdră jao bruă kơ ƀing nai pơtô, đak mơ̆ng pơhlom bruă pơtô hrăm mơ̆ng thun hrăm blung a mơtăm. Ƀơi anăp, sang hră iâu nai pơtô hơđăp mơ̆ng Sang hră gưl sa hăng gưl dua Đăk Dục mơn; laih dong lăng glăi abih bang, kah pơpha, jao bruă, kĭ hră hăng nai pơtô jăng jai đah mơ̆ng djơ̆ hăng tơlơi kiăng ră anai.

Tui hăng ơi Trần Cao Bảo Việt, Khua jơnum min mơnuih ƀôn sang să Dục Nông, bruă man pơdong sang hră kơnuk kơna čem rông hơmâo mơnuih ƀôn sang tŭ ư soh. Mrô čơđai rơkâo hrăm pơ anai rơgao kơ hơnong pơkă lơ̆m man pơdong năng blung laih, tui anun jing pơƀuh tơlơi čang rơmang mơ̆ng amĭ ama sang anŏ ƀing čơđai hăng anih hrăm phrâo. Să ăt kiăng hơdôm anom apăn bruă kơnuk kơna pơhrua tui rơnoh ruah nai pơtô amăng thun 2026 đah mơ̆ng hơmâo djŏp nai pơtô lơ̆m sang hră sit nik mă bruă. Hăng anih đih pơdơi, hơdôm anih dŏ hơmâo pơkra rơhaih, hơmâo djŏp gơnam či yua. Kiăo tui mrô čơđai rơkâo hrăm, să amra lăi pơthâo glăi hăng anom gơgrong bruă anai sem lăng ruah thim čơđai dong tơdah ăt pơhlom tơlơi dŏ dong ƀong huă, hrăm hră tui tơlơi pơkă mơn. Ơi Trần Cao Bảo Việt, Khua jơnum min mơnuih ƀôn sang să Dục Nông brơi thâo: “Tơdơi kơ ruah čơđai, ta kiăo tui mrô čơđai hơmâo mơ̆ng rim boh sang hră, jing lăi pơthâo, rơkâo đĭ hăng Jơnum min mơnuih ƀôn sang tơring čar Quảng Ngãi laih anun rơkâo Gơnong bruă čar tơring Quảng Ngãi pơtô brơi dong đah mơ̆ng pơkiăo nao nai pơtô lăp djơ̆ amăng djŏp tơlơi hrăm. Laih dong gơmơi ăt rơkâo laih mơn Gơnong bruă čar hăng Gơnong bruă pơtô hrăm tơring čar Quảng Ngãi kơ bruă ruah dong nai pơtô amăng thun 2026, pơhrua nai kơ să Dục Nông”.

Ƀơi să Sa Loong, bruă prăp rơmet kơ sang hră kơnuk kơna čem rông pơƀut dua gưl ăt glăk hơmâo ngă ƀơi abih bang. Sang hră hơmâo prăk tuh pơ alin giăm 209 klai, him lăng ngă giong amăng rơnuč blan 7 thun anai kiăng hmao čơkă thun hrăm phrâo.

Să Sa Loong iâu pơthưr djŏp khul grup ngă hrŏm hăng sang hră pơ rim boh pơi pla, pôr pơthâo, lăi brơi neh met wa thâo anŏ gêh găl hrăm hră, ƀong huă đih pơdơi ăt kah hăng hơdră djru kơ ƀing čơđai. Ơi Xiêng Thanh Phú, Khua jơnum min mơnuih ƀôn sang să Sa Loong, tơring čar Quảng Ngãi pơsit, truh ră anai, bruă ruah čơdai hơmâo ngă giong laih tui hơnong pơkă: “Tui hăng Hră pơtrun mrô 71 mơ̆ng Ding jum kơđi čar, Ping gah hăng Jơnum min mơnuih ƀôn sang să Sa Loong pơsit, pơđĭ tui anŏ klă bruă pơtô hrăm, biă ñu anŏ apăn bruă mơ̆ng ƀing nai, jing sa amăng hơdôm bruă pơplih prong mơ̆ng rơwang thun 2025-2030. Tơring amra pơtrut kơtang bruă pơtô pơjuăt, pơtô pơhrua dong kơ ƀing nai ƀơi hơdôm tơlơi hrăm dŏ kơƀah, laih dong ruah mơnuih mă bruă apăn sa mơta bruă, djơ̆ hăng tơlơi kiăng pơplih bruă pơtô hrăm, lăp djơ̆ hăng tơlơi kiăng mơ̆ng să mơn”.

Či prăp rơmet thun hrăm phrâo 2026-2027, Jơnum min mơnuih ƀôn sang tơring čar Quảng Ngãi kĭ laih hră ruah čơđai hăng 4 boh sang hrăk kơnuk kơna čem rông pơƀut dua gưl hrăm ƀơi hơdôm boh să či guai lŏn ia hăng kơdư. Čơđai mơ̆ng anih 1 truh anih 9 hơmâo ruah tui hră čih pioh mrô puang hrăm rim thun, ƀu pơphun pơplông ôh. Ƀing dưi ruah hrăm lĕ čơđai dŏ pơ hơdôm boh să guai dêh čar hăng hơdôm boh să jê̆ giăm ƀơi anun tui hăng tơlơi pơkă.

Pă boh sang hră hơmâo jao ruah čơđai hrăm hră, anun lĕ Dục Nông, Mô Rai, Rờ Kơi, hăng Sa Loong, hăng rơbêh 5.600 čô čơđai, amăng anun giăm 1.250 čô čơđai kơnuk kơna čem rông dŏ dong ƀong huă hlao pơ sang hră. Ơi Nguyễn Ngọc Thái, Khua gơnong bruă pơtô hăng pơjuăt tơring čar Quảng Ngãi brơi thâo, hrŏm hăng pơtrut tañ man pơdong sang hră kơnuk kơna čem rông, anom bruă glăk ngă hrŏm hăng hơdôm boh tơring ngă pơgiong hĭ bruă ruah čơđai hrăm, prăp lui gơnam yua đah mơ̆ng hmao čơkă čơđai mut thun hrăm phrâo: “Gơmơi lăi pơthâo laih hăng Jơnum min mơnuih ƀôn sang tơring čar Quảng Ngãi git gai, pơtô brơi, iâu pơthưr mơnuih mă bruă, gir ngă bruă tơhrơi wơ̆t hăng mơmot mlăm mơtăm, khŏm ngă tañ giong. Gir amăng blan 8 thun 2026 anai, sem lăng glăi djŏp hră pơ-ar, rơmet rơmot hăng ba yua amăng hrơi mut thun hrăm phrâo tui hăng tơlơi pơčrâo trun mơ̆ng tơring čar”.