Să Vụ Bổn, tơring čar Dak Lăk hơmâo 8 boh sang hră djŏp gưl mơ̆ng anih muai truh kơ gưl 2. Tui hăng bruă dăp pơmut glăi, să dŏ glăi 3 boh sang hră đôč, hơmâo 2 boh sang pơƀut 2 gưl hrăm gưl sa hăng dua laih anun sa boh sang hră muai. Ơi Nguyễn Huy Hoàng, Khua jơnum min mơnuih ƀôn sang să Vụ Bổn brơi thâo, bruă anai hơmâo ngă kiăo tui phun atur sem lăng abih djŏp sang hră, mă tơlơi pơgôp hiăp mơ̆ng ping gah, khua mua djŏp sang hră hăng kiăo tui tơlơi gêh găl ƀơi rim bit anih mơn: “Amăng hrơi čih pơkra bruă či ngă, gơmơi rơkâo tơña Ping gah, khua mua djŏp sang hră laih, kiăo tui tơlơi pơmin lăng mơnuih hrăm djơ̆ phun ñu.Hăng sa boh tơring pơ kual ataih yaih, tơnap tap, hơmơi ăt pơhlom djơ̆ hăng tơlơi pơtrun mơ̆ng Ping gah, Kơnuk kơna laih anun djơ̆ hăng tơlơi hơmâo sit nik”.

Hrŏm hăng čih pơkra hơdră ngă bruă, hơdôm boh sang hră pơtrut hyu pôr pơthâo, thâo rơđah tơlơi či kiăng mơ̆ng ƀing khua, nai pơtô hăng amĭ ama sang anŏ ƀing čơđai. Hơdôm bruă bơdjơ̆ nao dăp rơmet sang hră, mơnuih ngă bruă hăng tơlơi gêh găl hrăm hră hơmâo pơčrông lăng, pơblang rơđah kiăng hơmâo abih bang mơnuih tŭ ư hlâo či ngă. Yă Võ Thị Cẩm Hoa, Khua sang hră anih muai Hoa Ban Trắng, să Dliê Ya, tơring čar Dak Lăk brơi thâo: “Gơmơi lăi pơhmư̆ tong ten laih kơ abih bang ƀing khua, nai pơtô, mơnuih mă bruă amăng sang hră: hơđong pran jua, prăp či ngă tui tơlơi pơtrun pơƀut hrŏm ngă hơbôt sang hră mơ̆ng Kơnuk kơna. Dua dong, lăi pơhmư̆ amăng grup Zalo hăng amĭ ama ƀing čơđai kiăng hơđong pran jua; mah pơmut hrŏm hai ană bă ăt dưi hrăm pơ sang hră jê̆ hloh, hiam hloh mơn”.

Bơ pơ Sang hră gưl sa Nguyễn Trãi, să Vụ Bổn, hơdôm tơlơi bơngơ̆t blung a kơ bruă dăp glăi sang hră ăt hơmâo khua mua sang hră lăi pơthâo rơđah rơđông mơn. Mơ̆ng bruă hơduah tơña, lu ƀing khua, nai pơtô hăng amĭ ama ƀing čơđai tŭ ư hăng bruă ngă anai. Ơi Trần Hải Đưòng, Khua sang hră lăi tui anai: “Anai jing tơlơi pơtrun djơ̆ biă đah mơ̆ng pơhrŏ trun sang hră anih pơtô hrăm laih anun pơđĭ tui mrô nai pơtô. Yua dah ră anai, nai pơtô đa kơƀah đa rơbêh. Kơ pran jua ngă bruă, mơ̆ng bruă hơduah tơña, jing ƀing khua, nai pơtô hăng amĭ ama sang anŏ ƀing čơđai tŭ ư soh. Mơ̆ng ƀrư̆ kiăng man pơdong sang hră hiam djơ̆ hơnong pơkă dêh čar, ăt kah hăng pơđĭ tui tơlơi rơgơi, thâo pô mơ̆ng mơnuih ƀôn sang.

Tơring čar Dak Lăk glăk hơmâo 1.267 boh sang hră kơnuk kơna pơdong. Tơdơi kơ lu tal sem lăng, hơdră ngă bruă phrâo him lăng hrŏ trun 646 boh sang hră, dưm dưm 50% mrô sang hră. Ƀơi mông ngă bruă hăng hơdôm gơnong bruă, ơi Lương Nguyễn Minh Triết, Ding kơna Ping gah, Khua ping gah tơring čar Dak Lăk kiăng bruă dăp pơmut sang hră khŏm kiăo tui tơlơi pơtrun mơ̆ng Ping gah, ngă hơôt anih wai lăng pơlir hăng pơplih glăi mơnuih mă bruă tui jơlan gah pơhrŏ trun mrô khua wai lăng sang hră, pơđĭ tui mrô nai pơtô sit nik: “Ƀing nai ngă bruă wai lăng jing trun nao pơtô dong ƀudah glăi pơ să phường ngă mơnuih wai lăng bruă pơtô hrăm pơ să phường dong. Bong kjăp mrô čơđai sang hră pơ hơdôm boh sang hră pơdong jăng jai, sang hră čơƀeng, dăp glăi anŏ apăn bruă mơ̆ng nai pơtô đah mơ̆ng dưi wai lăng, tŭ yua bruă tuh pơ alin, pơđĭ tui anŏ klă pơtô hăng hrăm. Khut ƀu bơbeč ôh kơ bruă hrăm hră mơ̆ng ƀing čơđai”.

Dăp glăi ngă hơbôt sang hră ƀơi Dak Lăk glăk hơmâo ngă kiăng aset tui sang hră, ƀing khua wai lăng, pơđĭ tui boh tŭ yua gơnam tam hăng nai pơtô, mơnuih mă bruă, samơ̆ ăt hơđong bruă hrăm hră. Bruă mă mơ̆ng gong gai, anom bruă pơtô hăng pơjuăt hrŏm hăng sang hră, glăk hơmâo abih bang khua mua, nai pơtô hăng amĭ ama ƀing čơđai tŭ ư, pơjing phun atur kjăp kiăng bruă dăp glăi sang hră hơđong, huăi bơbeč kơ bruă hrăm hră, biă ñu pơ kual ataih yaih hăng pơ guai dêh čar./.