Jua hơgor lăi pơthâo abih mông hrăm hră phrâo đut, adơi Siu Nhi, čơđai sang hră hrăm anih 8A, sang hră đôm lăm kơnuk kơna čem rông dua gưl I hăng II-Ia Puch, hrŏm ƀing gơyut dăp glăi yơh hơdrôm hră, gai čih, ok or tơbiă pơrơngiao, puăi tlao mơak tơdơi kơ abih ha mơguah hrăm hră. Hơdôm ƀing gơyut sang jĕ giăm ƀiă, glăi pơ sang anŏ huă asơi yang hrơi dong; bơ Siu Nhi hăng ƀing gơyut ñu mă anung asơi, amĭ ama ñu homâo prăp lui mơ̆ng mơguah laih anun gơñu dŏ bơhuă hrŏm, pơdơi pơdă tơguan či tlam hrăm dơ̆ng. Anai lĕ hơdră ngă jăng jai djru kơ čơđai sang hră hrăm wơ̆t tlam mơguah amăng sa hrơi, lơ̆m tơguan huă asơi amăng sang apui, sang tơnă asơi yua sang hră aka ƀu giong ôh. Hăng Siu Nhi, sang hră phrâo anai, brơi kơ ñu sa tơlơi čang rơmang hăng pơtrut pran jua gir run hloh hrăm hră:

“Mơ̆ng anai pơ klôn, kâo juăt ƀuh tơlơi hơdip hrup anai amăng tivi đôč ƀudah pơ sang hră arăng pơkŏn. Ră anai, dưi rai mut hrăm amăng sang hră prong, rơhaih hiam rô̆ djơh hăng anai, kâo mơak biă mă. Kâo amra gir run hrăm thâo, gưt hiap ƀing nai pơtô”.

Hơdôm ƀĕ phun kyâo phrâo pla tơpă glông amăng lan sang hră Ia Puch ăt hlăk bluh đĭ hla mơda, tơdŭ phrâo blung a. Kual giăm guai hơdôm thun hlâo kơ anai kret kruai đôč, ră anai ik ăk ok or jua pơhiăp, pơđok hră, adoh suang. Hrŏm hăng hơdôm ruăi sang anih dŏ, anih hrăm, ƀing mơnuih mă bruă ăt hlăk dŏ dưm truă bah amăng, pik mia ia iom hăng hơdôm tơhnal bruă tal rơnuč ƀiă giong, anih pơkra ming mơnong ƀong huă, tơnă asơi hơbai añăm hăng anih mơnơi, boh eng ao, ƀhu hnă hnơi amăng anih dŏ đôm lăm giong abih laih. Ơi Phan Thanh Tiến, Khua sang hră đôm lăm dua gưl I hăng gưl II Ia Puch brơi thâo, hơdôm črăn bruă dŏ glăi ƀiă mơ̆n samơ̆ pơdjơ̆ nao hăng rim wơ̆t mông huă ƀong, anih pit, anih dŏ rim hrơi mơ̆ng ƀing čơđai sang hră anun khom ĕp lăng tong ten, sem lăng tong hlâo kơ ba yua.

Sang hră hơmâo pơdong ƀơi anih rơhaih rơbêh 5 hektar, hăng 23 boh anih hrăm hăng ring bruă, djop brơi kơ tơlơi pơtô hrăm amăng sang hră đôm lăm hăng dŏ glăi ha klah djop brơi 700 čô čơđai sang hră. Rơngiao kơ mrô mơnuih pơsit mă bruă sit nik mơ̆ng dlông jao, tơring čar Gia lai tŭ ư brơi khua sang hră ngă hră apah mơnuih mă bruă wai pơgang sang hră, djru bruă kih rơmet sang hră hăng ƀing ngă bruă wai lăng čơđai sang hră gah rơngiao mông hrăm; laih dơ̆ng ĕp prăk blơi kamera lăng sŭ ƀơi amăng jang, jơlan mut tơbiă, amăng đang bơnga lan sang hră. Ơi Phan Thanh Tiến brơi thâo, sang hră hơmâo jŭ yap glăi, jao ƀing nai pơtô, mơnuih mă bruă čem rông, ƀing wai pơgang hăng ƀing krăp lăng čơđai sang hră gah rơngiao mông hrăm hră. Tơhnal pơkă lĕ sit ƀong huă hăng sang dŏ djop laih, hơdră git gai wai lăng, pơgang, čem rông ba čơđai sang hră hlong pơphun sa amăng plĕ:

“Mut thun hrăm phrâo, pran jua hăng tơlơi kiăng mơ̆ng ƀing čơđai sang hră hăng amĭ ama čơđai sang hră mơak soh yua hơmâo sang hră phrâo hiam rô̆. Sang hră man pơdong djơ̆ găl hăng sang hră đôm lăm kơnuk kơna čem rông hăng ha klah apah dŏ glăi tui hluai tơlơi gêh găl mơ̆ng čơđai sang hră ƀơi să. Biă mă ñu pơtô hrăm tơlơi pơmin thâo hluh gir run hrăm hră”.

Anih dŏ pơ kual ataih, sang hră đôm lăm ăt tŭ mă tơlơi djru ba mơ̆ng ƀing tơhan pơgang guai. Đại tá Đoàn Ngọc Báu, Kơ-iăng khua ping gah sang bruă khua tơhan tơring čar Gia Lai brơi thâo, sang hră đôm lăm ƀơi guai dêh čar ƀu kơnong hiam ôh, djop mơta gơnam yua mă bruă, pơtô hrăm lêng kơ phrâo soh, ngă djơ̆ tơlơi pơkă bruă pơtô hrăm čơđai dưi pơđĭ kyar hlom bom. Yua kơ anun, sang bruă khua tơhan ăt djru ba man pơdong sang hră, čih dăp mông ngă hrŏm jơnum pơtô hră, djop tơlơi kiăng thâo, găl hăng hnơr thun čơđai sang hră.

“Anai lĕ bruă mă yom biă mă. Ƀing gơmơi git gai djop puih kơđông tơhan pơgang guai dêh čar ngă adơi ayong hăng djop sang hră đôm lăm dua gưl ƀơi guai; pơphun pơtô hrăm brơi čơđai sang hră, nai pơtô thâo tơlơi pơtrun. Hơdôm gru hyu mă bruă ngă hrŏm ƀing khua mua gong gai ƀơi să, hrŏm hăng ƀing nai pơtô amăng sang hră, brơi pơhrăm tơlơi tơpă, khut khăt amăng sang hră, kiăng ƀing ană amôn čơđai sang hră dŏ dong ƀong huă djơ̆ hnơ̆ng mơ̆ng blung a phrâo mut hrăm”.

Mơ̆ng rơwang hrơi tơjuh mut hrăm thun hrăm phrâo, sa jơlan nao phrâo, pok brơi kơ ƀing nai pơtô hăng čơđai sang hră Ia Puch lu tơlơi čang rơmang. Tong krah lơ̆n mơnai glai klô giam guai dêh čar, hmư̆ ik ăk jua pơhiăp puăi tlao, hrăm hră tơ-ua đĭ rĭm hrơi, rah anah tơlơi mơak, ia rơgơi tơlơi thâo dưi pơbŭ đĭ tơlơi čang rơmang nao kơñ pơgi pok pơhư prong hloh mơ̆ng bơbung sang hră anai.