Hăng rơbêh 650 grup djru mơnuih mơnam, amăng blan 3 rơgao, hlăk ai đơ đam tơring čar Lâm Đồng hơmâo tŏ tui pran jua hur har pok pơhai ngă rơbêh 500 ring bruă hlăk ai, abih tih rơbêh 4,1 klai prăk. Amăng anun, mut hrŏm tal pơplông gum tơngan hrŏm ruh pơkra glăi sang tơ̆i phŏ, sang dŏ jang jai, hăng bruă man pơdong phrâo 12 boh sang, djru 160 hrơi mă bruă, abih tih nua ñu rơbêh 800 klăk prăk. Pơphun giăm hơdôm rơtuh tal ngă bruă amăng hrơi tơjuh mơtah, hrơi djru man pơdong plơi pla phrâo pơhưč giăm 13.500 čô hlăk ai mut hrŏm.

Laih dong, djop gưl khul hlăk ai tơring čar Lâm Đồng hơmâo pơphun 137 grup hlăk ai djru mơnuih mơnam hăng bruă “Pơtô yua boh thâo phrâo”, djru brơi giăm 10.000 čô mơnuih dưi yua boh thâo phrâo

Amai Trần Anh Tú, Khua khul hlăi ai plơi prong Đà Lạt brơi thâo, hơdôm boh than anai pơdah tong ten tơlơi gơgrong ba jơlan hlâo mơng hlăk ai amăng bruă mut hrŏm pơđĭ kyar bơwih ƀong huă mơnuih mơnam amăng ƀon lan.

“Găn rơgao hơdôm bruă mă anai, ƀing gơmơi hok mơ-ak biă mă yua hơmâo tơlơi mut hrŏm abih pran jua mơng ƀing hlăk ai. Tơlơi anai pơsit tong lĕ hlăk ai pơpŭ biă mă hơdôm tơlơi pioh glăi hăng pơ-ư ang gru grua mơng djop rơnuk. Hăng mơng rĭm bruă mă tui anun ƀing hlăk ai ăt lêng djă pioh, gir run ƀiă dong amăng bruă mă, pơhrăm pô kiăng tŏ tui gum pơgôp pơjing plơi pla lŏn ia”.

Tui ayong Trương Văn Tùng, mơnuih apăn bruă amăng khul hlăk ai tơring čar Lâm Đồng, hăng bruă pơphun pơplih pơčeh phrâo, boh tơhnal sit nik, hơdôm bruă mă ngă lar hyu kơtang amăng hlăk ai hăng mơnuih mơnam. Mơng anun, tŏ tui pran jua hur har, gơgrong mơng hlăk ai, ba glăi tơlơi pơplông dik dak hăng pơtrut kơtang ƀing ding kơna hlăk ai amăng đơ đam tơring čar:

“Amăng thun 2025, ƀing gơmơi pơsit amra pơphun ƀiă biă mă ñu 4 wŏt pơphun ngă bruă man pơdong plơi pla phrâo hăng hrơi tơjuh mơtah kiăng ngă hiưm pă dưi pơphun tui tơđar, yôm phăn. Anai lĕ hơdôm bruă mă hơmâo pơphun sui laih hăng ƀing gơmơi lêng kơ tŏ tui na nao”./.