Kiăo tui anun, rơwang 2023-2025, đơ đam tơring čar hrưn đĭ hmâo dong 186 bôh plơi djơ̆ tui tơhnal pơkă plơi pla phrâo. Ƀơi tơring glông guai dêh čar Čư̆ Prông, amăng 6 thun rơgao iâo pơhrui hmâo rơbêh kơ 600 klai prăk mơ̆ng hơdôm jơlan hơdră, rơwang bruă pioh pơhrua nao kơ bruă pơdŏng plơi pla phrâo. Plơi O Ngol, să Ia Vê lĕ sa amăng hơdôm anih anom ba gru hlâo, djơ̆ tui tơhnal pơkă plơi pla phrâo gưl tơring glông.

Ơi Siu Huỳnh – Khua git gai Ping gah ngă rah Khua plơi O Ngol brơi thâo, plơi hmâo giăm truh 120 bôh sang anô̆, hăng giăm truh 500 čô mơnuih, abih bang kah hăng djuai ania Jarai. Kơnang kơ ngă tui jơlan hơdră plơi pla phrâo anun tơlơi hơdip mơda neh wa hmâo lu pơplih hăng khom djă pioh kơjăp hơdôm tơhnal ba tơbiă.

“Plơi ƀing gơmơi ngă tui pơdŏng plơi pla phrâo, hmâo tơhnal pơkă plơi pla phrâo gưl tơring glông laih. Hăng bruă Khua git gai Ping gah ngă rah Khua plơi, kâo pơsur mơnuih ƀôn sang gir run hrưn đĭ djă pioh bôh than klă hiam mơ̆ plơi pla hmâo ngă laih. Ư-ang tơring glông ruah ngă pơphô hlâo kơ “Plơi pla phrâo ƀuh rơđah hloh”, abih bang ană plơi khom gir run ngă tui, gum pran hrŏm pơkra jơlan nao rai, pơkra war, đang sang agaih, klă hiam, rơguăt, jơlan nao rai rơhaih. Biă ñu, plơi gơmơi hmâo apui lơtrik pơčrang rơđah jơlan nao rai amăng plơi pla hăng 34 pok hnal hrĭp mă pơ-iă yang hrơi. Ƀing gơmơi mơ-ak biă hăng ư-ang, yua kơ neh wa, gơyut gơyâo pơ̆ anih pơkon rai čuă, hlơi hlơi leng kơ bơni plơi ƀing gơmơi mlăm jơlan nao rai amăng plơi bơngač rơđah hăng pơhlôm”./.