Rơnuč rơwang hrơi tơjuh ƀơi sang gru grua plơi O Ngol, să Ia Vê, tơring glông Chư Prông (tơring čar Gia Lai) hmư̆ hrơ hrek tơlơi klao mơ-ak mut hrŏm hăng jua čing hơgor. Anai lĕ mông pơtô čing hơgor hăng adôh tơlơi adôh đưm djuai ania Jarai, hăng tơlơi mut hrŏm mơng abih bang mơnuih ƀôn sang hăng ƀing rơgơi kơhnâo, ƀing tha plơi amăng să. Anai lĕ ƀing mơnuih akŏ pơjing grup tum pơƀut glăi đah kơmơi amăng plơi O Ngol hrŏm hăng bruă djă pioh gru grua yôm phara mơng djuai ania, amai Siu H’Biăo brơi thâo.

“Tơlơi adôh Jarai ăt hơmâo lu tơlơi adôh pơčeh phrâo kiăng pơpŭ ƀing tơhan kông kơtang amăng rơnuk blah wang. Pơhmutu lĕ tơlơi adôh Ơ anong met wa, tơlơi adôh Hơk kơdơ̆k-Mơ-ak hrơi pơklaih rơngai”; hơdôm tơlơi adôh pơpŭ kơ pran ngă hơkrŭ mơng ơi yă đưm hlâo adih. Sit biă ñu, hơdôm tơlơi adôh hluai tui hơdôm yŭ adôh đưm mơ̆ ƀing ơi yă adôh kiăng pơpŭ kơ wa Hô git gai ngă hơkrŭ. Bruă mă ră anai ƀu dŏ tơnap tap kar hăng hlâo adih; mơng hrơi hơmâo măi telephôn rơgơi, tơdah thâo mă yua amra ngă amuñ brơi kơ bruă mă. pơhmutu ta dưi akŏ pơjing grup ding kơna, lơm kiăng lăi pơthâo hăng pơlăi nao rai bruă mă ăt tañ mơn”.

Tha plơi Siu Jo pơ-ư ang brơi thâo: O Ngol lĕ plơi pla ngă hơkrŭ, mơnuih ƀôn sang lêng kơ gum pơgôp, đăo gơnang nao tơlơi git gai mơng Ping gah. Rơbêh 10 thun rơgao, O Ngol lêng kơ tŭ mă hră pơpŭ plơi pla gru grua gưl tơring čar. Amăng anun, yôm hloh lĕ hơdôm bruă djă pioh hăng tŏ tui hơdôm rơnoh yôm gru grua. Tha plơi Siu Jo brơi thâo:

“Kâo ƀuh hok mơ-ak biă mă yua kơ ƀing hlăk ai tŏ tui bruă hrăm jua čing hơgor hăng djă pioh gru grua mơng ơi yă pioh glăi. Kơnong amăng plơi O Ngol hơmâo 3 grup čing hơgor amăng djop hnưr: grup hlăk ai, grup čing hơgor hlăk ai hăng grup čin hơgor ƀing pơprong…hơmâo wŏt mơnuih rơgơi kơhnâo Ama Nga hăng Khua plơi ăt atông hrŏm hăng adơi ayong. Kâo lĕ tha plơi huăi bơngŏt dong tah, yua hơmâo grup čing hơgor tŏ tui, tơdơi anai tha rơma glăi pơ ơi yă hơmâo laih mơnuih atông čing hơgor, yua čing hơgor yôm phăn amăng tơlơi hơdip mơda, tơlơi ngă yang rơbang anun lĕ pioh yua amăng hrơi mơyut jôk, pơthi hăng hơdôm tơlơi ngui ngor yôm phăn amăng plơi pla lêng kơ kiăng jua čing hơgor”.

Plơi O Ngol hơmâo giăm 120 boh sang anŏ, hăng giăm 500 čô mơnuih, lu hloh lĕ djuai ania Jarai. Plơi pla hơmâo hơnong pơkă plơi pla phrâo mơng 7 thun hlâo anun. Neh met wa lêng kơ gum pơgôp pơjing tơlơi hơdip trơi pơđao, yâo mơ-ak. Sit biă ñu, bruă djă pioh hơdôm bruă tui gru grua anun lĕ čing hơgor, pĕ gông brô̆, ayun suang, adôh tơlơi adôh đưm lĕ tơlơi rơkâo ƀu kơƀah ôh amăng tơlơi hơdip mơda mơng neh met wa djuai ania Jarai. Hăng ơi Siu Huỳnh-Khua git gai Ping gah, Khua plơi O Ngol, adôh tơlơi adôh đưm hăng atông čing hơgor hơmâo ram amăng kơtăk drah.

“Tơlơi hơdip jai hrơi pơđĭ kyar tui rơnuk pơplih phrâo, ƀing khŏm kiăo tui yơh, samơ̆ kâo pô ăt gir run pơtô adôh hơdôm tơlơi adôh gru grua ngă hơkrŭ hăng tơlơi djuai ania Jarai. Hăng tơlơi gơgrong lĕ Khua git gai Ping gah ngă rah Khua plơi, kâo lêng kơ pơmĭn ngă hiưm pă pơgiong bruă mă, bruă arăng jao. Kâo lêng kơ ba gru, hơdip hiưm pă kiăng mơnuih ƀôn sang lăng nao kiăng gir run, kâo kiăng ngă bruă klă, djơ̆ tơlơi phiăn mơng anun lăi kah mơnuih ƀôn sang hmư̆ hăng ngă tui. Boh than ba glăi mơng akŏ rơwang bruă truh ră anai, plơi pla gơmơi ngă bruă hơget lêng kơ ba jơlan hlâo, sit biă ñu amăng bruă man pơdong plơi pla phrâo”.

Ơi Siu Khlo, Khua git gai Ping gah să Ia Vê, tơring glông Chư Prông brơi thâo: ngă tui tơlơi črâo trun mrô 12 mơng Khul apăn bruă Ping gah tơring čar Gia Lai kơ bruă man pơdong plơi pla phrâo amăng kual mơnuih djuai ania ƀiă, mơng rơnuč thun 2018, plơi O Ngol dưi ngă hơdôm hơnong pơkă; hăng jing sa amăng hơdôm boh plơi pla phrâo ba gru amăng tơring čar.

“Plơi O Ngolngă tui tơlơi črâo trun “Kơnuk kơna hăng mơnuih ƀôn sang gum hrŏm”, mơnuih ƀôn sang hơmâo pok jơlan tơkuh nao rai amăng plơi pla. Dua bơnah jơlan plơi pla lêng kơ hơmâo apui kơđen pơčrang rơđah yua anun huăi ƀuh klĕ dŏp, ngă rung răng amăng plơi pla. Sang dŏ agaih gong, lan sang hơmâo pơgo, pla phun kyâo mơtah mơda, amăng lăm lĕ pla kơphê, tiu…Ră anai hơmâo lu sang anŏ hơmâo man pơdong sang prong rơhaih, blơi măi mok ngă đang hmua hơmâo rơdêh kông nông, rơdêh kai, bơ rơdêh thut lêng kơ blơi rơdêh phrâo. Sit biă ñu, amăng plơi hơmâo sang jơnum plơi pla, hơmâo grup čing hơgor hăng hơdôm boh gông brô̆ djuai ania anun lĕ gông, đing trơng. Ƀing thâo ruă čing hăng neh met wa lêng kơ lăng yôm hăng djă pioh gru grua mơng djuai ania pô”.

Plơi O Ngol, să Ia Vê, tơring glông Chư Prông (tơring čar Gia Lai) ră anai lĕ sa boh plơi pla phrâo dong amăng kual mơnuih djuai ania ƀiă. Anai lĕ tơlơi ngă bơngač amăng bruă djă pioh bơngăt gru grua djuai ania amăng rơnuk phrâo anai. Hăng tơlơi gum tơngan hrŏm mơng djop anih anom, tơlơi gơgrong mơng ƀing tha plơi, mơnuih arăng đăo gơnang, hăng tơlơi tŏ tui mơng ƀing hlăk ai čơđai hơmâo pơgôp djă pioh gru grua djuai ania, laih dong pơtrut bruă man pơdong plơi pla phrâo tui jơlan gah hơđong kjăp, hiam klă hăng lu gru grua yôm phara./.