Amăng sang phrâo pơdŏng klă hiam, ơi Y Tơn, djuai ania Bơnông, ƀơi ƀon Dak Săk, să Dăk Săk, mơ-ak biă yua kơ tơlơi hơdip mơda sang anô̆ hmâo pơplih laih. Ơi Y Tơn brơi thâo, anai lĕ bôh tơhnal mơ̆ng bruă tơtlaih mơ̆ng ƀun rin kơjăp hăng tơlơi gum djru mơ̆ng gong gai plơi pla, biă ñu lĕ tơlơi gum djru abih pran jua mơ̆ng hơdôm mơnuih ping gah amăng grŭp ping gah plơi. Hơdôm thun hlâo adih, rơbêh kơ 2 ektar hmua biă ñu pla hơbơi plum, ƀu dưi rông ba sang anô̆ hơdôm čô mơnuih ƀong huă. Samơ̆ ră anai, ăt 2 ektar anai, dưi pơplih hăng kơphê, sầu riêng, bôh mit, anun sang anô̆ hmâo prăk pơhrui glăi hơđong.

“Dưi hmâo Kơnuk kơna lăng ba, dưi hmâo grŭp ping gah plơi pla pơtô brơi hăng dưi čan prăk sang prăk gah hơdră bruă anun sang anô̆ hmâo tơlơi gal pơđĭ kyar bruă ngă đang hmua. Ră anai hmâo pla laih kơphê hăng lu djuai phun bôh laih, sa dua pơhrui hmâo prăk hơđong laih, tơlơi hơdip mơda ăt đĭ hloh mơn, hmâo tơlơi gal pioh hrưn đĭ”.

Hrŏm hăng hơdôm jơlan hơdră, rơwang bruă lŏm lui rin rơpa, hơdôm ngăn rơnoh gah hơdră bruă, bruă hơdôm gưl ping gah hăng abih bang glông bruă kơđi čar pơphun bruă djru hơdôm bôh sang anô̆ hăng hơdôm hơdră ngă, hơdră mă bruă sit nik hmâo djru laih hrŏ trun rin rơpa ba glăi bôh tơhnal. Hăng sa čô mơnuih ping gah, ling tơhan hơđăp hmâo arăng đăo kơnang, kah hăng abih bang hrơi hơpă tha plơi Y Bleng, djuai ania Bơnông, ƀơi ƀon 9, să Krông Nô, ăt gum hrŏm mơn grŭp wai lăng mă pô nao čuă hơdôm bôh sang anô̆ ƀun rin amăng ƀon, lăi pơthâo nao rai tơlơi găn rơgao tơlơi hơdip mơda hăng bơwih ƀong huă ngă đang hmua. Tha plơi Y Bleng brơi thâo, lơm 5 čô mơnuih ping gah, 5 bôh sang anô̆ đĭ kyar amra gum hrŏm djru sa bôh sang anô̆ ƀun rin. Hơdôm bôh sang anô̆ ƀun rin dưi djă tơngan, črâo bruă, hmâo rah pran pơtrut gah gơnam tam, laih anun dưi pơsur pran jua pioh hrưn đĭ:

“Adơi ayong khom pơsur nao rai tơdruă, pơsur neh wa gum hrŏm hơbit, pơđĭ kyar bơwih ƀong. Ƀu djơ̆ ling tơhan hơđăp lĕ sa čô ôh, ling tơhan hơđăp lĕ khom pơsur neh wa, ăt khom hyu ĕp lăng sang anô̆ ƀun rin, na nao tui anun. Sang hlơi tơnap tap ta ăt khom đing nao pơsur tơdruă, adơi ayong pơdrŏng hmâo kông ngăn lĕ gum hrŏm djru sang anô̆ anun”.

Hơdră ƀing mơnuih ping gah djru gum sang anô̆ ƀun rin hrưn đĭ dưi pơhư prong ƀơi lu plơi pla, ƀôn ƀut gah tơring čar Dak Nông hơđăp, tơring čar Lâm Đồng phrâo. Ha rơtuh bôh sang anô̆ ƀun rin glăk dưi hmâo hơdôm khul grŭp ping gah ƀơi plơi pla, hơdôm grŭp ping gah, ƀing mơnuih ping gah ƀơi plơi pla, ƀôn lan djru pioh tañ tơtlaih mơng ƀun rin. Yă Vương Thị Hiền, Kơ-iăng Khua hơđăp Jơnum min djop djuai ania mơnuih mơnam dêh čar să Dăk Ndrung, tơring glông Dăk Song hơđăp brơi thâo, hăng tơlơi gum hrŏm mơ̆ng mơnuih ping gah ƀơi lu gưl, mơ̆ng plơi pla, să, tơring glông, hrŏm hăng tơlơi gum hrŏm mơ̆ng hơdôm bôh anom bơwih ƀong, mơnuih thâo tơngia, anun ngăn rơnoh pioh kơ rim sang anô̆ ƀun rin jing phun ñu.

“Sit nik tơlơi hơdip mơda mơnuih ƀôn sang dô̆ lu tơlơi tơnap, gơñu dô̆ kơƀah kơ lu mơta biă anun tơlơi găn rơgao ƀu hmao tui mrô mơ̆ đing nao anô̆ klă ñu. Yua kơ sa bôh sang anô̆ pô khom djru lu mơta, ƀu djơ̆ kơnong kơ djru prăk pioh gơñu tơtlaih mơ̆ng ƀun rin ôh. Kiăng bĕ ƀun rin glăi plơi pla pơsit hmâo djru laih, djru lu mơta pioh gơñu sit nik tơtlaih mơ̆ng ƀun rin”.

Ngă tui jơlan hơdră pơkă mơ̆ng lŏn ia kơ hrŏ trun ƀun rin, blan 12/2021 Ping gah tơring čar Dak Nông hơđăp mă yua Tơlơi pơtrun pơsit mrô 13 kơ bruă hrŏ trun ƀun rin rơwang 2021-2025, pơsit jơlan anăp nao truh thun 2030. Tơlơi pơtrun pơsit ba tơbiă tơhnal pơkă hrŏ trun ƀiă biă mă ñu 3% mrô sang anô̆ rim thun, hăng kual djuai ania ƀiă lĕ 5% rim thun, dlông hloh 2 wot tơhnal pơkă mơ̆ng jơlan hơdră lŏn ia. Ngă tui bruă mơ̆ng hơdôm gưl Ping gah, hơdôm khul Ping gah ƀơi plơi pla, hơdôm grŭp ping gah, hơdôm mơnuih ping gah dưi hmâo tơring čar đing nao phara ha jăn. Kơnang kơ anun, 5 thun rơgao, tơring čar Dak Nông hơđăp leng kơ ngă djơ̆ tơhnal ba tơbiă hăng hloh kơ kơčao bruă hrŏ trun ƀun rin, jing tơring čar hrŏ trun ƀun rin tañ hloh kual Dap Kơdư hăng jing sa amăng hơdôm anih anom hrŏ trun ƀun rin tañ hloh đơ đam dêh čar. Ơi Ngô Thanh Danh, Khua git gai Ping gah hơđăp tơring čar Dak Nông hơđăp brơi thâo:

“Pơhrua hơdôm ngăn rơnoh, ngă tui klă hơdôm hơdră bruă djuai ania, hơdră bruă hrŏ trun ƀun rin kơjăp, pơdŏng plơi pla, ƀôn lan tui jơlan gah pơđĭ kyar kơjăp phik. Ngă klă hơdôm jơlan hơdră pơkă mơ̆ng lŏn ia kơ pơđĭ kyar bơwih ƀong mơnuih mơnam kual djuai ania ƀiă hăng kual čư̆ siăng, đing nao ngăn rơnoh kơ pơđĭ kyar hăng ngă giong hơdră pơkă anom mă yua, sang dô̆, lŏn dô̆, lŏn ngă đang hmua”.

Tơlơi pơtrun mrô 05 thun 2021 mơ̆ng Grŭp git gai Ping gah pơsit, bruă hrŏ trun ƀun rin kơjăp lĕ hơdră pơtrun prong, yôm phăn, ha sa, hluh gah amăng ngă tui bruă pơplih phrâo, pơdŏng hăng pơđĭ kyar lŏn ia. Lơm pok pơhai ƀơi Dak Nông phrâo rơgao brơi ƀuh, tơlơi khut khăt mơ̆ng Tơlơi pơtrun pơsit mơ̆ng Ping gah truh hơdôm bruă ngă tui ƀơi plơi pla, ƀơi ƀôn lan hmâo djru laih bruă hrŏ trun ƀun rin ba glăi bôh tơhnal. Tơlơi pơplih phrâo mơ̆ng bruă git gai mơ̆ng khul grŭp Ping gah hmâo lar hyu truh laih hơdôm mơnuih ping gah hăng ba glăi bôh tơhnal sit nik amăng bruă hrŏ trun ƀun rin./.