Pơgăt rơdêh đoh wông, hơdui ba rơmok rôk tui jơlan amăng plơi tuh gŏ drong kơsu dơlar ƀlia, pơgiăng rơbêh 2000 phun anah kơphê či pla hăng 300 phun makka mơ̆ng anih blơi ƀơi đang rah anah či ba glăi pla, rŭ hĭ pơblih phun amăng đang hmua ƀu tŭ yua dơ̆ng tah, ơi Điểu Đi, ƀôn Bu Prăng 2, să giăm guai dêh čar Quảng Trực, tơring čar Lâm Đồng hok mơak biă mă. Yua hơmâo kơnuk kơna tuh pơ alin čuk pơkra jơlan rơhaih, hiam dơnar, rô nao rai gêh găl hloh. Lu ring bruă čuk pơkra jơlan glông hơmâo ngă giong laih, hơdôm hơdră djru tơlơi bơwih ƀong huă kơ mơnuih ƀôn sang hlăk pok pơhai, sang anŏ ơi Điểu Đi hăng mơnuih ƀôn sang amăng să ăt pơđĭ kyar hrŏm soh.

 “Bơni kơ ping gah, kơnuk kơna hơmâo djru ană plơi pla ră anai hơmâo asơi huă, añăm ƀong, eng ao phrâo hăng man pơdong pưk sang. Tơlơi hơdip mơda ră anai hơđong laih, anun kơnong gir run bơwih ƀong huă pơđĭ kyar bơwih ƀong huă, mơnuih ƀôn sang kơnong ngă tui djơ̆ jơlan hơdră mơ̆ng Ping gah hăng tơlơi phiăn kơnuk kơna đôč”.

Ơi Nguyễn Văn Anh, Khua jơnum min mơnuih ƀôn sang să Quảng Trực, brơi thâo,  ngă hrŏm pok pơhai lu jơlan hơdră, akŏ bruă, tơring plơi pla pơtum kơ bruă pơtô brơi ană plơi pla pơblih pơjeh phun pla, djuai hlô mơnong rôg kiăng djơ̆ găl hăng lŏn tơnah, ayuh hyiăng amăng plơi pla. Hơmâo prăk kơnuk kơna djru, laih anun hơdră ngă bruă lăp djơ̆, mơnuih ƀôn sang gir run, hrưn đĭ amăng tơring giăm guai anun yơh tañ mơ̆n pơhrŏ mrô sang anŏ ƀun rin.

“Tơring plơi pla ăt pơtô tong ten Hră pơtrun jơnum ruah khua ping gah djop gưl, kiăo tui kơ anun, pok pơhai ngă tui sa amăng plĕ, djop jơlan hơdră, akŏ bruă, kơčăo bruă tuh pơ alin laih anun pơtô lăi, jak iâu mơnuih ƀôn sang gir run mă bruă, kiăng lui rơmŏn kŏn rin. Khut khăt gir run pran jua kiăng akŏ pơdong plơi pla pơđĭ kyar, abih tơlơi ƀun rin amăng thun 2025”.

Boh tơhnal tŭ yua amăng 20 thun laih rơgao, tơdơi kơ akŏ pơdong tơring čar Dak Nông hơđăp, ơi K’Khet Atô, khua hơđăp Gơnong bruă Djuai ania hăng Tơlơi đăo brơi thâo, mơ̆ng thun 2004 truh blan 6/2025, Dak Nông dưi hơmâo gơnong dlông tuh pơ alin năng ai 2.800 klai prăk brơi 3 jơlan hơdră mơ̆ng dêh čar djru. Hrŏm hăng rơnoh prăk tơring čar djru 820 klai, lu rơnoh prăk pơ alin tuh pơ alin ba nao truh pơ khul mơnuih kiăng, ba yua djơ̆, anun hơmâo djru sit nik pơhrŏ ƀun rin tŭ yua lu.

“Hơmâo tơlơi djru mơ̆ng Ping gah, Kơnuk kơna hăng ƀing pơ ala mơnuih ƀôn sang dêh čar, pok pơhai jơlan hơdră ngă tui 3 jơlan hơdră dêh čar djru amăng kual plơi pla djuai ƀiă, čư̆ siăng. Mơnuih ƀôn sang djuai ƀiă gir run pơkơtưn mă bruă, ngă hmua pla pơjing, ming pơkra gơnam, pơtrut đuăi tơlơi tơnap tap, ƀun rin, kiăng kơ plơi pla dưi lui rơmŏn kŏn rin, tơlơi pơhing lăi tơring čar tơnap tap”.

Mơ̆ng thun 2021 truh ră anai, rim thun kual giăm guai dêh čar tơring čar Lâm Đồng, Dak Nông hlâo adih hrŏ 3% mrô sang anŏ ƀun rin hăng truh thun 2025, mrô sang anŏ ƀun rin dŏ glăi rơbêh 3%. Bruă ngă ba glăi rơnoh pơkă jing tơring čar ba jơlan hlâo amăng kual Dap Kơdư hăng dŏ amăng khul tuh pơ alin amăng dêh čar kiăng pơhrŏ ƀun rin, ƀuh rơđah tơlơi gir run hăng hơdră ngă bruă tŭ yua mơ̆ng tơring anai, amăng bruă pok pơhai jơlan hơdră mơ̆ng dêh čar pơkă, kiăng pơtrut pơđĭ kyar bơwih ƀong huă mơnuih mơnam amăng kual djuai ƀiă hăng kual čư̆ siăng.