Hơmâo akŏ pơjing mơng bruă pơmut hơdôm boh phường Tân An, Tân Thiện, Bình Tân hăng să Tân Bình mơng plơi pla La Gi (tơring čar Bình Thuận hơđăp), phường La Gi lĕ plơi prong tong krah kual ter hang ia rơsĭ amăng tơring čar Lâm Đồng, mrô mơnuih rơbêh 60.000 čô. Mrô mơnuih ƀôn sang lu, mơnuih nao ngă hră pơ-ar ăt lu mơn, samơ̆ djop bruă mă ƀơi anom bruă ngă hră pơ-ar phun phường La Gi lêng kơ pơphun hơđong, hruaih, djơ̆ pran mơnuih ƀôn sang. Ơi Tôn Thất Nhật, dŏ ƀơi phường La Gi hok mơ-ak brơi thâo:

“Mơnuih ƀôn sang tơdah kiăng hơget lêng kơ pơsir brơi tañ hloh. Kiăng ngă djơ̆ pran mơnuih ƀôn sang kâo ƀuh phường lêng kơ ngă klă. Tơdơi anai, phường kiăng tŏ tui bruă djru ngă brơi hră pơ-ar tañ kar hăng anai, anai lĕ tơlơi ngă hok mơ-ak biă”.

Ăt ƀơi kual tong krah, bruă ngă brơi ngă pơ-ar ƀơi hơdôm boh să ƀơi kual ataih, asuek, kual mơnuih djuai ania ƀiă amăng tơring čar Lâm Đồng lêng pơphun gêh gal, pơlir hruaih hăng hơdôm plang ngă hră pơ-ar dêh čar. Ơi Bùi Quốc Huân, Khua Jơnum min mơnuih ƀôn sang să Lạc Dương, tơring čar Lâm Đồng, să hơmâo rơbêh 86% mrô mơnuih lĕ djuai ania ƀiă brơi thâo, truh ră anai, să hơmâo pel ĕp glăi, kah pơpha, tĕp pơƀuh hăng lăi pơthâo 378 pok hră pơ-ar amăng plang pơhing ngă bruă čar. Djop hră pơ-ar anai lêng kơ anom bruă ha bah amăng să pơsir hĭ hơmâo tlôn lơm mơnuih ƀôn sang rơkâo.

“Amăng rơwang ngă bruă blung a ƀing gơmơi tŭ mă 51 pok hră pơ-ar, amăng anun hơmâo 17 hră pơ-ar amăng plang ngă hră pơ-ar mơng ataih, đing nao hơdôm bruă lŏn mơnai, hră akŏ sang hăng pơsit brơi. Lơm ngă brơi, mơnuih ƀôn sang nao rơkâo lăi pơthâo hơdôm tơlơi bơwih bơwang, ƀing gơmơi ăt črâo brơi mơn. Ƀing adơi ayong hơmâo tŭ mă, thâo bruă jao kiăng pơsir hĭ bruă mơng ƀing gơmơi. Măi mok, glông pơƀuh nao rai pơhlôm klă hruaih”.

Hrŏm hăng 16 anih anom mă bruă, gơnong bruă gưl tơring čar, abih bang 124 boh să, phường, kual phara amăng tơring čar Lâm Đồng lêng hơmâo pơphun ha amăng plĕ bruă ngă hră pơ-ar, mă yua hơdôm plang wai lăng hră pơ-ar phrâo, lăp djơ̆ hăng tơlơi rơkâo tŭ mă hăng ngă brơi hră pơ-ar mơnuih ƀôn sang. Tui gơnong bruă wai lăng tơring čar Lâm Đồng, dong mơng lơ 1/7, rĭm hrơi lêng kơ hơmâo rơbêh 1.000 hră pơ-ar nô̆p ƀơi anăp hăng mơng ataih ƀơi hơdôm anih anom mă bruă kiăng tơguăn pơsir hĭ. Lâm Đồng lăng anai lĕ sa  amăng 5 boh tơring čar ba jơlan hlâo đơ đam dêh čar amăng bruă tŭ mă, pơsir hĭ klă bruă ngă hră pơ-ar amăng hơdôm hrơi blung a pok pơhai gong gai ƀon lan 2 gưl./.