Rơnuč rơwang hrơi tơjuh, anih dơnao pioh hrăm luai ia Sang gru grua čơđai muai Dak Lak kơdok kơdor hloh kơ hrơi tơđar. Jua pơhiăp, puăi tlao ok or hăng jua rơdêh nao rai ik ăk, wơ̆t hăng jua ia pah pung lơ̆m hơmâo giăm 100 čô čơđai muai hok mơak nao hrăm luai ia hăng akŏ bruă “Pơhlom ƀlung ia hăng tơlơi truh ruă nuă kơ čơđai muai”. Adơi Nguyễn Phan Phương Linh, 12 thun dŏ ƀơi să Ea Knuêč hok mơak lăi:

  “Găn rơgao hăng anih hrăm luai ia anai laih anun hơmâo tơlơi pơtô kiăng thâo pơgang mă pô ƀlung ia ƀơi dơnao anai kâo mơak biă mă, kiăng ta hơđong pran jua sit trun amăng ia laih anun thâo luai ia pơgang kơ drơi jăn anăm ƀlung ia hăng djru ba gơyut gơyâo sit ƀlung ia”.

Ƀu kơnong amăng anih plơi prong đôč ôh, hrăm luai ia, pơhlom tơlơi truh hŭi ƀlung ia, dŏ pok pơhư lu anih amăng plơi pla kual ataih, tơring čar Dak Lak. Ƀơi să Ea Mdroh, amăng bơyan pơdơi prong thun anai, Khul ngă hrŏm yua kơ ƀing adơi đeh khăp ƀu-eng, amăng khul grup hlăk ai pơyơr pran jua ƀơi dêh čar pơphun amăng kual Dap Kơdư, hơmâo pok pơhai 2 tal pơtô hrăm luai ia ƀu apah prăk ôh, anih hrăm anai pơphun ƀơi plơi pla, anih hơmâo dơnao luai ia sang anŏ ƀudah plơi pla. Ayong Mai Văn Chuyền, Khua khul hyu mă bruă brơi thâo, hăng anăp kiăng pơjing dơnao ba hyu truh pơ plơi pla laih anun ƀing hlăk ai tơdăm dra djop să, ngă hrŏm ƀing hơmâo pran jua čơmah pok anih pơtô hrăm luai ia ƀu apah prăk ôh, kơ ƀing čơđai anet.

 “Anih hrăm ƀu kơnong pơhưč lu čơđai muai đôč ôh dŏ hơmâo wơ̆t tơlơi đing nao mơ̆ng ƀing amĭ ama, mut hrăm tơlơi pơtô hrăm luai ia hăng pơhlom ƀlung ia. Tơlơi thâo anai yom biă mă laih anun hmao kru djru kơ ƀing amĭ ama hăng mơnuih ƀôn sang hơmâo ană bă anet ƀơi plơi pla thâo. Ƀing gơmơi kiăng kah pơpha lu tơlơi thâo thăi hăng hơmâo tơlơi đing nao mơ̆ng ƀing amĭ ama čơđai muai wơ̆t hăng ană plơi pla gum hrŏm bruă pơhlom ƀlung ia kơ čơđai muai”.

Ƀu kơnong pơtô tơlơi thâo, prăp lui pran jua, hrăm luai ia đôč ôh, jing anih ngui ngor pơhrăm drơi jăn pran jua kiăng găng añrăng suaih pral, h’ĭn pran jua, pơtruh nao rai hơmâo gơyut gơyâo lu, pơđĭ tui tơlơi thâo bĕ hĭ anŏ ngui na nao telephôn games amăng bơyan pơdơi prong anai. Biă mă ñu, hăng kiăng ƀing čơđai muai jĕ giăm lu mơnuih tơpuôl, nai pơtô djru pơčrâo brơi tơlơi tom găn rơgao amăng tơlơi hơdip mơda, pơhưč pran jua hor kơ hrăm hră hloh. Ayong Phạm Ngọc Anh, nai pơtô tơlơi dŏ dong ƀong huă pơ să Krông Ana, tơring čar Dak Lak kah pơpha tơlơi thâo mơ̆ng ñu tui anai:

 “Hăng hnơr čơđai muai kah hăng ƀing gơñu anai kiăng ngui đôč laih anun sit mơak laih gơñu hrăm tañ biă thâo. Hlâo kơ mut hrăm, ta pơphun tơlơi ngui ngor ƀơ̆i, kiăng pơhưč pran jua ƀing gơñu, laih anun gơñu bơthâo krăn tơdruă, hơmâo gơyut gơyâo laih, ta pơphun pơtô tui yơh, Giong pơtô abih bang tơlơi kiăng thâo lu ƀiă, ta pơdah brơi hơdră bơtơpư̆ luai ia hiư̆m pă, giong anun brơi rim čô ngă tui, pơhrăm glăi hơdôm tơlơi pơtô, ngă tui djơ̆ kah pơdơi. Mơ̆ng anun ăt lăng pơten gơñu hrăm thâo tañ hơdơ̆ pă djop bruă mă ƀuh sit nik soh”.

Tui hăng tơlơi jŭ yap amăng 5 thun laih rơgao tơring čar Dak Lak hơmâo čih pioh 300 čô čơđai djai yua ƀlung ia. Kơnong mơ̆ng akŏ thun 2025 truh ră anai, ăt hơmâo lu wơ̆t cơđai djai ƀlung ia, lu biă mă ñu pơ kual plơi pla ataih. Mơ̆ng anih hrăm mơak djơh hăng anai, rim čô čơđai amra thâo yơh hơdră luai ia, prăp lui kơ pô gơñu tơlơi thâo thăi amăng bơyan pơdơi prong ngui ngor rơnuk rơnua hloh, dŏ mơak hlom bom amăng kual plơi pla ataih  lơ̆m tơring čar Dak Lak.