Tơkeng rai hăng prong đĭ ƀơi hang čroh ia Dă Rơyồng ƀơi tơkai čư̆ Brah Yàng kơdrưh kơdrom, ơi K’Brệp (75 thun) dưi hmâo mơnuih ƀôn sang Kala Kròt kiăng khăp pơpŭ ngă tha plơi. Ñu dô̆ jing mơnuih ƀôn sang mơbruă thâo mơñam bung bai gah djuai ania K’ho dong.

Hơdôm bôh rêu ro, rơ-i, čơngua mơñam bung bai hăng kram, djrao hăng tơngan ñu pơdah đĭ klă hiam biă, kơjăp hăng thâo mơñam bơnga dong. Ƀu kơnong thâo mơñam bung bai pioh mă yua amăng sang anô̆ ôh mơ̆, hơdôm mơta gơnam yua kơ ñu mơñam dưi hmâo neh wa hor biă. Thun hlâo, plơi pok anih pơtô bruă mơñam bung bai kơ djuai ania K’ho, K’Brệp ƀơi anăp pơtô glăi brơi giăm truh 100 čô mơnuih. Ñu brơi thâo:

“Drơi pô kâo mơñam djop mơta rêu ro, rơ-i, čơngua... Lơm arăng kiăng blơi thơ kâo sĭ tui hluai gơñu kiăng pioh hmâo dong prăk pơhrui glăi, pơplih ƀiă tơlơi hơdip mơda. Kiăng djă pioh bruă mơñam bung bai, ră anai, ƀơi plơi hmâo lăi pơthâo khul mơñam bung bai pioh pơlar hyu djop gơnam tam, hrăm tui tơdruă kơplah wah ƀing thâo bruă đưm kiăng mơñam rai hơdôm bôh bung bai klă hiam, djơ̆ tui tơlơi mơnuih kiăng yua, ĕp tơbiă anih pioh sĭ gơnam hăng nua ñu lăp djơ̆”.

Ƀu kơnong kơ thâo mơbruă ôh mơ̆, Tha plơi K’Brệp dô̆ jing gru ba jơlan hlâo amăng pơđĭ kyar bơwih ƀong. Jing pô blung a amăng plơi khin hơtai pơplih tơlơi pơmin bruă ngă đang hmua, ñu tuh pơplai bơwih brơi 5 ektar đang kơphê pơjeh djuai phrâo. Ră anai rim thun, sang anô̆ ñu pơhrui hmâo 12 tơn kơphê asar krô. Rơngiao kơ anun dô̆ hmâo prăk pơhrui glăi mơ̆ng sầu riêng hăng bôh ƀơr pla plah amăng đang kơphê. 2 ektar hmua ia hmâo prăk pơhrui glăi rơbêh kơ 8 tơn pơdai. Ƀuh ñu truh kih, lu sang anô̆ amăng plơi hrăm hăng ngă tui. Ơi K’Brao, ƀơi plơi Kala Kròt brơi thâo:

“Tha plơi K’Brệp lĕ mơnuih ba jơlan hlâo amăng bruă ngă đang hmua. Amăng bruă pla hăng bơwih brơi kơ phun kơphê, ñu lĕ mơnuih mă yua bôh thâo phrâo mă yua măi mok ngă đang hmua blung a kah hăng kơmok pruai, pruih jrao pơgang arong hlăt, pruih ia... Kơnang kơ anun, đang kơphê sang anô̆ ñu pơhrui glăi kơphê. Amăng bruă ngă hmua ia tui anun mơn, ñu ăt jing pô ngă hmua rơgơi anun pơdai pơhrui glăi lu biă ƀơi plơi Kala Kròt. Tha plơi lĕ sa čô mơnuih dưi hmâo neh wa pơpŭ mơ̆ng tơlơi hơdip mơda, dŏ dŏng ƀong huă truh kơ bruă bơwih ƀong huă”.

Ngă tui Jơlan hơdră pơdŏng plơi pla phrâo, tha plơi K’Brệp lĕ mơnuih blung a pĕ pha lŏn pơkra jơlan. Sang anô̆ ñu hmâo pĕ pha laih rơbêh kơ 300 met kơrê lŏn ƀơi anăp sang, pơtlaih pơnăng war, koh phun kơphê pioh pok prong jơlan amăng krah plơi. Ñu ăt pĕ pha mơn rơbêh kơ 1000 met kơrê lŏn ngă đang hmua pioh pok prong jơlan mut amăng kual ngă đang hmua. Hrăm tui nu, abih bang plơi pla gum pran hrŏm: đa pĕ pha lŏn, đa djru hrơi bruă, đa djru gơnam tam pơdŏng hơdôm ring bruă plơi pla. Ha bôh plơi hmâo gum hơgôp rơbêh kơ 600 klăk prăk pioh pơkra jơlan ƀê tông, pơdŏng pơkra anih mă ia hơdjă.

Ơi K’ Brẻo ƀơi plơi Kala Kròt brơi thâo: mơ̆ng kơnuih tha plơi mơ̆ abih bang jơlan nao rai amăng plơi pla leng kơ klă hiam, agaih klă hiam:

“Hlâo adih, jơlan nao rai amăng plơi bơyan hơjan glut hlŭ, bơyan pơ-iă ƀui hlŭ gôm lŏn adai, nao rai tơnap tap biă, biă ñu dŭ pơgiăng gơnam tam mơ̆ng đang hmua glăi pơ̆ sang. Ră anai, lơm hmâo jơlan ƀê tông agaih hiam, bruă pơgiăng kơphê, bôh ƀơr, sầu riêng gêh gal biă hăng amuñ dong, gơnam ngă rai dưi dŭ pơgiăng hăng sĭ hyu gêh gal hloh”.

Rơngiao kơ pơsur pơdŏng plơi pla phrâo, tha plơi K’Brệp dô̆ lăi pơhing klă hơdră pơtrun, hơdră bruă Kơnuk kơna; gum hrŏm pơsir tơlơi bơrơdjơ̆ bơrơsao amăng plơi pla. Ơi K’ Hữu mơnuih apăn bruă amăng să Bảo Thuận, tơring čar Lâm Đồng brơi thâo, tha plơi hmâo djru yôm phăn biă pioh plơi pla djă kơjăp tơlơi rơnuk rơnua hơđong, pơdŏng tơlơi hơdip mơda tâ̆o yâo:

“Tha plơi K’Brệp lĕ mơnuih hmâo pran đăo kơnang hăng hmâo tơlơi pơhmăi amăng plơi pla. Gah tơlơi pơsur neh wa ngă tui hơdră pơtrun pơdŏng plơi pla phrâo, ñu hmâo bôh pơhiăp, ba jơlan hlâo amăng bruă pơphun pơkra jơlan, pơdŏng anih mă ia hơdjă, kơnang kơ anun ƀô̆ mơta plơi pla jai hrơi jai klă hiam, jơlan nao rai amăng plơi pla klă hiam. Ñu dô̆ gum hrŏm amăng Khul đăo Kala hăng bruă mă khua Khul, bôh pơhiăp mơ̆ng ñu ƀơi sang jơnum amuñ dưi pôr hyu truh hăng neh wa tui đăo anun hơdră pơtrun pơdŏng Plơi pla phrâo, pơdŏng tơlơi hơdip phrâo ƀơi plơi ngă tui klă hăng ba glăi bôh tơhnal klă”.

Hăng kơnuih pô, bôh thâo hăng abih pran jua mơ̆ng pô, tha plơi K’ Brệp glăk djă pioh hăng ngă tui bruă mă đưm gah djuai ania K’ho, hăng djru ngă pơplih ƀô̆ mơta plơi pla Kala Kròt. Ñu lăp djơ̆ hăng anih kơnang pran jua, jing gru ba jơlan hlâo bơngač pioh ană tơčô hrăm tui bruă pơdŏng plơi jai hrơi jai trơi pơđao, hơđong rơnuk rơnua./.