Kiăng dưi ngă bruă anai, Dak Lak hơmâo pơtong rơđah, mơnuih ƀôn sang mrô, jing atur kơ bruă pơđĭ kyar mơnuih mơnam mrô, anun yơh pơtrut ngă tui bruă mă “Pơtô hrăm ia rơgơi mrô”, ba boh thâo ia rơgơi mrô jĕ giăm hloh hăng djop mơnuih plơi pla.

Ƀơi sang jơnum juăt sang gru grua plơi Ƀuôn Mdŭk, phường Ea Kao, tơring čar Dak Lak, hơdôm hơpluh čô mơnuih ƀôn sang djop hnơr, đing nao dŏ lăng amăng măi telephôn rơgơi, hơmâo ƀing hlăk ai tơdăm pơyơr pran jua, amăng grup mă bruă hyu pơtô ia rơgơi mrô-sơ̆n pran jua pơtô, pơčrâo ba mơnuih ƀôn sang mut čih anăn hăng anih pơmut gru VNeID. Giong pơmut pơdưm anăn, rim čô ngă mă gơñu, čih anăn, pơhaih tơlơi pơhing mơ̆ng hră pơar, pơdưm amăng gru boh thâo ia rơgơi mrô. Yă H’Mai Mlô, sa čô mơnuih ƀôn sang ƀơi ƀôn lăi:

“Hlâo kơ anai, aka ƀu hơmâo ƀing ană amôn hlăk ai pơtô brơi kâo bơngơ̆t biă mă, yua kơ ta ƀu thâo phe phô ôh, laih anun juăt wor rơbit dơ̆ng. Ră anai hơmâo čih pơbuă laih tơlơi pơhing kơ ta. Aka ƀu hruaih ôh, samơ̆ hlăk hrăm tui ƀơƀrư̆”.

Hơdôm mông hră kơ ia rơgơi mrô djơh hăng anai, jing juăt hĭ yơh ƀơi lu plơi pla, să, phường amăng tơring čar Dak Lak, yap mơ̆ng pơphun amăng 100 hrơi hrăm tui bruă ngă “Mơnuih ƀôn sang hră ia rơgơi mrô” mơ̆ng plah wah blan 7 truh ră anai. Rơbêh 2000 grup mơnuih thâo hruaih amăng gru ia rơgơi mrô dưi akŏ pơjing, đuăi hyu djop amăng plơi pla pơtô kơ ană plơi, hơmâo 3.500 čô mơnuih apăn bruă, ƀing hlăk ia pơyơr pran jua amra djru mă` bruă hyu pơpoh bah amăng sang, pơčrâo brơi yua măi telephôn rơgơi, djru mơnuih ƀôn sang ngă juăt hăng boh thâo ia rơgơi.

Ƀu kơnong dŏ glăi amăng bruă lŏm lui tơlơi ƀu thâo yua mrô, tui tơlơi thâo phun, djop grup hyu pơtô ia rơgơi mrô amăng kual plơi pla hơmâo pok anih pơtô brơi ia rơgơi mrô ƀơi sang gru grua plơi, ƀudah amăng anih pơsir bruă hră pơar kơnuk kơna să. Mơnuih ƀôn sang ba nao măi telephôn, ƀing hlăk ai pơčrâo brơi hơdră mă yua, čih anăn pơdưm amăng gru tơhnal čih tơlơi pơhing bruă čar, hơduah ĕp tơlơi pơhing lŏn sang đang hmua, duh jia amăng điện tử, tla prăk hăng điện tử huăi kiăng ba tla prăk mơta. Ayong Y Sion Knul, Khua khul hlăk tơdăm dra mut phung să Ea Na, tơring čar Dak Lak brơi thâo:

“Pơdjơ̆ nao kơ bruă pơmut glăi sang bruă, mơnuih ƀôn sang bơngơ̆t biă mă lơ̆m ngă tui hră pơar hơdră phrâo, mrô hră pơar hiư̆m pă. Ƀing gơmơi djru kơ ană plơi pla amăng djop bruă anai, mơ̆ng bruă pơmut hră pơar pioh arăng pơsir brơi, truh kơ anŏ pơmut amăng VNeID Ding jum kông an. Biă mă ñu hăng mơnuih ƀôn sang djuai ƀiă, bruă ngă anai khom pơtô ba re se, thâo hluh hruaih kah dưi, kiăng pơhrŏ ƀiă hrơi mông nao rai”.

Hrŏm hăng ƀing hlăk ai pơyơr pran jua, lu sang bruă dăng kông pơprong ăt djru hrŏm amăng bruă pok anih pơtô hrăm ia rơgơi mrô. Djop anih hrăm dưi djru ba gơnam yua, măi mok, hrĕ dăng kông, bơnah ia rơgơi AI amuñ amĕ, gêh găl kiăng mơnuih ƀôn sang ĕp lăng hăng ngă tui tañ hloh. Ơi Nguyễn Văn Thản, Kơ-iăng khua anom bruă sang dăng kông tơring čar Dak Lak kah pơpha:

“Ƀing gơmơi mơ-it nao mơnuih thâo bruă djru hrŏm grup hyu mă bruă pơtô ba ia rơgơi mrô kơ mơnuih ƀôn sang ƀơi să, plơi pla, ƀôn ƀut. Hrŏm hăng gong gai kơnuk kơna, ƀing gơmơi pơphun lu anih pơtô brơi tơlơi thâo kơ ƀing khua mua, mơnuih apăn bruă hơmâo hơdră pơtô ba kơ mơnuih ƀôn sang hăng sang bruă mơdrô. Tơhnal pơkă kiăng abih bang mơnuih lêng kơ dưi thâo ba yua atur ia rơgơi mrô amăng tơlơi hơdip mơda rim hrơi”.

Ơi Bùi Thanh Toàn, Khua Gơnong bruă Kơsem min boh thâo hăng ia rơgơi phrâo tơring čar Dak Lak, brơi thâo: 100 hrơi phun mă bruă hyu pơtô kơ mơnuih ƀôn sang hrăm ia rơgơi mrô jing yak rơbat blung pioh pơblih yua mrô jing hĭ tơlơi juăt rim hrơi mơ̆ng mơnuih ƀôn sang. Sit thâo laih pok ĕp lăng tơlơi pơhing, thâo čih pơmut, thâo ngă bruă online, djop jơlan hơdră, bruă mă bơwih brơi ngă hră pơar dưi truh tañ, djop mơnuih ƀôn sang thâo soh, ƀu hơmâo hlơi arăng lui hĭ pơ klôn ôh.

“Ƀing gơmơi hơmâo kah pơpha khul mơnuih hăng pok pơhai bruă ngă amăng 100 hrơi ngă bruă hmar. Tơhnal pơkă kiăng pơtô brơi kơ mơnuih ƀôn sang thâo hơdră pơmut anăn, ba yua ia rơgơi mrô, ƀu kơnong amăng kual giăm plơi prong ôh, truh pơ mơnuih ƀôn sang kual ataih hai ăt khom thâo. Sit juăt laih, mơnuih ƀôn sang thâo ba yua atur tơlơi rơgơi mrô bơwih brơi amăng bruă sĭ mơdrô, pơkra ming hăng pơblih nao rai tơlơi sĭ mơdrô mơ-it hră pơar amăng glông bruă čar pơsir brơi tañ biă mă”.

Mơ̆ng hơdôm mông pơtô brơi pơčrâo ba yua boh thâo ia rơgơi mrô truh pơ boh tơhnal gong gai kơnuk kơna hăng sang bruă mơdrô, bruă pơtô mơnuih ƀôn sang hrăm ia rơgơi mrô hlăk djru kơ tơlơi thâo hluh ia rơgơi phrâo ƀu ataih ôh hăng rim čô mơnuih ƀôn sang. Tơdơi kơ rim sa hrơi laih hrăm giong, ƀơi tơring čar Dak Lak hơmâo dơ̆ng lư mơnuih thâo yua ia rơgơi mrô, dưi lăi mơnuih ƀôn sang mrô, akŏ pơjing sa khul mơnuih mơnam yua mrô, mơnuih mơnam mrô, bơwih ƀong huă mrô.