Giăm truh yang hrơi dong, dua rơkơi bơnai amai Đinh Thị Lá (29 thun) ăt glăk gum hrŏm ƀing man pơdong sang, yua măi luk simăng kiăng kơ man pơdong sang phrâo. Ñu ol kơdol lăi, tơlơi hơdip amăng plơi pla mơng hlâo hơ-et kret kruai, ră anai pơplih djop mơta. Truh mơmŏt mlăm, apui rơđah bơngač djop sang anŏ, čơđai ok or hrăm pơđok boh hră, amăng plơi pla jing mơ-ak biă yơh:

“Hlâo anun blơi măi pơđuăi apui lơtrik, tơdơi anai kơnuk kơna djru pơkra glông hrĕ apui lơtrik. Ră anai thun 2025 hơmâo glông hrĕ apui lơtrik đuăi kơtang djop mơta lêng kơ klă hăng apui mă yua hơđong pơhmu hăng hơdôm thun hlâo adih”.

Ring bruă apui lơtrik brơi plơi Canh Tiến hơmâo abih tih prăk tuh pơ alin rơbêh 9 klai prăk, pơkra dong mơng blan 12/2024 hăng pơgiong amăng blan 4/2025. Tui ơi Đinh Văn Tào, Khua git gai Ping gah ngă rah Khua plơi Canh Tiến, dong mơng hrơi hơmâo apui lơtrik, plơi pla hơmâo pơplih ƀô̆ mơta laih:

“Hơmâo apui lơtrik ngă gêh gal brơi tơlơi hơdip rĭm hrơi, amăng mơmŏt mlăm, sit biă ñu lĕ ƀing čơđai hrăm hră. Hlâo adih neh met wa lêng kơ kiăng lăng tivi, hmư̆ brô̆, hơmâo apui lơtrik laih, lu sang anŏ blơi lu gơnam yua hăng hrăm tui lu tơlơi arăng pơƀuh brơi, mă yua boh thâo ia rơgơi amăng pla pơjing, rông hlô…”

Plơi Canh Tiến hơmâo 176 boh sang anŏ lĕ djuai ania Bahnar hăng Chăm. Mơng sa kual ataih ayaih, Canh Tiến glăk hơmâo tơlơi yak nao hơđong kjăp. Hrŏm hăng glông hrĕ apui lơtrik, jơlan glông ăt đing nao pơkra ming. Bruă pơyơr lŏn pok jơlan hơmâo neh met wa mut hrŏm soh. Ơi Dương Hiệp Hòa, Khua Jơnum min mơnuih ƀôn sang să Canh Vinh pơsit tong.

“Kơnuk kơna tô nao glông hrĕ apui lơtrik lĕ hơdră bruă lăp djơ̆ pran mơnuih ƀôn sang. Glông hrĕ apui lơtrik tô truh pơ hơpă pơ anun pơđĭ kyar bơwih ƀong huă. Ră anai să glăk đing nao kiăng pơjing plơi Canh Tiến jing plơi tuai čuă ngui amăng plơi pla tui tơlơi git gai amăng tơring čar kiăng ngă tui hơnong pơkă pơđĭ kyar bơwih ƀong huă mơnuih mơnam amăng ƀon lan”./.