Ơi Phạm Quốc Lựu, 70 thun dŏ ƀơi plơi Đak Tô 5, să Đak Tô nao pơ anih ngă hră pơar să, kiăng ngă hră pơar tŭ mă prăk djru kơ amĭ ñu tha rơma. Anai lĕ tal blung a ơi Lưụ nao ngă hră pơar ƀơi anih ngă hră pơar sa bah amăng.

          “Rai pơ anai ƀing apăn bruă djru brơi abih djop tơlơi kiăng thâo, kiăng hơgĕt arăng pơtô brơi. Ƀing apăn bruă ră anai, hlăk ai beč bal, hmar soh, dưi ruah djơ̆ mơnuih, mă bruă klă. Kâo čang rơmang ƀing anai tơdơi adih amra jing ƀing ngă bruă phun amăng sang bruă kơnuk kơna să Đak Tô”.

          Ngă tui hơbô̆ bruă gong gai kơnuk kơna dua gưl, să Đak Tô hơmâo pơdưm djop laih mơnuih mă bruă, pơpha bruă mă rơđah rơđong tong ten kơ rim čô mơnuih laih anun pok pơhai lu boh yom phun amăng bruă mă. Ƀing khua mua prăp lui, pơtruh nao rai hăng djop anom bruă kiăng djru pơtô ba, anun yơh bruă ngă lăng abih bang lĕ hruaih.

 Kơ pơblih yua mrô, tơdơi kơ pơmut glăi, glông bruă tơlơi pơhing hrĕ dăng kông hơđăp, ƀu mă yua dơ̆ng tah, ƀing apăn bruă khom ngă juăt hăng bơnah čih anăn pơsir bruă phrâo juăt lăi phần mềm “Bơnah ia rơgơi rơ-un” phrâo, hnang blung dŏ sư̆ rơbư̆. Mah aka ƀu hơmâo mơnuih hruaih sa bruă ôh, khul grup mơnuih apăn bruă ƀơi sang bruă pơsir hră pơar mơnuih ƀôn sang, gơñu hrăm mă pô, tơña ba tơdruă či mă bruă, kiăng pơhlom bruă mă hruaih laih anun tŭ mă hră pơar hăng mơ-it amăng online hơđong. Ră anai, 100% mơta hră pơar pơsir bruă amăng să dưi pơsir hăng tla glăi djơ̆ hrơi blan pơkă. Ơi Mai Huy Hưng, Kơ-iăng khua Jơnum min mơnuih ƀôn sang să Đak Tô brơi thâo, khua mua apăn bruă gir run găn rơgao hĭ tơlơi tơnap tap, lu wơ̆t mă bruă tơl krah mlam ăt gir ngă giong mơ̆n, kiăng djơ̆ mông jao:

          “Mă bruă kah hăng ƀu hơmâo hrơi năm, hrơi tơjuh ôh. Ƀơi anŏ ƀing adơi ayong khom mă bruă tơl truh 10 mông mlam, ăt dŏ kơsem min, hrăm tui, tơña rah mă bruă tui hăng hlơi thâo pơtô glăi kơ ƀing gơ̆p mă bruă. Djop mơta bruă ba yua mrô hăng tơlơi thâo anun, kiăng pơkă bruă mă tơlơi hur har kơ ƀing apăn bruă thâo, gir hrăm mă pô, pok pơhai djop boh yom phun tui tơlơi git gai”.

          Tơdơi kơ 4 blan mă bruă, să Đak Rve, tơring čar Quảng Ngãi hơmâo lu bruă biă mă, bruă phrâo hơmâo, lơ̆m anun tơlơi thâo pơsir amăng bruă mă lu khua mua, mơnuih apăn bruă aka ƀu bơkơnar ôh. Mơ̆ng anun yơh, să hơmâo ngă hră rơkâo tơring čar djru, mơ-it mơnuih thâo bruă gah tơlơi pơhing ia rơgơi, bruă ia jrao, pơtô hrăm…..Ră anai, ƀing khua mua apăn bruă amăng să Đak Rve juăt pơtruh nao rai hăng djop gơnong bruă ƀơi tơring čar, kiăng djru ba amăng bruă mă. Yua kơ anun, lu bruă hlâo adih kơƀah mơnuih mă bruă dưi kơjăp laih, ƀu hơmâo dơ̆ng tah ngă kaih hĭ ƀudah lui soh ƀu pơsir.

          Ơi Huỳnh Ngọc Phong, Khua jơnum min mơnuih ƀôn sang să Đak Rve, tơring čar Quảng Ngãi brơi thâo, djop mơta gơnam yua, hrĕ dăng kông ƀơi lu plơi pla aka ƀu bơkơnar ôh, anun yơh bruă ngă hrŏm, pơčrong sai dŏ kaih. Kiăng pơsir hĭ tơlơi anai, să hơmâo iâu pơthưr brơi hrăm mă pô, kơsem min, pơđĭ tui tơlơi thâo amăng bruă mă kơ ƀing khua mua, mơnuih apăn bruă:

          “Pơtrut kơtang bruă ba yua boh thâo ia rơgơi pioh pơsir bruă mă, kiăng tañ thâo tơlơi pơhing amăng plơi tañ hloh, lir hơbit hăng tơlơi gơgrong ba kơ ƀing khua plơi, khua ƀôn. Yom hloh lĕ pơtrut pơsur pran jua ƀing ngă khua, mơnuih apăn bruă hor hơduah ĕp mă, hrăm tŭ kiăng kơ thâo, pơsir bruă mă bơwih brơi kơ mơnuih ƀôn sang. Kâo hơmâo pơtrun hiăp kơ abih bang adơi ayong apăn bruă ngă khua amăng să, djop khua anom bruă khom ngă tui djơ̆ “5 mơta hruaih” pioh pel ĕp, krăp lăng hăng pơtrut ngă bruă”.

Tui hăng tơlơi jŭ yap amăng Glông tơlơi pơhing pôr pơthâo hơdră pơsir hră pơar kơ mơnuih ƀôn sang tơring čar Quảng Ngãi thun blan laih rơgao, mrô hră pơar ƀơi să, phường, anih gong gai phara hơjăn gah kơ bruă pơkă lŏn tơnah, wai pơgang anih dŏ jum dar-ayuh hyiăng, prăk kăk amăng djop plơi pla, să djơ̆ jơlan rơdêh đuăi hmar, jơlan rơdêh treng Quảng Ngãi, jơlan či pok prong mơ̆ng Quảng Ngãi nao pơ Bơ Y, jơlan ter hang ia rơsĭ  Dung Quất-Sa Huỳnh….laih dơ̆ng pơhrăm glăi, pơtô brơi online hăng ƀơi anăp mơta kơ khua mua gưl să hrăm. Ơi Nguyễn Hoàng Giang, Khua Jơnum min mơnuih ƀôn sang tơring čar Quảng Ngãi lăi pơtong, ƀing khua mua tơring čar ngă hrŏm, djru kơ djop plơi pla amăng bruă pơblih yua mrô kiăng bơwih brơi kơ mơnuih ƀôn sang klă hloh.

          “Ƀing gơmơi krăp lăng tong ten bruă mă gong gai dua gưl, kiăng hmao pơsir hĭ tơlơi tơnap, pơsir tơlơi gun. Rĭm khua apăn bruă phun hăng ƀing ding kơna ping gah tơring čar, khom wai lăng sa ƀudah dua boh să, lăi pơthâo hăng gưl tơring čar re se. Kiăng kơ gong gai dua gưl mă bruă hruaih na nao, biă mă ñu pok pơhai bruă mă online, jơnum mơ̆ng ataih, pơƀuh ƀô̆ mơta amăng tivi, lir hơbit pơtruh brơi hăng mơnuih ƀôn sang laih anun sang bruă mơdrô”.