Adai  mơguah ƀơi hang rơsĭ Nha Trang, lăng tơdron čuah ter hang tơbung kô̆ puh hăng kơñĭ ƀhač glăi kah tơđar pơƀuh brơi anŏ hiam ñu phiăn hơmâo mơ̆nh hơđăp. Lăng sa grup, sa grup khul tuai rơbat hyu ngui, čơkă angin pưh ƀhưt mơ̆ng ia rơsĭ  rơ-ơ̆ rơ-iŏm, ƀô̆ mơta djop pô lăng bơngač pĕ tlao pơrơhĕ. Hơdôm ƀĕ adŭ ƀơi bơbung hơmâo pik ia iom hêm ham ƀrê ƀra arăng pơdưm ƀơi ter hang pioh tuai dŏ pơdơi tơ-ui yang hrơi dong, jua pơhiăp ƀing čơđai đuăi hyu pơphul tơdruă mơak biă mă, jua ia ia rơsĭ tơdlăk puh yă pung pang bơkơnar kah hăng jua suă pran đĭ trun hơdip glăi tơdơi kơ tal hơjan hlim, ia ling dăo ngă.

Ơi Trần Văn Tân dŏ ƀơi phường Nha Trang brơi thâo, kơnong hơdôm hrơi hlâo kơ anun, anih anai lăng pơrơkă pơrơkưng than kyâo, akha phun kyâo ia kor ba, wơ̆t djah djâo kơdung kơsu, pông rơdêh mơ̆ng ia krông Cái kor plĕ nao pơ anai. Phun kyâo joh, akha phun boh đung bơrơbuh, than krô, gêt čai kơsu, gơnam yua mă akan hơdang ia lip kor pơđoh ba tom hlŭ dơlut, hñip hñap, mrơ̆k khiơ̆k biă mă, pơƀut jing sa glông djah ataih hơdôm rơwang km ƀơ̆i. Hơdôm rơtuh čô mơnuih mă bruă ngă kông ñơn rơnăk anih dŏ jum dar, hrŏm hăng hơdôm sang bruă mơdrô ba tuai hyu ngui laih anun ƀing tơhan djop sang bruă kơnuk kơna pơdjru hrŏm mă bruă, duñ pơƀut, kuăi djah mă bruă amăng hrơi mlam pơblih nao rai pơdơi pơdă. Ơi Tân ƀuh mơak pran jua mơ̆n, yua tơdơi kơ kơthel, hơjan hlim laih anun ia ling dăo ngă, pran jua ană mơnuih tuh rơyuh rơmet anih dŏ, tơlơi hơdip mơda jum dar, ia rơsĭ jing jơngeh rơgoh hơdjă, hiam mơak glăi kah hăng tơđar, pơtrut pran jua ană mơnuih hur har, wơ̆t mơnuih ƀôn sang hăng tuai hnun mơ̆n:

 “Rĭm čô pơgôp hrŏm sa bruă, tơngan djru ba, mơnuih dêh čar tač rơngiao ăt ngă bruă hrŏm mơ̆n hyu duñ djah djâo. Kơnong 2-3 hrơi đôč rơmet rơgoh abih djah ter hang ia rơsĭ. Ră anai lăng jơlah ia rơsĭ ăt jơngeh hleč hrup hlâo. Ră anai ƀuh tui anun mơak biă mă”.

Ƀu kơnong rơmet ter hang amăng ia rơsĭ đôč ôh, anom bruă čơkă tuai tơring čar Khánh Hòa amăng hơdôm hrơi hơjan ia ling dăo ăt tuh rơyuh abih pran jua yua kơ kual mơnuih ƀôn sang dŏ. Hơdôm hơpluh boh kanô, rơdêh đĭ amăng ia, song nan anet prong mơ̆ng sang bruă mơdrô, ba nao pơtum djru ba mơnuih ƀôn sang amăng kual ia lip. Lơ̆m ia hrŏ, djop sang hră ăt nao djru hơtŭk riă, tơnă hơbai brơi asơi añăm kơ mơnuih ƀôn sang, hyu pơpha hơdôm hơpluh rơbâo anung mơnong ƀong huă, asơi añăm, braih akuăi, sum ao, kiăng pơhlom brơi kơ mơnuih ƀôn sang dŏ kơđông sa anih ƀu thâo tơbiă hyu ia guang dar hĭ laih anun pơhlom tơlơi rơnuk rơnua kơ mơnuih ƀôn sang hai.

 Truh ră anai, abih bang djop sang bruă ba tuai hyu ngui ter hang ia krông Cái hơmâo pok bah amăng čơkă tuai hyu ngui glăi tơdơi kơ hơdôm hrơi pơdơi hĭ. Ơi Nguyễn Văn Hòa, Khua Gơnong bruă Gru grua-Pơrơguăt drơi jăn hăng Tuai čuă ngui tơring čar Khánh Hòa brơi thâo:

 “Tuai rơnguai hyu ngui, pơdơi pơdă, dưi đuăi hyu lu tui laih. Gah anom bruă gru grua ăt jak iâu, djru kơ djop sang bruă tuh pơ alin pok pơhư prong pơkra gơnam sĭ mơdrô hăng hơdră pơhưč tuai hyu ngui phrâo. Anom bruă gru grua amra pơphun lu bruă mă gưl jar kmar kiăng pơhưč ƀing tuai nao pơ tơring čar Khánh Hòa amăng bơyan rơnuč thun”.

Ơi Nghiêm Xuân Thành, Khua git gai ping gah tơring čar Khánh Hòa, brơi thâo: Tuai hyu ngui lu biă mă tui rơnoh pơkă amăng bruă bơwih brơi anŏ ngui ngor ƀong mơñum, hyu ngui mơ̆ng tơring čar, dưi lăng kah hăng “Măi hơdui ba wông rơdêh” djru rŭ glăi tơlơi bơwih ƀong huă hmar ƀiă. Ñu git gai tui anai:

 “Adai pơđiă hiam laih, tuai hlăk rai ngui. Yua kơ anun, kiăng pơphun tañ pok pơhai pơtrut bruă tuai hyu ngui rơnuk rơnua hơđong. Anom bruă čơkă tuai amra pơdjơ̆ nao anom bruă mơdrô, pơkra ming gơnam sĭ mơdrô, pơdjơ̆ nao pohrui prăk kăk kơ kơnuk kơna, pơsir bruă mă, anun yơh anom bruă čơkă tuai hyu ngui lĕ khom ngă tañ mơtam yơh”.