Jơnum sang čơ ƀơi să kual čư̆ siăng Tu Mơ Rông, tơring čar Quảng Ngãi (hlâo adih lĕ tơring glông Tu Mơ Rông, tơring čar Kon Tum) ƀu djơ̆ kơnong lĕ anih sĭ mơdrô đôč ôh mơ̆ ăt jing anih pơbưp nao rai mơnuih djuai ania Sêdang ƀơi kual čư̆ siăng kriang pơtâo, pơgôp ngă pơplih tơlơi juăt amăng ngă hmua hơdai nao hơbô̆ bruă ngă hmua hơdjă. Jơnum sang čơ hơmâo pơphun tui tơđar rĭm blan ha wŏt, pơhưč jai hrơi lu mơnuih ƀôn sang mut hrŏm. Tơdơi kơ 3 tal pơphun, jơnum sang čơ Tu Mơ Rông jing hơbô̆ bruă ba jơlan hlâo, pơjing rai anih sĭ mơdrô klă, djru brơi mơnuih djuai ania Sêdang pơplih tơlơi pơmĭn amăng ngă hmua. Amai Y Khương dŏ amăng plơi Ngọc Leng, să Tu Mơ Rông brơi thâo.

“Jơnum sang čơ tal 1 neh met wa ăt dŏ mlâo, ba gơnam nao sĭ ƀu hŭi  hơmâo mơnuih blơi. Hơmâo kơnong 6, 7 boh sang anŏ đôč ba nao sĭ. Lơm anun hơmâo sang boh sang anŏ sĭ pơhrui glăi 300 rơbâo prăk, anun glăi lăi pơthâo brơi hơdôm boh sang anŏ pơkŏn dong. Tal dua, tal tlâo lu tui yơh, să hơmâo djru brơi hơdôm anih dưm pơdă gơnam, anun neh met wa hok mơ-ak biă mă”.

Jơnum sang čơ să Tu Mơ Rông hơmâo pok mơng lơ 20/8/2025 amăng đơ đam kual lŏn giăm 1 ektar, hơmâo kual sang dŏ sĭ hrŏm prong 500 met karê hăng hơdôm ring bruă pioh yua pơkŏn, abih tih prăk tuh pơ alin man pơdong rơbêh 4 klai prăk yua Jơnum min mơnuih ƀôn sang tơring glông Tu Mơ Rông, tơring čar Kon Tum (hơđăp) tuh pơ alin. Tŏ tui bruă anai, gong gai să Tu Mơ Rông hơmâo pok pơhai hơbô̆ bruă “Jơnum sang čơ 0 prăk hăng yua prăk blơi”, ngă gêh gal kiăng mơnuih ƀôn sang sĭ mơdrô, pơplih nao rai gơnam tam.

Tui ơi Dương Đăng Khoa, kơ-iăng khua Jơnum min mơnuih ƀôn sang să Tu Mơ Rông, tơlơi yôm hloh mơng hơbô̆ bruă “sang čơ 0 prăk hăng yua prăk blơi” lĕ kiăng djru brơi mơnuih mơnam rah, kiăng pơtrut bơwih ƀong huă. “0 prăk” lĕ hơdôm mơnong ƀong huă, sum ao yua să jak iâu djru brơi mơñg mơnuih mơnam kiăng kơ ƀơk brơi mơnuih ƀôn sang. Bơ “blơi hăng prăk” lĕ gơnam đang hmua, kyâo jrao mơng neh met wa hơmâo mơnuih ƀôn sang, anom bơwih ƀong sĭ mơdrô hăng anom bơwih ƀong hrŏm blơi glăi kiăng pơsur ngă hmua. Hơdôm tal jơnum sang čơ pơphun tui tơđar amăng lơ 20 rĭm blan, pơlir hăng hơdôm tơlơi ngui ngor,  hrơi pioh hơdor anun lĕ bơyan ngui blan bơrơmi, hrơi pơpŭ đah kơmơi Việt Nam 20/10 ƀudah pơ anăp anai lĕ Hrơi hơdor tơngia nai pơtô Việt Nam lơ 20/11. Ơi Dương Đăng Khoa brơi thâo, pơ anăp anai, să Tu Mơ Rông him lăng pơphun lu tui jơnum sang čơ rĭm blan đĭ dua wŏt.

“Pơplih tơlơi pơmĭn, tơlơi juăt mơng neh met wa ăt ƀu amuñ lơi, yua anun ƀing ta kiăng ngă ƀơƀrư̆, jao brơi ƀing apăn bruă pơtô pơblang, djru brơi neh met wa ba gơnam tam nao sĭ mơdrô. Gơnam “0 prăk” amra hrŏ tui ƀơƀrư̆, bơ gơnam đang hmua hăng phun kyâo jrao “blơi hăng prăk” amra lu tui”.

Đơ đam tơring čar Quảng Ngãi ră anai hơmâo 181 boh sang čơ, 3 anih sĭ mơdrô gơnam, 12 boh sang sĭ mơdrô pơprong. Ƀơi hơdôm kual čư̆ siăng hăng giăm guai, rĭm boh să hơmâo 2 boh sang čơ. Bruă pơkra ming sang čơ ngă gêh gal brơi bruă blơi pơhrui gơnam tam mơng ƀon lan. Lu gơnam yôm mơng kual, sit biă ñu lĕ kyâo jrao mơng neh met wa djuai ania ƀiă hơmâo blơi pơhrui ƀơi hơdôm boh sang čơ hăng anih anom sĭ mơdrô, pơgôp pơtrut pơđĭ kyar bơwih ƀong huă ƀon lan, hơđong tơlơi hơdip mơnuih ƀôn sang./.