Ƀơi hơdôm blah đang hmua či kơdư ter tơkai čư̆, ƀuh đang boh kruăi dung klĭ mơtah hmua đang pơprong biă mă, ƀhư ƀhưt angin pưh nao, boh brung brăng djơ̆ bơyan hăng rơnoh thun anai hơđong đôč. Him lăng khul tuai hyu ngui amăng bơyan mơak lơ 2/9 pơdơi pơdă ngă yang prong mơ̆ng lŏn ia, arăng nao pơ Khánh Hòa đĭ lu, pok brơi anŏ gêh găl prong blơi boh troh đang hmua ƀu kơnong boh kruăi dung đôč ôh, dŏ hơmâo lu mơta boh troh pơkŏn amăng kual čư̆ siăng anai, djru pơthâo brơi akŏ pơjing ruăi pơdă, ngă hrŏm sĭ mơdrô hrŏm kơñ pơgi. Ơi Đoàn Văn Hưởng, Khua anom ngă hrŏm ngă hmua pla pơjing Khánh Hòa, să Khánh Vĩnh, tơring čar Khánh Hòa brơi thâo:

“Thun anai, mơ̆ng akŏ bơyan mơtam, truh ră anai adai bơyan gêh găl biă mă. Hơjan rơnang phang mơak, hnun phun pla boh troh kyâo pơtâo đĭ hiam. Bơyan ƀong têt ngă yang thun phrâo thun anai, ră anai phun boh troh hlăk bơyan wai lăng klă prăp lui, ƀuh phun pla hiam soh. Mông jơnum ngă yang mơak prong gêh găl pôr pơthâo kơ lu mơnuih ƀuh boh troh mơnuih ƀôn sang ngă hmua, biă mă ñu boh kruăi dŭng, pơphun djơ̆ mông pơdơi pơdă hyu ngui lu mơnuih ĕp lăng. Him lăng lơ 2/9, anom ngă hrŏm hơmâo djop boh troh ba pơdah thâo kơ anih sĭ mơdrô kiăng blơi”.

Boh kruăi dŭng klĭ mơtah Khánh Vĩnh ră anai ƀu kơnong sĭ ƀơi sang sĭ mơdrô phun đôč ôh, hơmâo lu sang bruă sĭ mơdrô blơi mă, pơkra ia jâo mơ̆ng boh kruăi dŭng, mă sơ̆l črek noh kruăi pơkhăng rơ-ot hĭ. Lu mơnuih ngă bruă sĭ mơdrô lăi, anai lĕ gêh găl yak nao ba djop mơta boh troh đang hmua jing gơnam OCOP phara mơ̆ng kual čư̆ siăng. Yă Nguyễn Thị Ngân, Khua kông ty sĭ mơdrô boh troh hăng gơnam đang hmua ba nao pơ dêh čar tač rơngiao Ngân Nguyễn lăi:

“Lơ̆m boh troh anŏ hiam djơ̆ tơhnal pơkă pơkă OCOP laih, jing ngă djơ̆ hơdră pla pơjing rơgoh hơdjă, huăi ba yua kmơ̆k jrao lĕ lu sang bruă sĭ mơdrô hăng anih blơi sĭ raih daih nao ĕp yơh kah hăng sang bruă gơmơi anai. Gơñu ĕp boh troh gơnam či blơi khom thâo tong ten anih pla, ba sĭ mơdrô rơđah rơđong, gơnam sĭ mơdrô boh troh hơdjă rơgoh blơi djơ̆ rơnoh yom hăng kĭ hră pơar ngă hrŏm sui thun. Bơhmutu gơnam sĭ mơdrô boh troh đang hmua arăng pơkra ming ia jâo, ia jrao pik mơ̆gn boh kruăi dŭng, sơl hăng črek boh kruăi pơđăm rơ-ot, ƀudah hơtŭk ngă če rơtă sĭ ƀong hlăk hơmâo lu mơnuih đing nao biă mă”.

Lơ̆m hrơi mông tơring čar Khánh Hòa pok pơhư prong anih pla yua hơmâo pơmut hrŏm dua tơring čar hăng Ninh Thuận, lu mơta gơnam đang hmua ƀơi kual čư̆ siăng hơmâo dơ̆ng yơh anŏ gêh găl ba sĭ mơdrô, boh nik ñu pơdah thâo amăng mông jơnum ngui ngor, ngă yang mơak lu mơnuih pơtum, mông ƀing tuai hyu ngui ĕp lăng. Lu biă mă tuai sit nao pơ dơnung kual Tong krah đing nao kơ boh troh đang hmua, lăng anun sa črăn hyu ĕp lăng, dŏ glăi amăng đang hmua mơnuih ƀôn sang. Nai prin tha Đặng Qúy Nhân, Sang bruă ĕp lăng bruă mă ƀơi plơi mơ̆ng Gơnong dlông, Ding jum Ngă hmua hăng Ayuh hyiăng lŏn glai adai rơhuông lăi:

“Lu plơi pla, tơring čar kiăng djă kơjăp anŏ gêh găl mơ̆ng hlâo, hơmâo gơnam tam phara hơjăn plơi pla pô. Kiăng pơđĭ kyar hơđong hă, khom hơmâo jơlan hơdră akŏ pơdong anih ngă hmua pla pơjing hơđong, hơmâo anăn, anih pla lăi pơthâo rơđah laih anun pơčrâo tong ten anih pla. Lơ̆m anun kah, djop sang bruă mơdrô hăng anom ngă hrŏm amra djru pơjing rai gơnam sĭ mơdrô hơđong sui thun pơ anăp, pơđĭ tui rơnoh sĭ mơdrô hăng pơhrui glăi kơ mơnuih ngă hmua. Bruă ngă hrŏm sĭ mơdrô gơnam OCOP kiăng sĭ kơ ƀing tuai nao ngui blơi, ăt kiăng đing nao mơ̆n”.

Thun blan laih rơgao, yua Jơlan hơdră tơhnal pơkă mơ̆ng dêh čar tuh pơ alin pơđĭ kyar bơwih ƀong huă-mơnuih mơnam kual djuai ƀiă hăng čư̆ siăng, tơring čar Khánh Hòa hơmâo djru ba hơdôm boh sang bruă ngă hrŏm tuh pơ alin man pơdong sang măi pơkra ming, djă pioh, răk lui sui hrơi blan hloh, pơtô brơi čih anăn lăi pơthâo kual, tơring pla, kiăng ngă giong tui jơlan hơdră brơi pơthâo hơdră ngă hmua pla pơjing phrâo.

Hơdôm hơbô̆ bruă lông ngă lăng hlâo, brơi ƀing tuai mut hyu ĕp lăng đang hmua hăng dŏ glăi amăng plơi pla hơmâo ba glăi boh tŭ yua blung a kơ mơnuih ƀôn sang pơhrui mă prăk kăk apah. Ơi Nguyễn Ngọc Sơn, Kơ-iăng khua Gơnong bruă Djuai ania hăng Tơlơi đăo tơring čar Khánh Hòa brơi thâo:

“ Ră anai, ƀơi kual čư̆ siăng tơring čar Khánh Hòa, mơnuih ƀôn sang thâo pơblih hơdră ngă hmua mơ̆ng tơlơi juăt ngă hơđăp, pơblih ba yua boh thâo ia rơgơi phrâo, kiăng bruă pla pơjing boh lu hloh, hlô mơnong rông hai lar djuai. Samơ̆, ƀing ta khom sơ̆n pran jua djru pơtô hrăm, pơčrâo brơi mơnuih ƀôn sang thâo hluh ngă hiư̆m pă pơphun bruă mă, sĭ mơdrô, pơčeh phrâo. Sit thâo rơđah laih tơlơi anun, gơñu pơphun bruă mă pơčeh phrâo mơ̆ng tơlơi pơmin laih anun pơđĭ kyar hơbô̆ gơñu tơdơi anai”.

Tui anun yơh, tơdah pơblih mơ̆ng tơlơi pơmin juăt ngă hơđăp ngă bruă raih daih aƀiă mơnuih, jing hĭ tơlơi pơmin phara pơgôp hrŏm sĭ mơdrô, ba nao gơnam pơ anih sĭ mơdrô prong, sit mơ̆n gơnam đang hmua djơ̆ anăn OCOP mơ̆ng kual čư̆ siăng Khánh Hòa amra dưi jing pran pơtrut kơtang, ngă tui hơđong kơjăp amăng rơnuk pok prong anih pơđĭ kyar hăng rŭ glăi bruă tuai hyu ngui kah hăng ră anai.