Jơnum ngui sang čơ OCOP kual Ngŏ Kơdư dik dăk hăng rơbêh kơ 250 čơgăn gơnam, pơdă sĭ hơdôm gơnam OCOP hăng gơnam mă mơ̆ng đang hmua, akan hơdang mơ̆ng tơring čar Quảng Ninh hăng lu tơring čar, ƀôn prong amăng đơ đam dêh čar. Hăt kơ rơbat dar hơdôm čơgăn gơnam, amai Mai Chi, brơi thâo:

“Rim sa wot jơnum ngui sang čơ pok tơbiă kâo ƀuh klă, anăn păn gru rup jai hrơi jai pơplih phrâo, hơdôm mơta gơnam jai hrơi jai lu mơta, lu čơgăn gơnam klă pơhlôm hloh”.

Hrŏm hăng tơlơi pơmin hăng amai Mai Chi, ayong Lê Thế Trung, brơi thâo: ră anai amăng hơdôm anih sĭ mơdrô gơnam prong leng kơ hmâo jơlan hơdră, čơgăn gơnam tam, anih pơdă gơnam tam OCOP, mơ̆ng añăm pơtăm, hơbơi pơtơi, bôh troh hơdjă, gơnam ƀong truh gơnam kiăng yua lu leng kơ hmâo phun akha, anih anom rơđah rơđông dưi pơčrang QR..., anun mơnuih blơi yua hơđong pran jua ruah mă:

“Hlâo adih, mơ̆ng gơnam ƀong kiăng hloh truh hơdôm gơnam ƀŏng pơkra hăng măi mok, sang kâo juăt blơi gơnam mơ̆ng tač rơngiao. Ră anai ƀơi anih anom sĭ mơdrô hmâo gơnam OCOP gơnam pla pơkra amăng lŏn ia yua kơ nua ñu lăp djơ̆, anô̆ klă jai hrơi jai dưi pơplih klă hăng anih anom gơnam pla pơkra rơđah anun kâo ruah blơi. Biă ñu hơdôm gơnam kiăng yua hloh hơđong pran jua blơi yua pioh djru tơlơi hơdip mơda sang anô̆”.

Dong mơ̆ng hrơi pơphun bruă pơsur mơnuih Việt Nam đing nao blơi yua gơnam Việt Nam, truh ră anai, gơnam OCOP hmâo ngă pơhưč mơnuih blơi hăng hơdră gir run pơplih klă gơnam, anăn păn. Gơnam OCOP hmâo ƀuh ƀô̆ laih ƀơi abih bang hơdôm bôh sang sĭ gơnam tam  anet prong hăng hơdôm bôh anih anom sĭ mơdrô gêh gal. Pơđĭ kyar gơnam OCOP ƀu kơnong kơ pơđĭ klă gơnam, anăn păn, anih pơkra gơnam ôh mơ̆, ñŭ dô̆ djru brơi rim mơnuih ƀôn sang, sang anô̆ sĭ mơdrô gơnam hmâo dong bôh thâo, bruă gơgrong pioh kơ rim gơnam ba hyu sĭ. Mơ̆ng anun pơplih tơlơi pơmin ngă đang hmua hơdai nao pơmin kơ gơnam sĭ mơdrô, mut hrŏm hăng rŏng lŏn tơnah.

Anom mă bruă hrŏm Măng Đen Forest, tơring glông Kon Plông, tơring čar Kon Tum lĕ sa bơhmutu ñu rơđah hloh kơ pơđĭ rơnoh gơnam OCOP, akô̆ pơjing anăn păn gơnam phara ha jăn ƀơi anai. Rim thun, anom mă bruă hrŏm pơkra rai rơbêh kơ 100 tơn kơphê Arabica. 5 djuai gơnam kơphê pơkra pơkon hmâo tŭ yap OCOP mơ̆ng 3 truh kơ 4 asar bôh pơtŭ ăt glăk klă mơn ƀơi anih anom sĭ mơdrô amăng lŏn ia. Ayong Lê Nhật Tiến, Kơ-iăng Khua Anom mă bruă hrŏm, brơi thâo:

“Bruă ngă rai gơnam OCOP anô̆ klă ñu hă djru Anom mă bruă hrŏm thâo pơsit jơlan gah gơnam tam mơ̆ng blung a truh kơ anih anom pơdă sĭ pioh ngă hiưm hơpă gơnam klă hiam, hơdjă hloh. Rơngiao kơ 25 ektar mơ̆ng Anom mă bruă hrŏm glăk pla phrâo hăng bơwih brơi lĕ, ƀing gơmơi glăk pok prong kual pla, ƀơi anăp lĕ kĭ pơkôl hră pơ-ar hăng rim sang anô̆ pơkôl anih sĭ gơnam kơ mơnuih ngă đang hmua”.

Yă Lê Thùy Kim Loan, Khua Sang bruă Pyloherb, anom hmâo 15 mơta anăn gơnam OCOP mơ̆ng tơring čar Kon Tum gah phun jrao, brơi thâo:

“OCOP lĕ anăn mơ̆ng gơnam hmâo tơhnal phara ha jăn mơ̆ng kual dlông biă. Ta kiăo tui anăn OCOP ta amra hmâo gơnam mơ̆ng pô hmâo gru phara ha jăn laih. Kơnong kơ tem OCOP mơ̆ dưi pơsit ƀơi tơring čar hmâo gru pơđom pioh gơnam phara ha jăn laih”.

Tui hăng Nai prin tha Nguyễn Ngọc Tuyên, Khua Anom kơsem min bruă bơwih ƀong hăng wai lăng kual Dap Kơdư, lơm hmâo tŭ yap OCOP anun lĕ hmâo pơjing laih anăn păn hăng mơnuih blơi yua hmâo thâo truh. Yua anun, hơdôm bôh anom bơwih ƀong khom ƀu pơdơi pơplih tơlơi pơmin ngă rai gơnam tam hăng sĭ gơnam amăng rơnuk phrâo:

“Bruă hlă asar bôh pơtŭ kơ gơnam OCOP kơnong kơ hră pơ-ar ba hyu ƀu djơ̆ anăn păn ôh mơ̆, anăn ñu khom jing tơlơi đăo kơnang mơ̆ng mơnuih blơi yua. Lơm hmâo hră ba hyu khom nao hrŏm hăng lăi pơhưč anô̆ klă gơnam kiăng pơtŏng sit anăn păn mơ̆ng pô, lŏm anun gơnam mơ̆ng đĭ rơnoh. Rơngiao kơ anun, mă yua klă tơhnal gal măi mok pioh ngă klă amăng rơwang ră anai”.

Bôh tơhnal ba glăi mơ̆ng jơlan hơdră OCOP hmâo djru rŭ tơgŭ tơhnal gal, anô̆ tŭ yua hơdôm gơnam mơ̆ng plơi pla, djru dăp glăi bruă đang hmua nao hrŏm hăng pơđĭ kyar măi mok hăng tuai čuă lăng plơi pla. Tơlơi đăo kơnang mơ̆ng mơnuih blơi yua pioh kơ gơnam OCOP Việt brơi ƀuh hơdôm gơnam Việt jai hrơi jai hmâo anih dŏng ƀơi anih pơdă sĭ gơnam amăng lŏn ia, djru pơtrut bơwih ƀong đĭ kyar./.