Ngă tui Jơlan hơdră man pơdong plơi pla phrâo, Ping gah să Tà Nung pơsit anai jing bruă kơđi čar yôm, pơtrut đĭ kyar bơwih ƀong huă - mơnuih mơnam. Amăng anun, bruă pơtô kjăp tơlơi pơmin kơđi čar hơmâo pơphun ngă djŏp anih, hơmâo tơlơi pơmin djơ̆ hrŏm wơ̆t hăng bruă mă mơ̆ng ƀing khua, mơnuih ping gah hăng abih bang mơnuih ƀôn sang gum ngă djŏp hơnong pơkă plơi pla phrâo.

Rơngiao kơ anun, să Tà Nung hơmâo tum pơƀut abih bang tơlơi hơmâo či tuh pơ alin man pơkra anih anom. Truh ră anai, jơlan nao rai amăng plơi mơak, abih bang jơlan hơmâo man hăng bê tông, djru bruă nao rai hăng pơgiăng gơnam amuñ hloh. Hơdôm ring bruă man pơkra bơnư̆ kŏng ia hơmâo ngă klă, pơhlôm hơmâo djŏp ia pruih, phun pla mơboh lu. Laih dong, sang hră, sang ia jrao, sang gru grua ăt hơmâo man pơkra mơn, djơ̆ tui tơlơi kiăng jơnum, hrăm hră hăng lăng ba tơlơi suaih pral mơnuih ƀôn sang.

Amăng bruă bơwih ƀong, să pơsur mơnuih ƀôn sang pơplih djuai phun pla, hlô rông tui jơlan pơkra gơnam ba sĭ, mă yua boh thâo ia rơgơi amăng bruă pơkra gơnam. Thun 2024, prăk pơhrui yap tui akŏ mơnuih mơ̆ng să hơmâo 60 klăk prăk. Biă ñu, hơbô̆ bruă ngă hmua hăng boh thâo măi mok rơgơi pơlir hăng bơwih brơi tuai hyu ngui amăng plơi pla ba glăi boh tŭ yua biă, djru brơi lu mơnuih amăng plơi hơmâo bruă mă hơđong.

Hrŏm hăng đĭ kyar bơwih ƀong, să ăt lăng yôm mơn bruă djă pioh, pơtrut tui gru grua hiam djŏp djuai ania. Lu bruă gru grua, adoh suang hơmâo pơphun ngă na nao, kiăng mơnuih ƀôn sang pơbưp ngui ngor. Hơdôm bruă “Abih bang mơnuih gum hrŏm akŏ pơdong tơlơi hơdip hiam”, “Mơnuih ngă hmua pơkra gơnam, sĭ mơdrô rơgơi”, “5 ƀu dưi, 3 hơdjă, 5 ƀu hơmâo 3 hơmâo” hơmâo pok pơhai ƀơi djŏp anih, djru akŏ pơdong tơlơi hơdip hiam, pơplih tui rơnuk phrâo.

Hơdôm hơdră djru mơnuih ƀôn sang hơdip mơda hơmâo ngă tŭ yua, pơhlôm brơi abih bang hơmâo mă yua ia jrao, pơtô hrăm hăng djru bơwih ƀong. Ră anai să Tà Nung ƀu hơmâo dong tah sang anŏ rin. Mrô mơnuih blơi hră pơhlôm nua ia jrao hơmâo 97%. Abih bang ƀing čơđai amăng thun pơkă lêng kơ nao sang hră, bruă pơtô hrăm jai hrơi klă tui...

Tui hăng ơi Kră Jăn Ha Diệp, Kơ-iăng khua ping gah să Tà Nung, hơdôm boh than hơmâo ngă pơsit brơi tơlơi gir run ƀu pơdơi pơdă mơ̆ng abih bang anom bruă čar hăng mơnuih ƀôn sang. Kiăng djă pioh hăng pơtrut tui hơdôm boh than hơmâo ngă amăng man pơdong plơi pla phrâo, să pơđĭ tui tơlơi gơgrong bruă mơ̆ng ping gah, gong gai, jơnum min djŏp djuai ania hăng hơdôm khul grup kơđi čar - mơnuih mơnam, biă ñu lĕ tơlơi gơgrong mơ̆ng ană plơi. Djŏp tơlơi pơtrun mơ̆ng ngŏ khŏm hơmâo lăi pơthâo dlăm, djŏp anih, kiăng abih bang mơnuih tŭ ư.

Hrŏm hăng pơtrut bơwih ƀong huă ngă hmua hơđong kjăp, plơi pla lăng ba hloh bruă pơhưč anom bơwih ƀong tuh pơ alin. Tà Nung ăt iâu pơthưr hơmâo tơlơi gum djru đah mơ̆ng tuh pơ alin man pơkra anih anom, gơñăm nao pơgang ayuh hyiăng anih hơdip, akŏ pơjing anih anom amăng plơi pla rơđah - mơtah - agaih - hiam.

Hăng tơlơi gum ngă mơ̆ng abih bang anom bruă čar hăng mơnuih ƀôn sang, să Tà Nung glăk ngă giong hơnong pơkă plơi pla phrâo pơplih hloh hăng plơi pla phrâo ngă gru. Tơlơi gơñăm nao prong hloh lĕ pơđĭ tui tơlơi hơdip kơ mơnuih ƀôn sang, pơhlôm đĭ kyar hơđong kjăp./.