Mơ̆ng plah wah blan 4, hơdôm anih đih pơdơi hăng rơbêh 2.000 anih đih ƀơi tơring kual Măng Đen, tơring glông Kon Plong, tơring čar Kon Tum hơmâo ƀing tuai rơkâo hlâo laih, abih anih laih amăng hrơi pơdơi prong lơ 30/4 hăng lơ 1/5. Amăng hrơi mông bruă čuă ngui Măng Đen glăk dik dăk, tơnap ƀiă mơ̆ng hơdor glăi hlâo kơ anun, kual lŏn 7 boh dơnao 3 drai ia anai ƀu hơmâo hơget ôh, lêng kơ pum rum, hơmâo jơlan nao rai anet, hơmâo aruai, plôm kĕ đôč. Găn rơgao hrơi blan tơnap tap blung a Măng Đen jai hrơi pơƀuh anăn hmư̆ hing jing sa anih brơi ƀing tuai hyu sem lăng anih anom kual Dap Kơdư. Ơi Nguyễn Xuân Hùng, sa čô tuai mơ̆ng plơi prong jưh jom Hà Nội hok kơdok lơ̆m pơwơ̆t glăi pơ Măng Đen:“Kâo nao pơ Măng Đen lu wơ̆t laih sem lăng anih anom, mơnŏng ƀong huă pơ anai. Măng Đen rơ-un kar hăng sa čô dra 18 thun mơtăm noh, či čơkă ƀing tơdăm mơ̆ng djŏp tơring tơrang rai pơ anai hyu lăng anih anom hiam mơ̆ng Măng Đen anai. Sa thun khŏm gir rai pơ anai 2,3 wơ̆t kiăng mơ-ak hrŏm hăng gơyut gơyâo pơ kual Măng Đen anai”.

Klâo thun giăm  anai, tuai hyu ngui Măng Đen - Kon Tum lêng kơ đĭ lu biă, rim thun čơkă hơdôm rơtuh rơbâo čô tuai nao ngui. Ƀing tuh pơ alin bơwih ƀong ăt kah hăng ƀing tuai drông găn mơai mơtăm pơ kual lŏn anai, lăng anai jing tơlơi gêh gal pơtrut kiăng Măng Đen pơplih rim hrơi.

Kiăng ngă pơhưč kơ Măng Đen ƀơi hră lơkak anih anom hyu ngui, amăng hơdôm thun rơgao, tơring čar Kon Tum pơƀut tuh pơ alin man pơkra anih anom, jơlan nao rai, tơlơi hơmâo, mơnuih mă bruă hăng pơtrut pơƀuh hyu, pôr pơhing, pơtruh nao rai anih čuă ngui amăng dêh čar wơ̆t hăng čar rơngiao. Ơi Đặng Đình Toán, Khua anom bruă Gru grua, Boh thâo hăng Pôr pơhing tơring glông Kon Plong brơi thâo, hăng jơlan đĭ kyar tuai hyu ngui kjăp pơlir hăng pơgang hăng pơtrut tui anŏ yôm gru grua boh thâo đưm mơ̆ng djuai ania ƀiă pơ anai, tơring glông amăng ƀrư̆ man pơdong anih anom, gơnam yua bơwih brơi ƀing tuai:“Truh ră anai gơmơi hơmâo rơbêh 142 anih đih pơdơi. Sit mơnuih djuai ƀiă pơ anai thâo mơneč mă tơlơi hơmâo mơ̆ng sang anŏ gơñu, sang dŏ mơ̆ng ƀing gơñu mơ̆ng anun bơwih ƀong bơwih brơi ƀing tuai hyu ngui. Kơ bruă bơwih bơwang, gơnam sĭ kơtuai hyu ngui, gơmơi gơñăm nao gơnam ngă hmua hơdjă, mă yua boh thâo măi mok phrâo, gơnam djă gru grua đưm, kah hăng sang čơ Măng Đen, Kual bơwih ƀong mlăm, Đang boh thâo gru hiam Măng Đen. Gơnam bơwih brơi kơ ƀong tuai mơ̆ gơmơi kiăng ngă lĕ hyu čuă ngui pơđing gah ayuh hyiăng glai klô”.

Hrŏm hăng pơtrut tui tơlơi hơmâo, kual lŏn 7 boh dơnao 3 hơdrai ia hing ang đưm adih hăng anih čuă ngui Măng Đen Kon Plong hrơi anai glăk dong ƀơi anăp tơlơi gêh gal hăng lông lăng lơ̆m hrưn nao pơ ia rơsĭ, lơ̆m tơring čar Quảng Ngãi hăng Kon Tum mut hrŏm.

Phrâo rơgao, khua mua 2 boh tơring čar Quảng Ngãi hăng Kon Tum hơmâo ruah Măng Đen či pơphun hrơi mă bruă blung a pơčrông sai bruă pơmut hrŏm tơring čar. amăng lu tơlơi hơmâo lăi nao jing bruă pơkra glăi jơlan prang mrô 24 hăng pơtrut tuh pơ alin man pơkra jơlan rơdêh đuăi hmar hơmâo 2 boh tơring lăng djơ̆ hrŏm biă. Ơi Bùi Viết Hà, Khua khul tuai čuă ngui Măng Đen, brơi thâo, anai jing tơlơi gêh gal biă mă kiăng anih hyu ngui glai hăng ia rơsĭ pơhưč lu tuai:“Gong gai dêh čar brơi pơmut hrŏm tơring čar Quảng Ngãi - Kon Tum, gơmơi jing mơnuih bơwih brơi ƀing tuai ƀơi Măng Đen hok mơak biă mă yơh. Măng Đen jing kual dong tong krah. Măng Đen jing anih tuai hyu ngui phrâo mơ̆ng tơring čar yua hnun gơmơi pơmin amra đĭ kyar. Mơnuih ngă bruă bơwih brơi kơ tuai hyu ngui khŏm prăp rơmet hlâo, prăp hlâo tuh pơ alin mơ̆ng pran jua truh kơ prăk kăk đah mơ̆ng pơplih ƀô̆ adung mơta pơ anai. Khul tuai hyu ngui gơmơi ăt pơmin nao hơdră ngă bruă rơđah rơđông mơn kiăng kiăo hmao tơlơi pơplih phrâo mơ̆ng kual lŏn anai”.

Mơ̆ng kual lŏn pum rum tơdơi kơ blah ngă, Măng Đen - Kon Plong hrơi anai buh ao phrâo laih, sa tơlơi pơplih rơnuk rơnua, jê̆ giăm hăng hơmâo pran jua. Hơdôm glông jơlan ƀơi kual lŏn 7 boh dơnao 3 hơdrai ia ră anai dik dak mơnuih nao rai drông găn. Mơ̆ng tơlơi pơtrun pơmut hrŏm dua boh tơring čar Quảng Ngãi hăng Kon Tum, Măng Đen-Kon Plong glăk gêh gal či hrưn đĭ ataih pơ ia rơsĭ, pơsit tơlơi hmư̆ hing ƀơi hră lơkak anih čuă ngui amăng kual wơ̆t hăng ƀơi jar kmar./.