Yă Ngô Thị Kim Xuyến, dŏ amăng ƀut plơi 1, tơring kual Quảng Phú, tơring glông Čư̆ Mgar brơi thâo:

“Kâo hok mơ-ak biă mă, pran jua mơ-ak hơdôm hrơi anai yơh ngă pit đih ƀuh suk ôh. Kâo bơni kơ Ping gah, kơnuk kơna hăng tơhan kông ang hơmâo man pơdong brơi sang anŏ gơmơi sa boh sang phrâo, kâo bơni biă mă”.

Bơ amai H’En Niê dŏ amăng ƀuôn Kmiên, să Ea Drông, plơi prong Buôn Hồ ol kơdol brơi thâo amăng hrơi pơphun man pơdong sang phrâo:

“Pran jua ol kơdol ƀu thâo pơhiăp him hơpă lơi, tơlơi anai yôm biă mă, hơmâo sang dŏ phrâo kiăng sang anŏ gơmơi hơmâo anih dŏ sir kjăp. Tơdơi anai dua rơkơi bơnai amra gir run bơwih ƀong, gir run kiăng pơđĭ kyar bơwih ƀong huă”.

Hơdôm boh sang anai amăng akŏ bruă man pơdong phrâo 4.285 boh sang djru brơi sang anŏ ƀun rin, giăm ƀun rin amăng tơring čar Dak Lak (arăng juăt iâu lĕ akŏ bruă 214) yua kông ang tơring čar git gai, pơphun dong mơng akŏ blan 3 thun anai. Tui anun, hăng abih tih prăk mă yua giăm 343 klai prăk, rĭm boh sang man pơdong phrâo arăng djru brơi 80 klăk prăk, amăng anun 60 klăk prăk mơng ngăn rơnoh gơnong glông hăng 20 klăk prăk mơng ngăn drăp tơring čar. Hrŏm hăng anun, akŏ bruă ăt djru pơkra ming 1.120 boh sang hăng rơnoh prăk djru 30 klăk prăk rĭm boh sang.

Tơdơi kơ ha mơkrah blan pok pơhai, hơmâo laih 1.026 boh sang amăng akŏ bruă mrô 214 hơmâo man pơdong, him lăng pơgiong amăng blan 4 pơ anăp. Thiếu tướng Lê Vinh Quy, Khua kông ang tơring čar Dak Lak brơi thâo, tơdơi kơ pơđut hĭ bruă mă kông ang gưl tơring glông, tơring čar jao brơi kông ang să, tơring kual pok pơhai hăng hơnong pơkă gir run man pơdong giong 4.285 boh sang amăng 5 blan ha mơkrah.

“Gir run pơgiong amăng lơ 15/8/2025. Ƀing gơmơi ăt hơmâo pok pơhai tơl ƀing khua mua kông ang 180 boh să, phường kiăng ƀing gơñu pơphô bruă brơi gưl Ping gah, gong gai ƀon lan hăng pơpha mơnuih mă bruă hrŏm hăng ƀing apăn bruă gưl Ping gah, gong gai ƀon lan, gir run djru brơi neh met wa man pơdong hơdôm ring bruă anai pơhlôm djơ̆ hrơi mông, bruă man pơdong hăng brơi klă hloh”.

Hrŏm hăng akŏ bruă 214 yua kông ang tơring čar git gai, ƀơi tơring čar Dak Lak hơmâo 3 akŏ bruă phara glăk ngă tui hăng hơnong pơkă man pơdong 3.027 boh sang djru brơi sang anŏ tui hơdră djru, mơnuih djru hơkrŭ, sang anŏ ƀun rin, giăm ƀun rin. Hơdôm akŏ bruă anai hơmâo kah pơpha ngăn rơnoh brơi ƀon lan pok pơhai. Ơi Nguyễn Hải Đông, Khua git gai Ping gah tơring glông Krông Buk brơi thâo, tơring glông gir run amra pơgiong bruă man pơdong hăng pơkra ming 141 boh sang anŏ akŏ bơyan hơjan anai:

“Ƀing gơmơi ba tơbiă hơnong pơkă man pơdong hăng pơkra ming giong abih bang hlâo kơ lơ 15/7 pơ anăp. Ƀing gơmơi git gai khut khăt djop anih anom, gơnong bruă, hơdôm anom bơwih ƀong sĭ mơdrô kah hăng djop ƀôn lan đing nai kiăng ƀing gơmơi pơgiong tañ ƀiă pơhmu hăng tơlơi pơkă mơng tơring čar hăng sa, dua boh ƀon lan anăp nao tal hơdor glăi tơlơi dưi mơng tal tơgŭ hơkrŭ blan 8”.

Hăng tơlơi gir run, gum tơngan hrŏm mơng anih anom kơđi čar ƀơi Dak Lak, hơdôm boh sang sir kjăp glăk pơplih hĭ sang tơ̆i phŏ. Hơdôm boh sang phrâo amra pơtrut pơsur kiăng hơdôm boh sang anŏ găn rơgao tơnap tap, đăo gơnang nao hơdră bruă, tơlơi črâo trun mơng Ping gah hăng kơnuk kơna, gir run hrưn đĭ amăng tơlơi hơdip mơda./.