Să Dạ Chais, tơring glông Lạc Dương, tơring čar Lâm Đồng, ataih mơ̆ng plơi prong Đà Lạt năng ai 60km, tui jơlan prong 27C anăp nao gah ia rơsĭ. Tơhan hơđăp Kơ Să Ha Tam, 83 thun, djuai ania k’ho ƀơi plơi Tu Poh, să Dạ Chais, brơi thâo, lu mơnuih amăng plơi djai drơi pô pơ kual lŏn anai, laih anun hơmâo čih anăn pơ Gong kut tơhan tơring glông. Ñu ol kơdol ră ruai glăi thun hlăk ai ñu hơmâo lu tơlơi tơnap tap glêh glar lơ̆m gum djru čem rông ba ƀing khua mua, ling tơhan, ngă pô pơtruh hiăp brơi hăng pơgiăng phao kơtuang ba nao pơ anih pơblah:“Ta tơnă asơi khŏm tơnă klă, khŏm dŏ lăng apui, ƀu brơi hơmâo asăp apui ôh, tơdah hơmâo asăp apui lĕ rơdêh por ayăt ƀuh hăng pơnah mơtăm yơh, ta tơnă asơi rông tơhan tui anun yơh. Kâo ngă pô pơtruh, pơčrâo brơi jơlan kơ ling tơhan lơ̆m glăk 18, 19 thun đôč, bơ nao ngă tơhan pơgiăng hyu phao kơtuang lĕ lơ̆m 20 thun. Lơ̆m glăk ngă hlăk ai kơsung bruă, hŭi biă mă ñu lĕ lơ̆m bưp B52 plĕ boh ƀom tơraih djŏp anih. Ƀiă tra či djai hlao amăng mông anun yơh, lơ̆m anun bưp rơdêh por plĕ boh ƀom ngă kơ 7 čô mơnuih amăng grup djai”.

Pơ-ư pơ-ang kơ rơnuk glăk tơdăm gum blah ayăt pơklaih rơngai plơi pla lŏn ia, tơhan hơđăp K’Dĩnh, 82 thun, djuai ania K’ho, să Lộc Nam, tơring glông Bảo Lâm, tơring čar Lâm Đồng, lăi tơlơi djai drơi mơ̆ng rơnuk ơi yă đưm glăk djru lŏn ia ta jai hrơi hiam:“Mơnuih ƀôn sang gum ngă hơkrŭ, pơgôp braih rông tơhan. Rim boh sang kơpŏt braih pioh amăng ƀưh, arăng iâu ƀưh braih rông tơhan. Pran jua mơ̆ng mơnuih ƀôn sang tui anun yơh truh kơ hrơi pơklaih rơngai mơtăm. Mơ̆ng hrơi lŏn ia ta rơnuk rơnua, tơlơi hơdip mơnuih ƀôn sang pơplih tui mơn, hơđong kjăp, gir bơwih ƀong. Ră anai jơlan nao rai mơak baih, ană plơi hăng Kơnuk kơna gum ngă, gum pơkra, Kơnuk kơna brơi prăk man pơkra jơlan hiam, agaih, jai hrơi hiam hloh. lăi biă, ană plơi mông anai pơƀut bơwih ƀong ngă pơdrong đôč yơh”.

50 thun tơdơi kơ hrơi pơklaih rơngai, hơdôm kual mơnuih ƀôn sang djuai ƀiă mơ̆ng tơring čar Lâm Đồng pơplih lu laih. Ơi Bon Yô Soan, Kơ-iăng khua Jơnum min djŏp mơnuih mơnam Việt Nam tơring čar Lâm Đồng brơi thâo, ră anai mrô sang anŏ rin amăng tơring čar dŏ glăi yŭ kơ 2%, amăng anun mrô sang anŏ rin djuai ania ƀiă yŭ kơ 5,5%. Pơtrut pran jua gum pơgôp, neh met wa djŏp djuai ania glăk gum hrŏm akŏ pơdong lŏn ia jai hrơi pơdrong sah:“Ră anai mơnuih ƀôn sang thâo laih pơplih djuai phun pla hlô rông, thâo mă yua măi mok boh thâo phrâo ngă hmua pla pơjing. Kâo pơmin amăng hrơi blan pơ anăp amra hơmâo pơplih klă hloh hăng tơlơi hơdip mơnuih ƀôn sang mơ̆ng tơring Lâm Đồng lăi hrŏm, mơnuih ƀôn sang djuai ƀiă hnun mơn”.

Ha mơkrah rơnuk thun rơgao, hơdôm kual lŏn bă kơ boh pơtuh boh ƀom đưm adih jing să plơi pla phrâo đĭ kyar laih. Neh met wa djŏp djuai ania ƀơi Lâm Đồng glăk đăo kơnang hrŏm hăng lŏn ia mut amăng rơwang đĭ kyar phrâo./.