Rơdêh por akŏ blan 3 plĕ trun pơ tơdron rơdêh por Buôn Ma Thuột pơgiăng ba ƀing tuai mơ̆ng ƀôn prong Hồ Chí Minh. Amăng mrô anai, hơmâo wơ̆t mơnuih Việt Nam dŏ pơ čar rơngiao juăt glăi čuă Buôn Ma Thuột, anih hơdip mơ̆ng anet kah hăng yă Thu Mai. Yă Mai lăi, phrâo pơpĕ đuăi mơ̆ng tơdron rơdêh por, nao pơ jơlan tơkuh Đam San - Nguyễn Lương Bằng - Võ Nguyên Giáp, kual lŏn să Hà Thắng, ñu sol ngol mơn yua pơ anai pơplih tañ đơi:“Kơnong kơ hơdôm thun đôč, hơdôm thun hlâo adih kâo nao lan anai kâo lăng ƀu djơ̆ tui anai ôh rŏ dah. Mông hơne pơwơ̆t glăi lăng hling đôč, yua dah pơplih tañ đơi”.

Amăng lu tơlơi pơplih mơ̆ng Buôn Ma Thuột, pơplih rơđah hloh lĕ pơ tơdron rơdêh por  Buôn Ma Thuột. 50 thun hlâo, mah pơ anai hơmâo anăn tơdron rơdêh por Hòa Bình, samơ̆ lêng kơ rok hlang, pum rum, hrĕ kuăt, hrĕ pơdơi, anih hơmâo boh pơtuh, boh rơnăt, lu anih dưm phao kơnong, jing sa amăng 2 anih pơblah kơtang hloh lơ 10 blan 3 thun 1975. Samơ̆ ră anai pơ kual anai jing anih man pơkra jơlan yôm phun, hơmâo rơdêh por hăng rơdêh nao rai hăng kơdư; hơdôm glông jơlan rơdêh đuăi hmar pơtruh Khánh Hòa - Buôn Ma Thuột, Jơlan prong 27 tŏ Dak Lăk hăng Lâm Đồng hăng Jơlan prong Võ Nguyên Giáp mut tơphă nao pơ plơi prong hlao. Tơkeng rai pơ Buôn Ma Thuột samơ̆ đuăi ataih mơ̆ng plơi prong anai sui laih, yă Hoàng Thị Kim Anh ăt do kơtuă mơn, hơmâo pran biă mă hăng tơlơi pơplih phrâo tui anai:“Hok mơak biă mă yua dah glăi pơ anai ƀuh Buôn Ma Thuột đĭ kyar tañ tui anai. Kâo ƀu thâo krăn anih mơ̆ng đưm hlâo dong tah”.

50 thun rơgao, ƀu kơnong tơlơi ruă yua blah ngă pioh glăi hơmâo pơjrao grăng hĭ đôč ôh mơ̆ Buôn Ma Thuột, mơ̆ng sa boh plơi prong răm rai abih yua bơblah, arăng juăt iâu “Buồn Muôn Thuở - Rơngôt abih rơnuk”, hăng kơnong hơdôm rơtuh rơbâo čô đôč, ră anai jing plơi prong mrô sa, plơi prong phun pơkra kơphê Việt Nam. Să Hòa Thắng hăng jum dar tơdron rơdêh por Hòa Bình đưm, kơnong hơmâo hơdôm pluh boh sang djuai ania Mường mơ̆ng tơring čar Hòa Bình mut nao dŏ đôč, ră anai jing sa amăng hơdôm anom bruă kơsem min boh thâo ngă hmua pla glai prong hloh amăng dêh čar, brơi anah, djuai phun pla hăng boh thâo kĭ thuâ̆t măi mok ngă hmua pla glai kơ kual Dap Kơdư. Ơi Nguyễn Quang Ngọc, mơnuih mơ̆ng plơi pla Mường tơring čar Hòa Bình tơkeng thun 1960, ƀơi să Hòa Thắng brơi thâo, tơlơi pơplih pơ kual lŏn anai mơ̆ng phun kram đôč đač jing prong sah, pơplih phrâo:“Đưm adih ƀing ơi yă ta ƀu hơmâo tui anai ôh. Tơdơi anai kah Kơnuk kơna mơ̆ng brơi ană plơi ngă kơphê, kăng pơpha lŏn brơi ană plơi. Amăng Hòa Thắng anai lu sang anŏ bơwih ƀong hơmâo yua mơ̆ng đang pơdjuai phun pla mơn. Pơdjuai anah phun pla djơ̆ lăp. Anai ne, arăng ngă sa thun hơmâo hơdôm klai prăk ƀơ̆i”.

Să Hòa Thắng hơmâo rơbêh 1.200 boh sang anŏ. Lơ̆m Dap Kơdư djơ̆ bơyan, Hòa Thắng mơak hrŏm mơn yua kơphê, sâu riêng, tiu hơmâo lu, nua pơmă, mơnuih ƀôn sang Hòa Thắng pơdrong tañ biă mă. Hơdôm boh sang prong hơmâo man pơdong kơtuai jơlan Buôn Ma Thuột. Bruă pok jơlan Võ Nguyên Giáp jai ngă brơi plơi pla anai pơplih phrâo hloh.

Mơ̆ng boh sang plơi prong hơdip amăng tơlơi blah ngă, tơdơi kơ ha mơkrah rơnuk thun Buôn Ma Thuột hrưn đĭ jing plơi prong hmư̆ hing pơkra kơphê mơ̆ng Việt Nam, sa anih bơwih ƀong phun, boh thâo ia rơgơi ngă hmua pla kyâo mơ̆ng Dap Kơdư. 50 thun hlâo adih, hrơi blah rơgai Buôn Ma Thuột jing pơphun brơi blah dưi bơyan bơnga, jing Buôn Ma Thuột hiam tui hrơi anai hơmâo mơ̆ng ha mơkrah rơnuk thun rơngai, lŏn ia pơlir jing sa. Mơ̆ng anai, plơi prong mut amăng tơlơi hơdip phrâo, hrơi blan đĭ kyar hăng mut hrŏm jar kmar, jing anih drông găn mơ̆ng kơphê rŏng lŏn tơnah./.