Hăng đơ đam lŏn mơnai rơbêh 35.700 ektar, amăng anun rơbêh 90% lŏn mơnai ngă đang hmua, tơring glông Krông Buk, tơring čar Dak Lak arăng lăng hơmâo tơlơi gal prong kiăng pơđĭ kyar djop djuai phun pla sui thun. Ơi Nguyễn Hải Đông, Khua git gai Ping gah tơring glông Krông Buk brơi thâo, tơring glông glăk đing nao pơjing akŏ bruă mă yua lŏn mơnai truh thun 2030, kiăng pơhlôm brơi kah mă yua lăp djơ̆ hăng hơdôm kual lŏn ngă tui hơnong pơkă pơđĭ kyar bơwih ƀong huă mơnuih mơnam.  

“Ƀon lan glăk yua apah ƀong rơgơi kơhnâo pok pơhai hơdôm tơlơi yak nao kiăng pơhlôm brơi tơlơi rơkâo hrŏm mơng tơring čar, mơng gơnong glông. Lơm dưi ngă tui tơlơi anai, bruă iâu pơthưr tuh pơ alin ăt kah hăng man pơdong anih anom, sĭ lŏn mơnai, jao lŏn brơi mơnuih ƀôn sang amra pơhlôm. Tơdah bruă anai dưi ngă, hơnong pơkă kơ pơđĭ kyar bơwih ƀong huă mơnuih mơnam hăng hơnong pơkă rơbêh 8% čang rơmang amra dưi ngă”.

Hơmâo đơ đam kual lŏn mơnai prong rơhaih truh 176.000 ektar, Ea Sup lĕ tơring glông hơmâo kual lŏn mơnai prong hloh tơring čar Dak Lak. Samơ̆, anai lĕ sa amăng hơdôm tơring glông ƀun rin hloh tơring čar; sa bơnah yôm hloh lĕ mă yua lŏn mơnai aka ƀu lăp djơ̆ lơm hơdôm hơpluh rơbâo ektar glăk dŏ đôm amăng hơdôm akŏ bruă hăng mơnuih ƀôn sang sua mă yua. Kiăng pơsir hĭ bruă anai, tơring glông glăk gir run ngă tui hơdôm hơdră bruă pơhrui glăi lŏn arăng sua mă kiăng pioh ngă kual lŏn hiam, pơhưč hơdôm anih bơwih ƀong pơprong tuh pơ alin. Hăng tơlơi gir run anai, tơring glông Ea Sup čang rơmang ƀu djơ̆ kơnong pok rai tơlơi dưi pơđĭ kyar ngă hmua prong rơhaih đôč ôh mơ̆ ăt anăp nao pơhưč hơdôm akŏ bruă ngă hmua yua boh thâo phrâo, pơgôp hrưn đĭ pơhrui lu mơng gơnam đang hmua, đĭ tui pơhrui, hrưn đĭ tơlơi hơdip mơda mơng mơnuih ƀôn sang. Ơi Đỗ Xuân Dũng, kơ-iăng Khua git gai Ping gah tơring glông Ea Sup pơsit tong:

“Ăt dưi pơsit tong lĕ tơlơi gal mơng lŏn mơnai kiăng pơđĭ kyar ngă hmua, đang glai amăng tơring glông Ea Sup lĕ prong biă mă. Yua anun tơring glông Ea Sup sit nik jak iâu hơdôm anom bruă tuh pơ alin rai pơ Ea Sup tuh pơ alin amăng hơdôm kual lŏn mơnai mơ̆ ƀing gơmơi him lăng pơhrui glăi anai kiăng kơ wai lăng, tuh pơ alin bơwih ƀong, pơđĭ kyar ngă hmua, đang glai tui akŏ bruă hăng tui tơlơi pơkă amăng tơlơi phiăn”.

Lăi pơtong tơlơi gơgrong yôm phun mơng kual lŏn mơnai amăng hơdră pơđĭ kyar bơwih ƀong huă-mơnuih mơnam amăng tơring čar, amăng hrơi mă bruă blung a hăng gơnong bruă ngă hmua hăng ayuh hyiăng lŏn mơnai tơring čar Dak Lak tơdơi kơ dưm dăp ngă hơbot anih anom mă bruă (pơmut hrŏm gơnong bruă ngă hmua hăng pơđĭ kyar ƀon lan hăng gơnong bruă ayuh hyiăng lŏn mơnai), ơi Nguyễn Thiên Văn, Kơ-iăng Khua Jơnum min mơnuih ƀôn sang tơring čar brơi thâo: Tơring čar glăk ngă tui hơdôm hơdră bruă kiăng tŭ mă klă kông ngăn anai. Amăng anun bruă pơhrui glăi lŏn mơnai arăng sua mă kiăng pok pơhai khut khăt, hrŏm hăng anun pel ĕp, pơplih pơkra akŏ bruă mă yua lŏn mơnai hơmâo pok pơhai ha amăng plĕ, pơhlôm lăp djơ̆ hăng rĭm kual hăng anăp nao pơđĭ kyar hrŏm mơng tơring čar. Ơi Nguyễn Thiên Văn rơkâo gơnong bruă ngă hmua hăng ayuh hyiăng lŏn mơnai đing nao mơtăm kơ boh tơhnal anai:

“Pơtrut kơtang bruă pơhrui glăi lŏn mơnai hăng hơdôm kual lŏn arăng sua mă kiăng ngă mơtăm, yua anun ƀing gơmơi hơmâo pơjing laih akŏ bruă pơhrui glăi đơ đam lŏn mơnai arăng suai mă amăng đơ đam tơring čar hăng tơdơi kơ pơhrui glăi lŏn arăng sua mă, kiăng pơphô bruă brơi Jơnum min mơnuih ƀôn sang tơring čar kiăng lăi pơthâo khul apăn bruă Ping gah kơ akŏ bruă mă yua lŏn mơnai tơdơi kơ pơhrui glăi, rơkâo ƀing apăn bruă ječ ameč ngă tui boh tơhnal anai, kiăng ha amăng plĕ hăng ngă tui klă tơlơi pơtrun mơng Ping gah tơring čar kah hăng tơlơi git gai mơng gơnong glông”.

Wai lăng hăng mă yua klă lŏn mơnai čang rơmang ƀu djơ̆ kơnong djru brơi Dak Lak dưi ngă tui hơnong pơkă pơđĭ kyar bơwih ƀong huă 8% đôč ôh mơ̆ ăt ngă atur kjăp phik brơi bruă pơđĭ kyar hơđong kjăp. Hăng hơdôm hơdră bruă lăp djơ̆, mơng bruă dưm dăp lăp djơ̆, tuh pơ alin pơkra anih anom, pơhưč anom bơwih ƀong nao wai pơgang lŏn mơnai glai čư̆, Dak Lak amra dưi mă yua klă tơlơi gal mơng lŏn mơnai, pơtrut yôm kiăng hrưn đĭ klă tơlơi hơdip mơda kơ mơnuih ƀôn sang hăng pơtrut bơwih ƀong amăng ƀon lan jai hrơi pơđĭ kyar./.