Hăng lu bruă mă tŭ yua, jơlan hơdră hmâo pơsur laih, pơtrut pran jua neh wa ană plơi ƀơi guai dêh čar mơ-ak bơyan bơnga, čơkă Tết.

Dong mơng mơguah, hơdôm rơtuh čô mơnuih ƀôn sang ƀơi să guai dêh čar Ia Rvê hmâo tum pơƀut ƀơi anih mă bruă să gum nao pơhmư̆ jơlan hơdră “Bơyan bơnga guai dêh čar pơđao pran jua ană plơi” hăng lu bruă mă tŭ yua kah hăng: “Hrơi jơnum ngui ƀañ čưng mơtah”, “pơphun pel ep, pha brơi đôč ia jrao, bơwih brơi tơlơi suaih pral kơ mơnuih ƀôn sang”, “anih pơdă gơnam brơi đôč” hăng hơdôm tơlơi ngui ngor đưm tui phiăn juăt ƀơi plơi pla. Nao pơhmư̆ jơlan hơdră hăng dưi pel ĕp tơlơi duam ruă hăng pha brơi đôč ia jrao, ơi Trần Kế Toán, ƀơi thôn 11, să Ia Rvê mơ-ak brơi thâo, jơlan hơdră hmâo ngă kơjăp tui laih pran gum hrom hơbit ling tơhan hăng mơnuih ƀôn sang ƀơi guai dêh čar. Hrom hăng anun pơsur, pơtrut pran jua kiăng neh wa mơ-ak pran jua čơkă tết, gir run hloh dong amăng pơđĭ kyar bơwih ƀong, mơnuih mơnam, pơdŏng kual guai dêh čar kơjăp kơtang:

 “Pơphun jơlan hơdră “Bơyan bơnga guai dêh čar pơđao pran jua ană plơi” anai lĕ tŭ yua biă, pơdah tơlơi lăng ba mơng Ping gah, Kơnuk kơna, hơdôm gưl hăng anai ăt lĕ pơdah tơlơi pơkĕ hrom kơplah wah khul ling tơhan hăng mơnuih ƀôn sang. Abih bang djop mơnuih ƀôn sang ƀơi anai leng kơ mơ-ak, pơsur neh wa mơnuih ƀôn sang hơkrŭ pơsir djop tơlơi tơnap, hrưn đĭ pơđĭ kyar bơwih ƀong mơnuih mơnam, hrŏ trun rin rơpa”.

Đại tá Phạm Hữu Chiến, Khua git gai Ping gah, Khul Ping gah Ling tơhan pơgang guai dêh čar tơring čar Daklak brơi thâo, jơlan hơdră “Bơyan bơnga guai dêh čar pơđao pran jua ană plơi” dưi pơphun rim thun kiăng djru ƀiă hơdôm tơlơi tơnap, djru neh wa djop djuai ania ƀơi kual guai dêh čar hmâo Tết pơđao pran jua. Thun anai, jơlan hơdră ƀơk 3 bôh sang dô̆ “bơbung sang pơđao guai dêh čar”; anung 2.800 bôh ƀañ čưng mơtah; ƀơk 220 anung gơnam kơ hơdôm bôh sang anô̆ gah hơdră bruă, sang anô̆ hmâo tơlơi hơdip tơnap; hrom hăng anun ƀơk gơnam kơ 57 čô čơđai sang hră glăk dưi hmâo Ling tơhan pơgang guai dêh čar djru amăng jơlan hơdră “čung ba adơi nao sang hră” hăng “ană rông puih kơđông pơgang guai”; pel ĕp pơjrao tơlơi ruă, lăi pơthâo tơlơi suaih pral, pha brơi ia jrao kơ 300 čô mơnuih. Đại tá Phạm Hữu Chiến pơtŏng sit, jơlan hơdră jing tơlơi gum djru rah hăng hơdor tơngia rah mơng Ling tơhan pơgang guai dêh čar hăng neh wa ƀơi guai dêh čar:

 “Jơlan hơdră  “Bơyan bơnga guai dêh čar pơđao pran jua ană plơi” dô̆ jing tơlơi hơdor tơngia neh wa djop djuai ania kual guai dêh čar amăng bruă pơdŏng, wai lăng, pơgang pô lŏn ia, rơnuk rơnua guai dêh čar amăng hơdôm thun rơgao. Jơlan hơdră dưi pơphun ƀơi să Ia Rvê hrơi anai lĕ bruă pok phun, pok jơlan pơlir bruă mă mơng mơnuih apăn bruă tơhan, ling tơhan pơgang guai tơring čar ƀơi 4 bôh să guai dêh čar, gum tơngan hrom yua kơ sa bơyan bơnga trơi pơđao, sa Tết tum jơngum kơ neh wa djop djuai ania ƀơi guai dêh čar”.

Mơ-ak lom nao pơhmư̆ Jơlan hơdră “Bơyan bơnga guai dêh čar pơđao pran jua ană plơi” hrom hăng mơnuih apăn bruă tơhan, ling tơhan hăng neh wa mơnuih ƀôn sang să Ia Rvê, ơi Y Ƀiêr Niê, Kơ-iăng Khua git gai Ping gah tơring čar Daklak brơi thâo, jơlan hơdră sit nik lĕ hrơi jơnum ngui mơng neh wa djop djuai ania ƀơi guai dêh čar; pơjing bruă mă bôh thâo tŭ yua, djă jă gru grua bôh thâo djuai ania, ba glăi tơlơi mơ-ak, tơlơi hyơhyor pran jua, mơ-ak kơ neh wa lom bơyan bơnga truh. Ơi Y Ƀiêr Niê bơni ƀing apăn bruă tơhan, ling tơhan pơgang guai dêh čar tơring čar hmâo pơtŏng sit na nao bruă mă mơng ling tơhan kơdŏng blah, khul ling tơhan hyu mă bruă, khul ling tơhan ngă đang hmua, pơ̆ hơpă kiăng hmâo ling tơhan, bruă hơget tơnap hmâo ling tơhan. Ling tơhan pơgang guai tơring čar ngă giong klă rah bruă wai lăng, pơgang pô lŏn ia, rơnuk rơnua guai dêh čar, jing ling tơhan ba jơlan hlâo rah gum hrom hrŏ trun rin rơpa, bơwih brơi tơlơi suaih pral kơ mơnuih ƀôn sang, pơđĭ kyar bơwih ƀong mơnuih mơnam ƀơi guai dêh čar dô̆ lu tơlơi tơnap:

 “Anô̆ yôm sit nik mơ̆ jơlan hơdră “Bơyan bơnga guai dêh čar pơđao pran jua ană plơi” ba glăi phun lĕ pơdah bruă gơgrong, pran jua, tơlơi hơdor tơngia mơng ƀing ling tơhan pơgang guai dêh čar hăng neh wa glăk hrơi mlăm gum hrom Ling tơhan pơgang guai dêh čar gơgrong kơjăp, ngă “tơmeh hơdip” ƀơi guai dêh čar; pơtŏng sit pran gum hrom hơbit khul ling tơhan hăng mơnuih ƀôn sang nao hrom, pơđĭ prong pran kơtang, tơlơi đăo gơnang, pran pơsit gum hrom pơgang kơjăp lon ia pô”.