Ră anai, kual neh wa djuai ania ƀiă hăng kual čư̆ siăng hmâo hăng glăk hmâo gru ƀun rin mơng đơ đam dêh čar. Rơđah biă ñu, hơnong ñu pơhrui glăi mơng neh wa djuai ania ƀiă ƀơi lu anih anom kơnong kơ dưm dưm hăng 40-50% hơnong pơkă pơhrui glăi amăng kual; mrô mơnuih ƀôn sang djuai ania ƀiă hmâo 14,7% samơ̆ mrô sang anô̆ ƀun rin hmâo giăm truh kơ 60% mrô sang anô̆ ƀun rin mơng đơ đam dêh čar. Hăng tơhnal pơkă Ngă giăm ƀiă rơwang rơnoh hơdip, prăk pơhrui glăi mơng kual djuai ania ƀiă hăng kual čư̆ siăng bơhmu hăng hơnong pơkă hrom đơ đam dêh čar; truh thun 2025 hrŏ trun 50% mrô să, plơi pla tơnap tap; truh thun 2030 phun ñu ƀu dô̆ să, plơi pla tơnap tap, Khua pơ ala mơnuih ƀôn sang dêh čar ta pơsit abih bang ngăn rơnoh rơbêh kơ 137 rơbâo klai prăk pioh ngă tui jơlan hơdră pơkă mơng lŏn ia pơđĭ kyar bơwih ƀong - mơnuih mơnam kual neh wa djuai ania ƀiă hăng kual čư̆ siăng rơwang 2021-2030, hăng 10 Rơwang bruă prong, 14 rơwang bruă anet hăng 36 bôh yôm tuh pơplai, djru rơđah amăng rơwang 1 mơng ră anai truh thun 2025.

Anô̆ pha ra amăng bruă bơwih ƀong huă mơng Jơlan hơdră lĕ pơ ala kơ djru ƀơi anăp, djru hmâo tơlơi gal kơ neh wa, jơlan hơdră đing nao kơsem min hăng pơhư prong hơdôm hơdră pơđĭ kyar bruă ngă đang hmua tui hơdră pơlir hơbit nua ñu, pơjing kual pla kiăng mă yua anô̆ gal tui jơlan gah pơplih hơdră phun pla, hlô rông ba glăi bôh tơhnal, pơjing bruă mă, pơđĭ tui prăk pơhrui glăi kơ mơnuih ƀôn sang, hrŏ trun ƀun rin kơjăp. Hrom hăng anun, pơtrut pran jua pơphun bruă amăng neh wa djuai ania ƀiă hluai tui tơhnal gal, anô̆ hmâo hăng kông ngăn lŏn mơnai dlai ia hmâo ƀơi plơi pla pô. Tui hăng Nai prin tha Hà Việt Quân, Grŭp pơjing akô̆ bruă abih bang hăng jơlan hơdră pơkă mơng lŏn ia pơđĭ kyar bơwih ƀong mơnuih mơnam kual djuai ania ƀiă hăng kual čư̆ siăng rơwang 2021-2030:

 “Tơdah lăi djơ̆ mơn tal blung a amăng gru grua gơnong bruă djuai ania hmâo lăng ƀuh Ping gah hăng Kơnuk kơna pơsit pran jua pơƀut pran tuh pơplai kơ kual anai, kiăng pơplih phrâo abih bang. Tui anun, tơlơi hơget yôm hloh amăng gru grua mă yua ngăn rơnoh anai, bơdjơ̆ nao tơlơi khom pơplih hơdră ngă juăt amăng pơđĭ kyar bơwih ƀong mơnuih mơnam kual neh wa djuai ania ƀiă, anun lĕ tal blung a ƀing ta lăng kual anai lĕ bơnah gum hrom pơđĭ kyar kiăng hmâo hơdră bruă tuh pơplai, ƀu djơ̆ dir wir ƀơi glông jơlan hơdră bruă ôh hmâo tơhnal djru gum kah hăng rơwang hlâo adih ôh”.

Hăng tơhnal pơđĭ tui anô̆ klă hăng pơplih hơdră mơnuih mă bruă, Jơlan hơdră ăt ba mơn bôh yôm pơlar bruă pơtô pơhrăm bruă mă hăng pơsir bruă mă kơ mơnuih mă bruă kual djuai ania ƀiă hăng kual čư̆ siăng kiăng pơhlôm hơđong hăng pơđĭ kyar bơwih ƀong gah rơngiao kơ bruă đang hmua. Jơlan hơdră ăt hmâo dăp mơn pha ra rơwang bruă pioh kơ pơđĭ kyar pơtô pơhrăm, pơđĭ kyar bôh thâo hăng pơđĭ kyar bruă ia jrao kual djuai ania ƀiă hăng kual čư̆ siăng, amăng anun đing nao hơdôm bôh yôm kah hăng: Pơđĭ tui tơlơi pơmin, bruă gơgrong pơsir brơi mơnuih ƀu thâo hră, djă pioh dong hăng pơđĭ tui bôh tơhnal bruă pơtô brơi kơ mơnuih ƀu thâo hră; djru gơnam tam, măi mok bôh thâo kơ kual djuai ania ƀiă hăng kual čư̆ siăng kiăng pơđĭ tui tơlơi tŭ mă bôh thâo kơ neh wa, nao hrom hăng pơđĭ kyar tuai čuă ngui plơi pla... Ơi Vũ Dương Châu, Khua hơđăp Grŭp apăn bruă djuai ania, Jơnum min djop djuai ania mơnuih mơnam dêh čar Việt Nam pơtŏng sit:

 “Ƀing ta khom đing nao pơsir hơdôm tơlơi dô̆ bơngot, tơlơi tơnap prong mơng neh wa ră anai, pơhrư̆i lu thun, amăng sa dua djuai ania đôč, kah hăng tơlơi gơñ hot jrao anun, pơdô̆ rơkơi bơnai mơng muai, pơdô̆ giăm drah kơtăk, biă ñu hrŏ trun mrô sang anô̆ ƀun rin, pơdŏng anih anom mă yua, anom ƀut să, ngă pô ba jơlan hlâo dui ba hơdôm kual pơkon, biă ñu khom pơkă anih mơnuih ƀôn sang dô̆ hơbit khom hmâo mơng 40 bôh sang anô̆ hăng lu hloh kơ anun, kiăng bĕ lŏn tơhroh, ia ling kor. 3 lĕ tuh pơplai djru djop djuai ania ƀiă pơđĭ kyar bơwih ƀong huă ngă rai gơnam sĭ mơdrô, pơtrut kơtang pơtô bruă mă, pơjing bruă mă gah rơngiao kơ bruă đang hmua, pơsur hơdôm bôh anom bơwih ƀong  gum hrom, pơplih phrâo hơdră bruă wai lăng pơgang dlai tlô. Hăng bruă pơtô pơhrăm lĕ ƀing ta pơđĭ kyar dong bruă pơtô pơhrăm, pơđĭ tui bôh thâo kơ mơnuih ƀôn sang, pơtô juăt mơnuih mă bruă, pơhlôm klă kơjăp kơ rơnuk 4.0, kiăng neh wa hmao kiăo tui rơnuk 4.0 anai”.

Kiăng hơdôm hrơi anai, ngăn rơnoh mơng Jơlan hơdră hmâo pơpha. Hơdôm gưl hơdôm gơnong bruă, hơdôm bôh plơi pla khom gum pran hrom, pơtrut tañ rơnoh pok pơhai hơdôm bôh yôm, bruă mă mơng Jơlan hơdră, amăng anun pơphô hăng pơtrut kơtang pok pơhai hơdôm hơdră pơđĭ kyar bơwih ƀong huă ba glăi bôh tơhnal; tañ ngă giong hăng ngă brơi hơdôm ring bruă mă yua dưi mă yua; mă yua, ngă gal brơi pơplih tơlơi pơmin, pơđĭ tui anô̆ kơjăp tơlơi hơdip, pơđĭ tui prăk pơhrui glăi kơ neh wa mơng thun blung a pok pơhai Jơlan hơdră mơtăm. Tơlơi gum pơhiăp mơng ơi Trần Đức Anh, Khua git gai Ping gah să Hương Liên, tơring glông Hương Khê, tơring čar Hà Tĩnh:

 “Hơdôm hrơi rơgao, ngă tui akô̆ bruă pơgang djuai ania Čư̆t, tơlơi hơdip mơda neh wa ăt hmâo lu pơplih mơn, khă hnun hai pơ̆ anăp anai, Ping gah gong gai ăt čang rơmang mơn tơring čar, dêh čar tañ hmâo tơlơi pơsit jao lŏn jao dlai kơ neh wa djuai ania ƀiă hmâo anih bơwih ƀong huă”.

Hrom hăng hơkrŭ đĭ anom mă yua phun lĕ pơđĭ kyar bơwih ƀong mơnuih mơnam ƀơi hơdôm anih anom djuai ania ƀiă khom đing nao pơtrut kơtang pơphun bruă ngă rai gơnam sĭ mơdrô tui jơlan pơlir hơbit, bơwih brơi tơlơi hơdip pran jua mơng mơnuih ƀôn sang nao hrom hăng djru pơphun bruă mă, pơphun tơlơi bơwih ƀong sĭ mơdrô kiăng neh wa hrưn đĭ ngă pơdrong. Jing thun blung a ngă tui jơlan hơdră pơkă mơng dêh čar, jơlan hơdră hơkrŭ glăi bruă bơwih ƀong tơdơi kơ klin Covid-19... čang rơmang anai amra jơlan pơsir djru pơtrut rah pơđĭ kyar bơwih ƀong hăng pơhlôm rah tơlơi hơdip mơda mơnuih mơnam./.