Tơhnal pơkă kơ anih anom dô̆ ngă hiưm hơpă kiăng agaih mơng sang tơbiă gah rơngia dưi hmâo hơdôm bôh plơi pla pơplih phrâo amăng hơdôm bruă mă. Mơng bruă pơsur anun, ƀơi lu plơi pla kual čư̆ siăng hmâo laih lu jơlan nao rai bă kơ bơnga kuh thun, pơjing anih anom hiam – mơtah – hơdjă.

Tơdơi kơ hmâo tơlơi črâo ba mơng Khul đah kơmơi tơring glông, khul đah kơmơi să Cốc Lẩu, tơring glông Bắc Hà hmâo ruah pơdong lăi hơdră pơkra jơlan bơngai pơ ala kơ rok pơkĕ hăng bruă pơdŏng plơi pla phrâo. Jơlan plơi pla dưi gôm hăng djop djuai bơnga kah hăng bơnga mười giờ, bơnga añăm blang, bơnga kuk čăng ding dit, chiều tím... Abih bang pơjing gru hiam mơng kual plơi pla čư̆ siăng mơ-ak klă, rơnuk rơnua. Amai Lùng Thị Hà, să Cốc Lẩu, tơring glông Bắc Hà, tơring čar Lào Cai brơi thâo:

“Adơi amai amăng plơi hlơi hlơi leng kơ hur har pran jua, anăp nao bruă anai. Lăi hrom hlơi hlơi leng kơ hur har pran jua pơpha bruă, gum hrom pioh pla bơnga, bơwih brơi hur har. Ring bruă amăng pơdŏng plơi pla phrâo anai hăng ƀing gơmơi abih bang klă biă. Ƀơi hơdôm ară jơlan hlơi hlơi leng kơ hur har nao mă bơnga ba glăi pla kiăng jơlan nao rai jai hrơi klă hiam hloh”.

Anai kơnong kơ mrô ƀiă amăng hơdôm rơtuh km jơlan amăng plơi pla dưi djă pioh hăng pơhư prong hơdră črăn jơlan 3 agaih, črăn jơlan plơi pla phrâo amăng tơring čar Lào Cai. Hmâo dong sa bơnga, rơngiă hĭ sa kơdung djah ngă klă kơ hơdôm hrơi pơ-iă hang, kiăng jơlan amăng plơi pla agaih klă hiam. Ƀu djơ̆ kơnong kơ bruă mă ôh mơ̆, bruă mă anai hmâo jing laih tơlơi thâo hluh hrom, gơgrong pô mơng adơi amai ƀơi anai. Plơi Tổng Kim lĕ sa amăng hơdôm bôh plơi tơnap tap hloh mơng să Vĩnh Yên, tơring glông Bảo Yên hăng abih bang neh wa djuai ania Mông dô̆ hơdip mơda. Khul đah kơmơi tơring glông hăng tơring čar hmâo nao laih tơl sang lăi pơhing pơsur ƀing adơi amai amăng sang ngă agaih mă pô pưh sang pô hlâo, tơdơi kơ anun lĕ truh jơlan amăng plơi pla. Ră anai, bruă pla hăng bơwih brơi hơdôm ară jơlan bơnga jing laih bruă mă na nao mơng adơi amai amăng să. Ră anai ƀu hmâo tơlơi glom djah ča čhot dong tah ƀơi kơtuai jơlan Amai Sùng Thị May brơi thâo:

 “Ƀơi plơi pla ta khom ngă agaih, rơnăk hơdjă klă lĕ hơdjă kơ drơi pô, kơ plơi pla pô, rơnăk kơ Ping gah hăng Kơnuk kơna ta”.

Ră anai, tơring čar Lào Cai hmâo rơbêh kơ 250 ară jơlan bơnga đah kơmơi phrâo plơi pla, jơlan bơnga plơi pla phrâo, plơi prong apui lơtrik jơlan bơnga hăng abih bang nua ñu giăm truh kơ 3 klai prăk ƀu yap ôh pran mă bruă yua kơ hơdôm gưl khul đah kơmơi amăng đơ đam tơring čar ngă tui. Anai lĕ bôh tơhnal tơbiă rai mơng tơlơi pơčeh phrâo amăng bruă ngă tui tơhnal pơkă 3 agaih nao hrom hăng bruă rơnăk pơgang anih anom dô̆ khul đah kơmơi hơdôm gưl. Bruă pla bơnga kơtuai jơlan hmâo lar hyu truh rim plơi pla. Bruă pơjing hơdôm jơlan bơnga ngă pơplih laih tơlơi pơmin mơng mơnuih ƀôn sang kơ agaih anih anom dô̆, tơlơi pơmin ngă hiam anih anom dô̆ amăng plơi pla dưi pơđĭ tui rơđah biă. Yă Hà Thị Khánh Nguyệt, Khua Khul đah kơmơi tơring čar Lào Cai brơi thâo:

 “Hrom hăng bruă pơsur pơdŏng sang anô̆ “5 ƀu hmâo 3 agaih”, Khul đah kơmơi hơdôm gưl ăt hmâo kơtưn mơn bruă lăi pơhing, pơsur adơi amai amăng khul kiăng ngă tui hơdôm tơhnal ba tơbiă amăng bruă pơsur anai. Bruă pơsur anai ăt dưi hmâo lu mơnuih amăng khul gum hrom klă, pơkĕ hrom hăng bruă pơdŏng plơi pla phrâo, biă ñu hăng să pơdŏng plơi pla phrâo pơđĭ dlông, ngă gru”.

Pla bơnga kơtuai jơlan plơi pla glăk jing hơdră sit nik ba glăi bôh tơhnal, djru pơgang plăng jơlan nao rai pơhlôm, pơgang anih anom dô̆, ngă agaih hiam jum dar plơi pla. Hăng tơlơi pơmin, ƀu kiăng ĕp pơ̆ hơpă ataih ôh, gru hiam amra truh hăng hơdôm anih anom klă hloh, jê̆ giăm hloh amăng tơlơi hơdip mơda, hơdôm ară jơlan bơnga plơi pla hmâo bôh tŭ yua ƀu kơdrưh mơn, samơ̆ pơdah tơlơi pơplih phrâo, pơđĭ kyar mơ̆ jơlan hơdră pơdŏng plơi pla phrâo hmâo ba glăi. Mơng anô̆ kơnong kơ pla pơphô hlâo ƀơi sa dua kual mơnuih ƀôn sang dô̆ ngă gru, ră anai hơdră pla bơnga rôk tui hơdôm ară jơlan nao rai amăng plơi pla čư̆ siăng dưi pơhư prong ƀơi lu plơi pla. Ƀơi lu anih, bruă pla hăng bơwih brơi bơnga dô̆ pơkĕ hrom hăng bruă kih rơmet, agaih jơlan amăng plơi pla. Mơng anun, djru hơdôm plơi pla ngă klă bruă agaih anih anom dô̆ amăng bruă pơdŏng plơi pla phrâo ƀơi kual plơi pla hăng kual čư̆ siăng./.