Mơnuih ƀôn sang să Quảng Điền, tơring glông Krông Ana, tơring čar Daklak juăt laih hăng gru rŭp sa čô đah kơmơi thiếu tá kông ang na nao hyu tir jum dar să mơng 5 mông 30 mơguah rim hrơi. Ơi Trần Văn Hữu, ƀơi grŭp mrô 5, thôn 2, să Quảng Điền ruai glăi: mơnuih ƀôn sang ƀơi anai biă ñu ngă đang hmua, ngă hmua ia anun juăt tơgŭ tañ, tum pơƀut mơñum kơ phê, ră ruai laih anun kah mơng nao pơ̆ hmua. Hơdôm thun hlâo adih, tơlơi tum pơƀut laih anun pơphun ngui hla ƀai ƀong prăk, mă gai ngă glêh tơnap biă. Lu sang anô̆ klah gah, đôm hnưh tơket tơkeng tơdơi kơ hơdôm tơlơi ngui ƀong prăk anun. Samơ̆ năng ai ñu 3 thun jê̆ hăng hăng anai, hơdôm anih anom hang tơngia kơ ngui hla ƀai ƀong prăk, mă gai plai ƀiă laih, tơlơi rơnuk rơnua hơđong amăng să jai hrơi jai dưi pơplih hloh.

“Dong mơng hrơi mơ̆ Thảo nao ngă Khua kông ang ƀơi anai hăng adơi ayong kông ang tơring glông rai mă bruă ƀơi anai tơlơi rơnuk rơnua pơhlôm hơđong mơnuih mơnam. Kông ang ƀơi anai ăt gum hrom mơn hăng mơnuih ƀôn sang, giăm mơnuih ƀôn sang, hmư̆ tơlơi pơhiăp mơng mơnuih ƀôn sang. Ƀơi plơi pla, ƀơi grŭp laih anun grŭp wai lăng mă pô thôn 2 ƀơi anai ăt thâo mơn tơlơi ƀơi plơi pla, hrom hăng anun lăi pơthâo abih tŏng ten anun tơlơi rơnuk rơnua, tơlơi mơnuih ngă soh ƀơi anai plai ƀiă mơn”.

Mơnuih mơ̆ ơi Hữu bâo nao anun lĕ Thiếu tá Lê Nguyễn Hiếu Thảo – Khua Kông ang să Quảng Điền. Ñu lĕ djuai ania  Thái, tơkeng thun 1986, hlâo adih, amai Thảo hmâo laih 13 thun mă bruă ƀơi Kông ang tơring glông Krông Ana amăng Grŭp pơgang rơnuk rơnua laih anun Grŭp tơhan polih wai lăng bruă čar gah hơđong mơnuih mơnam. Mơng rơnuč thun 2019, ñu rơkâo nao mă bruă pơ̆ plơi pla tui akô̆ bruă mơng Ding jum kông ang hăng dưi hmâo Kông ang tơring glông Krông Ana đăo gơnang brơi nao, gơgrong bruă Khua kông ang să Quảng Điền. Amai Thảo ăt jing đah kơmơi amăng 5 čô mơnuih kông ang dưi ba nao mă bruă ƀơi să.

Lom nao čơkă mă bruă, amai Thảo hmâo gum hrom laih hăng ƀing gŏp nao pơ̆ să thâo tơlơi. Pơphun pơjing hơdră bruă mă, mă bruă ƀơi anăp hăng hơdôm bôh plơi, kiăng pel ĕp glăi mơnuih, anih anom tum pơƀut amăng să. Juăt pel ĕp na nao, wai lăng ƀơi hơdôm anih anom giăm guai; pơphun lăi pơhing amăng mơnuih ƀôn sang hăng lu hơdră. Hrom hăng anun, kông ang să dô̆ pơkĕ hrom nao tơl sang tơña bla, pơsur mơnuih ƀôn sang ƀudah ƀơk gơnam tam kơ ƀing tơnap tap, mơnuih pơwot glăi pơkra drơi tơdơi kơ hmâo kơđi ƀơi să. Amai Nguyễn Mỹ Hạnh ƀơi thôn 4, să Quảng Điền brơi thâo, gơnang kơ tơlơi lăng ba pơsur mơng kông ang să, tơdơi kơ pơđut hrơi dô̆ amăng sang mơnă rơkơi ñu hmâo tañ laih mut hrom djop mơnuih, pơkra drơi pô bơwih ƀong huă.

“Lom glăi mơng sang mơnă lĕ ñu mut hrom tañ biă, gum hrom bơwih ƀong huă klă biă, biă ñu lĕ tơlơi gir run, hrưn đĭ lu biă. Biă ñu lĕ lom pơwot glăi plơi pla gong gai laih anun grŭp kông ang să leng kơ ƀing adơi ayong klă sôh, gơñu pơsur pran jua na nao, gơñu djru gum gah pran jua lu biă”.

Ƀu djơ̆ kơnong kơ giăm mơnuih ƀôn sang, nao dơlăm amăng plơi pla, Thiếu tá Lê Nguyễn Hiếu Thảo dô̆ na nao pok pơhai pơphun hơdôm bruă mă gum djru, djru mơnuih ƀôn sang. Lom klin ruă Covid-19 ngă tơnap, kông ang să Quảng Điền hmâo iâu pơthưr ƀing thâo tơngia, thâo gum djru gum hơgôp hơdôm tơn añăm hla rok, gơnam kiăng yua hloh brơi kơ khul mơnuih pơgang pơgăn klin pơ̆ ƀôn prong Hồ Chí Minh hăng hơdôm bôh tơring čar gah kual Dơnung. Amai Thảo dô̆ ƀơi anăp pơsur hăng pơphun 12 tal bruă mă anăp nao să kah hăng mă bruă djru mơnuih ƀôn sang, čuă ƀơk gơnam tam kơ hơdôm bôh sang anô̆ djru ngă hơkrŭ đưm, sang anô̆ gah hơdră bruă, sang anô̆ hmâo tơlơi hơdip tơnap hăng abih bang nua gơnam rơbêh kơ 200 klăk prăk. Iâu pơthưr gum hơgôp prăk pioh djru prăk pơjrao tơlơi ruă kơ sa čô mơnuih apăn bruă să hmâo tơlơi hơdip tơnap tap. Hơdôm bruă mă anai mơng kông ang să Quảng Điền dưi hmâo mơnuih ƀôn sang pơsit yôm, khua sang să djă pioh, bơni. Thượng tá Lê Văn Tuấn, Khua Kông ang tơring glông Krông Ana pơsit:

“Amai Thảo hmâo ngă tui klă laih bruă mă mơng pô ngă Khua kông ang să. Ñu hur har pran jua biă, abih pran jua hăng bruă mă. Amăng 3 thun rơgao, amai Thảo ăt dưi hmâo Ping gah, Khua Kông ang tơring glông Krông Ana hăng Ping gah, Jơnum min mơnuih ƀôn sang să Quảng Điền pơsit yôm biă hăng dưi hmâo mơnuih ƀôn sang ƀơi să Quảng Điền djă pioh, kiăng khăp, jum ba, djru gum lu biă kơ Kông ang să Quảng Điền amăng bruă ngă tui bruă kơđi čar ƀơi să”.

Hăng hơdôm tơlơi gum hơgôp lom dô̆ mă bruă, Thiếu tá Lê Nguyễn Hiếu Thảo hmâo ư-ang dưi čơkă mă Hră bơni mơng Khua Kông ang tơring čar Daklak yua kơ hmâo laih bôh tơhnal prong amăng bruă pơplih hơdră bruă čar; Hră bơni mơng Jơnum min mơnuih ƀôn sang tơring glông Krông Ana kơ bôh than prong amăng bruă bơkơtưn khăp kơ lŏn ia rơwang 2015-2020; Hră bơni mơng Khua Ding jum Kông ang kơ bôh than prong amăng bruă gum hrom, pơphun hăng gum hrom bruă pơplông rŭp, video clip anăn ñu “Hơdôm mơnuih mă bruă pơgang tơlơi hơdip rơnuk rơnua” thun 2022. Ñu hmâo pơdah laih pran jua, hăng ñu, ngă kông ang lĕ tơlơi hor mơng hrơi dô̆ anet. Yua kơ anun, khă găn rơgao hơdôm tơlơi tơnap, glêh glar, ñu jai khăp hloh hăng ư-ang hloh ao buh mơng kông ang hăng ăt gir run tuh rơyuh pran jua dong mơn kiăng djă pioh rơnuk rơnua kơ mơnuih ƀôn sang.

“Bruă pô ruah anun lĕ pran jua hor. Pơgi kơdih anai, kâo kơnong kơ čang rơmang lĕ kâo amra pơphô brơi hăng amra hmâo hơdôm tơlơi pơčeh gum tơngan hrom pioh mơnuih ƀôn sang hăng să anai ngă kơdun hĭ tơlơi truh mơnuih mơnam khut khăt hloh. Hăng čang rơmang pơgi kơdih anai mơnuih ƀôn sang kah hăng ră anai, ngă tui hloh dong, gum tơngan hrom hăng khul kông ang să amăng bruă abih bang mơnuih ƀôn sang pơgang rơnuk rơnua Lŏn ia”.

Tơlơi abih pran jua, hur har mơng Thiếu tá Lê Nguyễn Hiếu Thảo dưi hmâo laih mơnuih ƀôn sang djă pioh hăng pơsit yôm. Mơng anun djru hruă kơjăp dong pran jua kơplah wah mơnuih ƀôn sang hăng kông ang, rim mơnuih ƀôn sang ăt jing sa “mơnuih kông ang”, jing pô gum bruă pioh gum hrom ngă hơdư̆ hĭ ƀing ngă soh, djă pioh kơjăp hơđong ƀơi plơi pla./.