Samơ̆ dưi hmâo tơlơi gum djru mơng hơdôm bôh ƀirô gơgrong gah tơlơi anai, tơlơi gum hrom hơbit pơgang ba ană plơi, plơi Kloong hơđong glăi laih, glăk yak mut thun phrâo 2023 hăng pran jua phrâo kiăng pơdŏng dong tơlơi hơdip trơi pơđao hăng guai lŏn ia rơnuk rơnua.

  Mơgăt rơdêh thek pơgiăng neh wa Kloong glăi pơ̆ plơi ƀơi jơlan ƀê tông dar jum dar hơdôm blah đang bôh ñông, đang kơ su mơtah hlê̆, Puih Thái brơi thâo: năng ai ñu Tết anai lĕ Tết mơ-ak hloh, yua kơ ñu ƀuh tơlơi hơđong yôm phăn hăng pran jua kiăng khăp, pơgang ba mơng sang anô̆, plơi pla, iao gah. Puih Thái ruai glăi: Giăm hmâo ha mơkrah thun dưi gum djru pơwot glăi hơdôm hrơi tơdơi kơ hmâo ƀing hyu plư sĭ nao pơ̆ dêh čar Kur, adơi ayong Puih Thái, Puih Đại na nao dưi hmâo tơlơi lăng ba, pơsur pran jua mơng khul ling tơhan pơgang guai dêh čar, gong gai plơi pla. Hăng kiăng pơ ala glăi tơlơi lăng ba anun, adơi Thái – Đại na nao gum hrom klă hăng sang anô̆ nao pơ̆ đang hmua mă bruă, gir kơtir bơwih ƀong bruă. Đại lăi pơthâo, rơgao kơ tết amra rông dong pŭ be kiăng pơplih ƀiă prăk pơhrui glăi hăng nô̆p hră rơkâo mă bruă kơ sang bruă kơ su kiăng hmâo prăk blan rim blan djru ƀơƀiă sang anô̆ yua kơ ñu thâo hluh lĕ, hơdôm tơlơi ƀuăn gơgrong kơ bruă rơnang prăk blan lu leng kơ dop hơdôm tơlơi pơmin ƀu klă:

"Tơdơi kơ pơwot glăi, kâo thâo hluh ƀu hmâo ôh lăi mă bruă rơnang mơ̆ hmâo lu prăk. Anun kơnong kơ sa tơlơi plư pleč đô̆č. Kâo ƀlong glăi biă yua kơ hmư̆ tui tơlơi ƀing sat plư, pioh sang anô̆ bơngot, rơngiă prăk gơnam tam. Ră anai kâo ƀu hmâo đuăi hyu pơ̆ hơpă dong tah, kơnong kơ gum hrom sang anô̆ ngă đang hmua, pơđĭ kyar bơwih ƀong, bơwih brơi kơ tơlơi hơdip pơgi kơdih anai”.

Puih Phú, tơkeng thun 2005, hlăk ai anet thun hloh amăng grŭp hlăk ai dưi gum djru mơng dêh čar Kur pơwot glăi plơi Kloong amăng thun 2022 brơi thâo, hơdôm hrơi giăm tết, bruă đang hmua giong laih. Ñu glăk gum hrom hlăk ai amăng plơi agaih rơmet kơtuai jơlan, rơmet ƀơi kual sang jơnum plơi pla kiăng ană plơi hmâo anih atông čing hơgor, suang hăng ngui ngor amăng hơdôm hrơi thun phrâo. Phú pơmin, rơgao tết, ñu amra yua mrô prăk 18 klăk 500 rơbâo prăk mơ̆ khul ling tơhan pơgang guai dêh čar djru kiăng nao pơ̆ tơring kual tơring glông hrăm pơkra rơdêh hăng djop mơta măi mok:

   “Thun phrâo, kâo amra hrăm bruă pơkra rơdêh. Khom hmâo bruă mă kah mơng hơđong tơlơi hơdip mơda. Lom wăn, kâo nao pơ̆ đang hmua hăng sang anô̆, mă bruă, rông hlô dong kiăng pơhlôm tơlơi hơdip mơda”.

Plơi Kloong thun 2022 hmâo pơplih tañ laih gơnang kơ pok pơhai Jơlan hơdră pơdŏng plơi pla phrâo. Kah hăng abih bang hơdôm glông jơlan, rôk tui ƀơi plơi hmao pơkra ƀê tông abih laih. Lu sang anô̆ bơwih ƀong đĭ pơdrong hmâo khin hơtai pơkra sang phrâo klă hiam. Tui hăng tha plơi Rơ Čăm Čoak brơi thâo, neh wa hmâo pơplih laih hơdră bơwih ƀong huă, mă bruă rah kơ sang bruă kơ su, pơlar rah phun pla sui thun kah hăng bôh ñông, kơ phê hăng kơ su đang anet. Tha plơi Rơ Čăm Čoak đăo gơnang, tơdah hlăk ai amăng plơi gir hrăm tui, triăng mă bruă, plơi Kloong amra pơđĭ kyar tañ hloh dong:

 “Amăng hơdôm mông jơnum plơi, tha plơi čang rơmang ƀing ană tơčô kơđiăng, anăm hmư̆ tui tơlơi mơng ƀing plư pleč; gir kơtir pơđĭ kyar hăng hơđong bơwih ƀong huă amăng sang anô̆ kiăng tơdơi anai dô̆ bơwih brơi kơgi kơdih anai dong. Tha plơi pla amra gum hrom hăng hơdôm gơnong bruă kiăng pơtô lăi, pơtô juăt rơnuk hlăk ai amăng plơi nao djơ̆ jơlan. Ƀơi plơi Kloong, kiăng tơtlaih mơng ƀun rin lĕ đing nao bơwih ƀong huă sang anô̆ ba glăi bôh tơhnal”.

 Ơi Siu Nghiệp – Kơ-iăng Khua git gai Ping gah, Khua Jơnum min mơnuih ƀôn sang să Ia O, tơring glông Ia Grai pơtŏng sit, hlăk ai hơdôm bôh plơi ƀơi kual guai dêh čar Ia O ră anai dưi hơđong pran jua ngă pơdrong đam ƀơi plơi pla pô:

 “Jơnum min mơnuih ƀôn sang să jao kơ Kơ-iăng Khua sang să gơgrong bôh thâo mơnuih mơnam pok pơhai hơdôm jơlan hơdră lăi pơhing kơ neh wa kơđiăng hăng tơlơi plư peč ƀơi glông guai dêh čar, amăng plăng facebook; lăi pơhing tơlơi bruă mă lĕ khom hmâo anăn păn rơđah rơđông, djơ̆ mơnuih, bruă mă. Mơnuih ƀôn sang thâo laih tơlơi anai, ngă klă bruă pơsit jơlan gah mă bruă”.

Hăng tơlơi gir run mơng gong gai hăng tơlơi gum hrom tŭ ư mơng mơnuih ƀôn sang amăng bruă mă, bơwih ƀong huă, ƀô̆ mơta plơi pla ƀơi kual guai dêh čar pơ̆ Ia O glăk jai hrơi jai pơplih phrâo. Tơlơi anai lĕ gru than kơjăp kiăng ƀing tha plơi Jarai ƀơi anai hmâo tơlơi hơdip mơda jai hrơi jai klă hiam hloh, gum hrom pơdŏng bruă abih bang mơnuih ƀôn sang kơjăp ƀơi kual guai dêh čar./.