Ƀơi anăp tơlơi anai, Ling tơhan pơgang guai dêh čar, Kông ang, Khul ling tơhan hăng gong gai plơi pla glăk run pơgang pơgăn.    

Tơring čar An Giang hmâo jơlan guai dêh čar ataih giăm truh 100 km, giăm hăng tơring čar Takeo hăng Kandal dêh čar Kur. Lu thun rơgao, tơlơi mut tơbiă ča ăt hmâo na nao mơn nao hrom hăng anun amra hmâo hơdôm tơlơi ngă dlêh tơnap kah hăng sĭ mơdrô mơnuih, plư mă, dui ba ƀing mơnuih mă bruă ƀun rin nao gah kơdih guai dêh čar sĭ kơ hơdôm khul grŭp, mơnuih kiăng gô̆ mă pran mă bruă. Biă ñu lĕ hơdôm kơđi tơlơi mut tơbiă ƀu djơ̆ phiăn kiăng sĭ mơdô̆ dŭ pơgiăng gơnam dop hăn guai dêh čar.

Kiăng hmao thâo, pơgăn hơdôm mơnuih hyu ča găn guai dêh čar, biă ñu amăng tal rơnuč thun anai, hơdôm khul apăn bruă glăk hrơi mlăm gơgrong pô pơgăn. Rơngiao kơ khul tơhan pơgang guai dêh čar dô̆ hmâo tơlơi gum hrom kơjăp mơng khul tơhan pơkon kah hăng kông ang, tơhan wai lăng bruă rô nao rai hăng dêh čar tač rơngiao gum hrom mă bruă. Ră anai, hơdôm mơnuih blơi sĭ dop mă tŭ tơlơi ia đĭ, mlăm mơmot, kual hmâo mơnuih dô̆ dua bơnah guai dêh čar hơdip giăm nao rai... kiăng tum pơƀut gơnam sĭ dop, pơgiăng hăng mrô lu. Phrâo anai, ƀơi kual Vĩnh Xuyên, phường Núi Sam, plơi prong Châu Đốc, Grŭp hyu mă bruă gah Tơhan polih wai lăng bruă bơwih ƀŏng kông ang tơring čar gum hrom hăng Kông ang ƀôn prong Châu Đốc hmâo ĕp ƀuh hăng pơphun hyu huĕt ĕp, mă pơkŏng 2 čô mơnuih hrom hăng gơnam bơdjơ̆ nao: 400 bĕ hruh hot sĭ dop, 1 bôh song măi hăng 4 bôh rơdêh thut. Thượng tá Nguyễn Đăng Khoa, Kơ-iăng Khua tơhan polih wai lăng bruă bơwih ƀong Kông ang tơring čar An Giang brơi thâo:

“Jơlan sĭ mơdrô dŏp hot djup phrâo rơgao hmâo mă kơdŏng, bôh tơhnal mă pơkŏng kơnong kơ hmâo 400 ƀĕ hruh hot djup đôč, samơ̆ amăng jơlan anun hăng lom anun ñu pơgiăng hăng kơđuh anun lĕ rơbêh kơ 1000 ƀĕ hruh hot djup, gơnam tam tui anun ƀu ƀiă ôh, samơ̆ yua kơ anih anom nao rai tơnap, anun kơnong kơ hmâo mă 400 ƀĕ hruh hot, dô̆ glăi lĕ đuăi kơđai glăi gah kơdih. Ră anai, mă tŭ bơyan ia đĭ, hơdôm mơnuih sĭ mơdrô dŏp pơplih na nao jơlan nao, anih anom, jơlan gah, kual mă bruă, anun gơnam tam sĭ dŏp hmâo jơlan gah lu hăng đĭ tui”.

Đại tá Lý Kế Tùng, Kơ-iăng Khua git gai Ling tơhan pơgang guai dêh čar tơring čar An Giang brơi thâo, mơng akô̆ thun 2022, hmâo hrŏ trun laih mơnuih ƀơi hơdôm anih Gak wai, pơgang guai dêh čar hăng pơgang klin Covid-19. Mrô mơnuih ƀiă hĭ, rơwang ataih nao rai anih ƀơi guai ataih hloh, anun mơnuih sĭ mơdrô dŏp ăt mă tŭ mơn ƀơi anih anom anun. Ƀing hyu sĭ dŏp mă bruă gơñu jai hrơi hơgom hloh, mă yua djop tơhnal pioh pơgiăng gơnam dŏp; lom pơgiăng mơ̆ hmâo khul wai lăng thâo, gơñu đuăi kơdŏp, pioh glăi gơnam tam, rơdêh, đa lĕ añŭ trun wot song măi pơgiăng gơnam amăng ia laih anun đuăi tlaih drơi pô; kiăng bĕ arăng tơgŭ kơđi lom hmâo mă, ƀing anai ƀu glăm ba ƀu rơgao mrô pơkă ôh; đa lĕ, mơnuih sĭ mơdrô dŏp, dŏp lui gơnam tam hmâo nua kah hăng mah, gơnam pơhrôp drơi jăn kiăng dŏp mơnuih wai lăng hăng jơlan bah amăng guai dêh čar... Biă ñu, jê̆ hăng anai hmâo sa dua mơta tơlơi pơgiăng hot jrao, ƀing gơñu hmâo djă ba phao. Đại tá Lý Kế Tùng brơi thâo dong.

 “Amăng bruă pơgăn ƀing ngă soh sĭ mơdrô dŏp hmâo lu tơlơi tơnap biă: mrô mơnuih hmâo arăng pơsur gum hrom sĭ mơdrô dŏp đĭ lu; dua lĕ, yua mơng bruă hleh hloh kơmlai lu anun arăng ăt gir hyu sĭ mơdrô dŏp mơn hăng rong pơgang gơnam mơng ƀing gơñu, bĕ pioh lup lăp, bĕ ƀing phun tŭ mă gơnam phak tơhmal, yua anun gơñu thâo biă, kơdŏng glăi khul wai lăng. Rơngiao kơ bruă ngă hơgom, ƀing gơñu dô̆ mă tŭ bruă dar nao hră pơ-ar; ƀing gơñu pơgiăng gơnam đing đăo gơnam lĕ blơi dŏp thơ, glăi pơgiăng gơnam dŏp mơng tơring čar pơkon glăi pơ̆ An Giang ƀudah pơgiăng gơnam dŏp găn rơgao An Giang. Kông ang, tơhan wai lăng bruă rô nao rai hăng dêh čar tač rơngiao... hmâo thâo hăng mă pơkŏng lu mơta tơlơi pơgiăng gơnam mơng ƀôn prong Hồ Chí Minh hăng mơng Bình Dương glăi pơ̆ anai”.

Mơng akô̆ thun truh ră anai, hơdôm khul apăn bruă amăng tơring čar An Giang hmâo pel ĕp, thâo hmâo rơbêh kơ 140 mơta tơlơi, gah bruă blơi sĭ, dŭ pơgiăng gơnam kom, gơnam blơi dŏp, lĕč pơdar amăng sĭ mơdrô hăng gơnam ngă mă ča. Abih bang nua gơnam giăm truh 120 klai prăk. Abih bang mrô prăk phak tơhmal ngă soh hăng gơnam mă pơhrui đĭ rơbêh kơ 6 klai prăk bơhmu hăng thun 2021. Khul tơhan wai lăng hmâo tơgŭ kơđi kơ 29/40 mơta tơlơi; tơgŭ kơđi 31/69 čô mơnuih; nua gơnam hmâo tơgŭ kơđi lĕ rơbêh kơ 30 klai prăk.

Kiăng ngă klă bruă pơgăn mut tơbiă soh phiăn, pơgăn sĭ mơdrô dŏp, leč pơdar amăng sĭ mơdrô hăng gơnam ngă mă ča pơ̆ anăp anai, An Giang amra djă pioh dong hơdôm Grŭp hyu mă bruă pơgang, pơgăn sĭ mơdrô dŏp ƀơi jơlan guai dêh čar. Hơdôm khul tơhan Kông ang, Tơhan wai lăng bruă rô nao rai hăng dêh čar tač rơngiao, Tơhan pơgang guai dêh čar, Khul wai lăng bruă sĭ mơdrô... kơtưn dong bruă gum hrom amăng bruă pơgăn sĭ mơdrô dop, pơgiăng ƀu djơ̆ phiăn gơnam găn guai dêh čar. Biă ñu đing nao pơplih phrâo, pơđĭ tui bruă lăi pơhing, pơtô pơhrăm, pơsur mơnuih ƀôn sang ƀơi kual guai dêh čar ƀu djru ƀing sĭ mơdrô dŏp, gum hrom ƀom ƀing ngă soh, gum tơngan hrom hăng khul apăn bruă amăng bruă pơgăn sĭ mơdrô dŏp, lĕč pơdar amăng sĭ mơdrô hăng gơnam ngă mă ča./.