VOV4.Jarai - Hrơi anai lĕ 27 blan 12 blan di, Tết tui phiăn juăt Ất Tỵ glăk truh laih. Hrŏm hăng mơnuih ƀôn sang Việt Nam ƀơi djop anih anom amăng kual dêh čar, hơdôm hrơi rơgao, hơdôm bruă hơđong tơlơi hơdip mơda mơnuih mơnam anăp nao neh wa ƀơi kual asuek, ataih, kual guai dêh čar hơdôm bôh tơring čar kual Dap Kơdư dưi đing nao biă. Bruă pơphun hyu tơña bla, brơi gơnam tam Tết kơ neh wa dưi prăp lui tŏng ten, pơhlôm wot abih bang mơnuih ƀôn sang leng kơ dưi čơkă Tết tui phiăn juăt amăng tơlơi mơ-ak klă, gum hrŏm hơbit, pơđao pran jua ƀing gŏp. Tơlơi ruai rơnuč rơwang hrơi tơjuh hrơi anai lăi nao bruă mă tŭ yua anai.