Amăng mông wot brơi drah yua kơ Khul mut phung tơring čar Lâm Đồng gum hrom hăng Khul ia jrao kyâu bơrơkal mriah tơring čar pơphun ƀơi Đà Lạt, amai Phạm Thị Hồng, mơnuih mơng khul mut phung gơnong bruă pơtô pơhrăm lăng ƀuh: anai lĕ bruă mă tŭ yua biă anun khom dưi djă pioh hăng pơphun na nao hloh, ngă pơhư̆č dong lu mơnuih amăng mơnuih mơnam gum hrom.

“Lom hmư̆ hing hmâo hrơi jơnum ngui brơi drah ƀơi anai lĕ ƀing adơi amai nai pơtô čơđai ƀơi sang hră rŏng nao gum hrom, brơi drah amăng tơlơi mơ-ak. Kâo pơmin lĕ gum hơgôp sa črăn anet hơpă kơ mơnuih mơnam lĕ kâo ƀuh mơ-ak biă”.

Anai lĕ sa amăng hơdôm bruă mă ƀuh rơđah amăng jơlan hơdră gum hrom kơplah wah Khul mut phung tơring čar hăng Khul ia jrao kyâu bơrơkal mraih Lâm Đồng rơwang 2019-2023, kiăng ngă tui phiăn juăt brơi drah djru kơ bruă pơjrao ječ mơnuih ruă, pơjrao, pơhlôm hlâo amăng hơdôm tơlơi kiăng ječ, ƀu hmao thâo hăng djop brơi mrô drah kiăng yua amăng bruă pơjrao ječ kơ mơnuih ruă.

Phrâo anai, Grŭp črâo ba pơsur brơi drah gum djru tơring čar Gialai pơphun jơnum klah čun bruă brơi drah gum djru thun 2022, pok pơhai kơčăo bruă thun 2023. Tui tơlơi lăi pơthâo glăi, thun anai đơ đam tơring čar Gialai hmâo pơphun hmâo 84 wot brơi drah gum djru, bôh tơhnal hmâo mă rơbêh kơ 18 rơbâo anung drah, hmâo 120% tơhnal kơčăo pơkă dưi jao. Amăng anun, Sang ia jrao prong tơring čar Gialai hmâo tŭ mă rơbêh kơ 14.600 anung drah hăng Sang ia jrao Quân y mrô 211 tŭ mă rơbêh kơ 3.300 anung drah. Hmâo 416 anung drah kiăng ječ hmâo brơi hmao tlôn kơ hơdôm bôh sang ia jrao pơjrao ječ kơ mơnuih ruă. Ơi Dương Đình Diện – Kơ-iăng Khua Grŭp črâo ba pơsur brơi drah gum djru, Khua Khul ia jrao kyâu bơrơkal mraih tơring čar Gialai, lăi:

 “Thun 2022 hăng tơlơi črâo ba khut khăt mơng Jơnum min mơnuih ƀôn sang tơring čar ăt kah hăng Grŭp črâo ba pơsur brơi drah gum djru tơring čar lĕ, tơlơi lar hyu amăng bruă brơi drah gum djru hmâo lar hyu prong amăng gưl mơnuih ƀôn sang hăng jai hrơi jai ngă pơhư̆č lu mơnuih ƀôn sang gum hrom bruă brơi drah gum djru. Ƀing gơmơi pơsit hơdôm hrơi tô̆ tui anăp nao lĕ ƀing gơmơi hrưn đĭ lar hyu bruă gum djru, brơi drah pơtlaih mơnuih ruă pioh mơnuih ƀôn sang gum hrom klă bruă brơi drah gum djru pơ̆ anăp anai”.

Ƀơi tơring čar Daklak, Grŭp črâo ba pơsur brơi drah gum djru ăt hmâo pơphun mơn bruă Jơnum pơpŭ bơni mơnuih brơi drah ƀuh rơđah amăng thun 2022. 52 čô mơnuih brơi lu drah amăng bruă brơi drah gum djru dưi pơpŭ amăng tal anai. Anai lĕ hơdôm mơnuih gum brơi drah lu wot amăng thun 2020 hăng 2021. Ơi Nguyễn Tấn Chờ, tơkeng thun 1967, ƀơi thôn Tiến Thịnh, să Quảng Tiến, tơring glông Čư̆ Mgar, tơring čar Daklak hmâo 48 wot gum hrom brơi drah gum djru lăi lĕ:

 “Kâo ƀuh kiăng ngă bruă anet hơpă pioh djru mơnuih bưp tơnap amăng tơlơi hơdip mơda. Truh ră anai kâo ăt hmâo brơi laih 48 wot hăng ăt hmâo rơkâo brơi drah gum djru mơn kiăng tơdơi anai khă pô rơngiă hĭ hai ta ăt pioh glăi mơn ƀơƀiă tơlơi hơdip anai, kơ mơnuih pơkon. Ană bă amăng sang pô kâo hai ăt brơi drah mơn hăng kâo ăt kiăng pơtă mơn hăng djop mơnuih, ƀing ta anăm pơmin soh glăi amăng tơlơi brơi drah ngă sat kơ tơlơi suaih pral mơ̆ brơi drah ƀơi anai, blung hlâo lĕ ta pơtlaih mơnuih, dua lĕ ñu djru drơi jăn ta pơplih drah, drơi jăn suaih pral hloh ƀu djơ̆ ngă sat kơ drơi jăn ta ôh”.

Daklak lĕ sa amăng 10 bôh tơring čar ba jơlan hlâo đơ đam dêh čar gah bruă brơi drah gum djru. Tơring čar ră anai hmâo 200 Grŭp črâo ba brơi drah gum djru hơdôm gưl; 8 khul grŭp pơsur brơi drah hăng brơi drah pơhlôm hlâo... Hơnong ñu rim thun tơring čar hmâo năng ai ñu 30.000 čô mơnuih rơkâo brơi drah, tŭ mă rơbêh kơ 20.000 anung drah.

Yă H’ Yim Kđoh, Kơ-iăng Khua Jơnum min mơnuih ƀôn sang tơring čar, Khua Grŭp črâo ba brơi drah gum djru tơring čar Daklak lăi lĕ, hmâo bôh tơhnal anai lĕ gơnang kơ tơlơi gum hrom klă mơng ding kơna gah Grŭp črâo ba pơsur brơi drah gum djru hơdôm gưl, hơdôm khul grŭp, anom bruă plơi pla hăng bruă ngă klă hiam mơng mơnuih gum hrom brơi drah.

 “Pơ̆ anăp anai iâu pơthưr dong lu mơnuih gum hrom brơi drah hloh, hăng čang rơmang abih bang hơdôm mơnuih suaih pral hmâo tơlơi gum djru truh hăng mơnuih ruă. Anai ăt lĕ tơlơi čang rơmang brơi abih bang mơnuih ruă hăng ƀing ta đăo gơnang lĕ hăng pran pơsit prong mơng abih bang glông bruă kơđi čar hrom hăng abih bang djop djuai ania amăng tơring čar Daklak amra hmâo lu tơhnal gal jôr drah hloh kơ mơnuih ruă pioh mơnuih ruă hmâo tơlơi hơdip klă hiam hloh”.

Phrâo anai, ƀơi plơi prong Buôn Ma Thuột ăt hmâo pơphun laih mông ngă Lơphet lăi pơthâo Khul brơi drah RH- tơring čar Daklak. Khul hmâo 3 grŭp hăng 43 čô mơnuih lĕ, hơdôm mơnuih djuai drah RH-, gah khul mơnuih hmâo djuai drah kơƀah ƀiă mơnuih hmâo. Anai lĕ anih tum pơƀut, gum hrom hơbit ƀing ding kơna pioh pơdŏng khul brơi drah pơhlôm hlâo, pơjing khul mơnuih hmâo djuai drah kơƀah ƀiă mơnuih hmâo gum hrom brơi drah gum djru pơhlôm klă./.