VOV.Jarai-Mrô mơnuih duam đung drah glăk lu tui ƀơi hơdôm boh tơring čar kual Dap kơdư hăng glăk ngă glêh tơnap brơi hơdôm sang ia jrao hăng amra lar hyu lu anih dong. Anom bruă wai pơgang tơlơi duam ruă hơdôm boh tơring čar glăk ječ ameč pok pơhai hơdôm hơdră pơgang kiăng plai ƀiă ƀuh mơnuih phrâo duam, wai pơgang hơdôm anih hơđuh đĭ kman, ƀu brơi lar hyu lu anih.

VOV.Jarai - Hrŏm hăng prăk tuh pơ alin mŏng Kơnuk kơna, Dak Lăk glăk iâu pơthủ abih bang mơnuih tơpuôl gum ngă, đah mơ̆ng pơhrua tui măi mok, anŏ gêh găl bơwih brơi sit mơnuih ƀôn sang mơtăm. Mơ̆ng sang ia jrao, hơdôm boh thâo mrô hơmâo ba yua amăng hơdôm bruă mă, djru plai ƀiă ngă lu mơta bruă đơi, ngă tañ ƀiă laih anun bơwih brơi klă hloh mơn.

VOV.Jarai-Ƀơi Dak Lak phrâo hơmâo mông Jơnum kơ bruă kơtưn pơhlom, pơgang tơlơi ruă djơ̆ tuai mơ̆ng asâo, eo ƀă kman djơ̆ tuai, asâo yang ngă, kiăng jŭ yap glăi tơlơi pơhing, bruă mă hăng pơtrut pok pơhai Jơlan hơdră mơ̆ng dêh čar pơtrun brơi pơhlom pơgang tơlơi ruă kman djơ̆ tuai  mơ̆ng thun 2022-2030. Tal jơnum anai, jing bruă mă anăp nao Hơdor glăi Hrơi jar kmar pơhlom, pơgang tơlơi ruă kman Djơ̆ tuai thun 2026, yua Ding jum Ngă hmua hăng Pơgang ayuh hyiăng ngă hrŏm Sang bruă Ĕp kman duăm ruă kual Dap Kơdư hăng Gơnong bruă ia jrao tơring čar Dak Lak pơphun.

VOV.Jarai - Čroh pơtah jing tơlơi ruă juăt ƀuh biă ƀơi ƀing čơđai, biă ñu čơđai yŭ 5 thun. Anai jing tơlơi ruă amuñ ngă djai mơn amăng hnưr thun anai. Virus Rota jing sa amăng hơdôm tơlơi akŏ phun ngă ruă. Mơ̆ng thun 2024, vắc xin Rota pơgang tơlơi ruă čroh pơtah, eh čroh kian hơmâo ba pơmut amăng Jơlan hơdră tlâ̆o pơgang ƀơi djŏp anih, tlâ̆o brơi đôč kơ ƀing čơđai ƀơi hơdôm boh tơring tơnap tap, laih anun hơmâo ngă ƀơi djŏp anih mơ̆ng thun 2026. Anai jing hơdră pơgang tŭ yua biă, đah mơ̆ng plai ƀiă hơmâo tơlơi ruă pơtah čroh, ruă kraih, pơgang brơi kơ ƀing čơđai.

VOV.Jarai-Hrŏm hăng mrô mơnuih ƀă lu đơi, ƀơi Lâm Đồng mơ̆ng akŏ thun truh ră anai hơmâo 2 čô laih mơnuih djai yua tơlơi ruă ƀam ƀong plă tơkai tơngan hăng čơƀek laih anun 1 čô mơnuih djai yua duăm đung drah. Anom bruă ia jrao tơring čar hlăk pơtum bong glăi hăng tơlơi hŭi rơhyưt klin hơđuh hyu.

VOV.Jarai - Anom bruă ia jrao Dak Lăk glăk pơtrut mă yua boh thâo mrô amăng bruă ngă hră, wai lăng hră pơ-ar. Truh ră anai, mơnuih ƀôn sang thâo tui laih bruă čih anăn pơkă, pơjrao tơlơi ruă hăng glông điện tử; hơdôm sang bruă ia jrao ăt čih pioh tơlơi ruă amăng điện tử hăng tla prăk ƀu mă prăk mơta. Hơdôm tơlơi gêh găl mơ̆ng boh thâo mrô anai ƀơ brư̆ djru mơnuih ƀôn sang thâo mă yua ia jrao gêh găl hloh, laih dong pơđĭ tui anŏ klă bruă pơkă - pơjrao tơlơi ruă ƀơi tơring.

VOV.Jarai - Bơbrah hlung asơi jing tơlơi ruă juăt bưp laih, biă ñu amăng tơlơi hơdip rơnuk anai. Sit hơmâo lu mơnuih ruă đơi jing arăng pơ-ai, lăng tơdu biă hơdôm nam ruă năng blung. Bơbrah hlung asơi ƀu kơnong ngă ruă ul amăng hlung pruăi đôč ôh, amuñ ba truh tơlơi hŭi rơhyưt pơkŏn dong.

VOV.Jarai-Tơdơi kơ giăm 2 blan pok pơhai bruă pơkă lăng tơlơi suaih pral abih bang mơnuih ƀôn sang, anom bruă ia jrao tơring čar Dak Lak hơmâo pơkă lăng laih giăm 2 klăk wơ̆t mơnuih ƀôn sang huăi apah prăk.

VOV.Jarai - Rơwang hrơi tơjuh rơgao, tơring čar Gia Lai čih pioh 2 čô čơđai djai djơ̆ tuai, jing mơ̆ng akŏ thun 2026 truh kơ ră anai hơmâo abih bang 5 čô.

VOV.Jarai-Ƀơi tơring čar Dak Lak phrâo čih pioh hơmâo mơnuih tal 2 djai yua duăm đung drah thun 2026.