Tui mrô yap mơ̆ng Anom wai lăng Tơlơi duam ruă ƀôn prong Hồ Chí Minh, kơnong amăng sa rơwang hrơi tơjuh, ƀôn prong čih hmâo rơbêh kơ 300 čô mơnuih duam pơđung drah. Abih bang mrô mơnuih duam pơđung drah mơ̆ng akô̆ thun 2025 truh ră anai lĕ giăm hmâo 6.000 čô mơnuih.

Ăt amăng sa rơwang hrơi tơjuh mơn, ƀôn prong hmâo čih pioh rơbêh kơ 300 čô mơnuih duam kơčung tơkai tơngan mơbah. Abih bang mrô mơnuih ruă kơčung tơkai tơngan mơbah yap mơ̆ng akô̆ thun 2025 truh ră anai lĕ 2.300 čô mơnuih.

Čih pioh mơ̆ng pô hyu mă tơlơi pơhing phrâo ƀơi Sang ia jrao pơjrao tơlơi ruă čơđai muai mrô 2 ƀôn prong Hồ Chí Minh, lu čơđai ruă ba nao mơ̆ng hơdôm bôh tơring čar pơkon pioh pơjrao yua kơ amĭ ama čơđai bơngot ƀơi tơring čar ƀu djop bôh thâo pơkă lăng djơ̆ tơlơi ruă.

Lơm djơ̆ hmơi akă pơđut, tơlơi ruă kơčung tơkai tơngan mơbah hăng duam pơđung drah glăk pơphun ngă amra tơnap him lăng tơdah ƀu dưi wai lăng.

Ayong Phạm Đức Tuấn mơ̆ng tơring čar Bình Phước ba ană 2 thun nao pơ̆ ƀôn prong pơjrao, khă thâo ƀơi tơring čar hmâo djop jrao hăng hơdră pơkă samơ̆ nao pơ̆ Nhi Đồng 2 sang anô̆ mơ̆ng hơđong pran jua:

“Gah dlông pơkă lăng lĕ ruă bơbrah rơkông đok kraih ngă pơ-iă drơi, rai pơ̆ anai glăk pel ĕp dô̆ tơguan lăng bôh tơhnal pel ĕp lăng lĕ ƀuh kơ-añăk na nao pơjrao ječ mơtăm. Blung a dô̆ pơmin ruă huying, samơ̆ năng ai ñu mơ̆ng 3-4 mông tơdơi lĕ ñu pơphun ƀlĕ pơđeh lu, ƀing nai ia jrao lăi pơthâo ba nao pơ̆ anom pơjrao tơlơi ruă tưp pel ĕp lĕ, lăi gơ̆ ruă kơčung tơkai tơngan mơbah”.

Tui hăng anun, amai Lê Thị Huyền (tơring čar Đồng Nai) ăt ba ană nao pơ̆ sang ia jrao 2 wot yua kơ hlâo kơ anun ruă rơnang anun brơi pơjrao pơ̆ sang:

“Hrơi tal 3 pơphun pơ-iă drơi jăn samơ̆ truh hrơi tal 5 ba rai pel ĕp, sit ñu ơi ia jrao ƀuh rơnang brơi ia jrao mơñum lăng tui. Abih 2 hrơi ƀuh čơđai ƀu ƀuh plai ƀiă mơ̆ pit juăt dô̆ tơtuă, hia lu, ƀu gưt ƀong huă hăng pơ-iă drơi jăn anun ba glăi pơ̆ anai dong. Pơjrao hơđong lĕ hrơi anai čơđai dưi brơi tơbiă mơ̆ng sang ia jrao”.

Tơlơi ruă kơčung tơkai tơngan mơbah akă hmâo vaccine pơgang hlôm hlâo ôh, samơ̆ hmâo laih hơdră pơkă pơjrao, hơdôm bôh tơring čar leng kơ dưi pơhrăm, samơ̆ bơngot đơi anun amĭ ama ba čơđai nao ƀôh prong pơjrao ngă brơi kơ hơdôm bôh sang ia jrao amra rơgao hơnong.

Lơm anun, ơi ia jrao Dư Tuấn Quy, Khua Anom pơjrao tơlơi ruă tưp – Ară akô̆ glô, Sang ia jrao pơjrao tơlơi ruă čơđai muai mrô 1 (Nhi Đồng 1) brơi thâo, tơlơi ruă kơčung tơkai tơngan mơbah rơwang hrơi tơjuh anai hmâo jơlan gah đĭ lu. Ră anai, hmâo 18 čô mơnuih ruă kơčung tơkai tơngan mơbah ƀơi anom pơjrao amăng sang ia jrao, hơnong ñu sa hrơi hmâo 15-20 čô čơđai ruă kơčung tơkai tơngan mơbah dưi brơi pơjrao ƀơi sang pô, akă hmâo čơđai hơpă ruă kraih.

Sang ia jrao pơkă hlâo klin ruă amra pơwot glăi anun hmâo pơhrăm tañ hơdôm mơnuih mă bruă ia jrao, hơdôm sang ia jrao gah tơring čar hăng biă ñu prăp lui ia jrao gun pioh bŏng glăi. Kơnong kơ tơlơi ruă djơ̆ hmơi, anom ăt glăk hmâo mơn 40 čô mơnuih amăng anom, hmâo jơlan gah hrŏ trun. Khă hnun hai, ơi ia jrao pơtă mơnuih ƀôn sang khom klâ̆o pơgang hlôm hlâo djơ̆ hmơi pioh kơ mơnuih prong hăng čơđai muai hăng čơđai muai hmâo 95% pioh dưi pơgang kơ djop mơnuih, pơgang ƀing mơnuih amra hmâo tơlơi ruă hơtai bôh, bôh ƀleh, ruă bơbrŭ asar.

Ơi ia jrao Quy ăt pơtă dong mơn, rơwang mơ̆ng blan 4 truh blan 6 lĕ pơphun mơ̆ng tơlơi ruă kơčung tơkai tơngan mơbah hăng tơdơi kơ anun lĕ duam pơđung drah. Yua anun ăt prăp lui mơn pran jua, kơtưn pran kơdŏng glăi, klâ̆o pơgang hăng djop djuai tơlơi ruă hơpă hmâo vaccine pơgang:

“Djơ̆ hmơi khom pơgang hlôm hlâo dong, biă ñu hơdôm anih anom kiăng tañ hloh. Ta pơtă klâ̆o pơgang hlôm hlâo lơm čơđai hmâo 6 blan, blung hlâo khom hơdor hăng ngă tơlơi anun pioh ƀing čơđai huăi hmâo tơlơi ruă, khom đing nao hơdôm mơnuih hmâo tơlơi ruă pơkon. Lơm dưi pơgang kơ abih bang mơnuih ƀu hmâo mơnuih djơ̆ hmơi, anun kah mơ̆ng pơđut klin ruă. Tal 2, ta lăi pơhing hyu hiưm hơpă pioh mơnuih ƀôn sang thâo mơ̆ng blan 4 truh blan 6 bơyan hmâo tơlơi ruă kơčung tơkai tơngan mơbah pioh gơgrong hlâo pơgang pơgăn. Mơnuih ƀôn sang khom đing nao hloh dong hăng ƀu dưi lui raih lĕ hơdôm klin ruă pơkon kah hăng duam pơđung drah, djơ̆ drăng. Hơdôm tơlơi ruă hơpă hmâo vaccine pơgang hlôm hlâo khom lăi lĕ kiăng mơnuih ƀôn sang klâ̆o pơgang, hăng lăi pơtă yua kơ dêh čar ta ayuh hyiăng pơ-iă hang klin ruă amra hmâo kuh thun".

Ƀơi sang ia jrao pơjrao tơlơi ruă čơđai muai 2 (Nhi Đồng 2), ơi ia jrao Nguyễn Đình Qui brơi thâo, hơdôm hrơi anai duam pơđung drah, kơčung tơkai tơngan mơbah glăk đĭ lu hăng mơnuih mă bruă ia jrao ăt bơngot mơn lơm hmâo 3 djuai ania amra hơđuh rai sa wot:

“Kơnong kơ tơlơi ruă djơ̆ hmơi ăt ƀuh ruă akô̆ mơn, ră anai hmâo tom duam pơđung drah rơgao hăng anai 2-3 rơwang hrơi tơjuh hmâo jơlan gah đĭ lu, pơphun mơ̆ng rơnuč blan anai ruă kơčung tơkai tơngan mơbah pơphun hmâo laih. Kâo bơngot 3 tơlơi ruă anai bơrơkua đĭ amăng sa wot thơ glêh biă kơ mơnuih mă bruă ia jrao. Ră anai khom pơtrut kơtang lăi pơhing pioh amĭ ama čơđai pơgang hlôm hlâo"./.