Glăk wai lăng ană dô̆ pơjrao ƀơi Sang ia jrao prong kual Dap Kơdư, ayong Y Vy Ktul, ƀơi ƀuôn Chăm, tơring glông Krông Ana brơi thâo, amăng sa blan ñu hmâo 2 čô ană khom ba nao pơ̆ sang ia jrao yua kơ djơ̆ hmơi. Tơlơi bơngot jai prong yua kơ 2 čô čơđai pơkon ƀơi sang leng kơ akă tlâ̆o vaccine pơhlôm hlâo djơ̆ hmơi.

“Kâo ƀu thâo ngă hiưm hơpă ôh, nao hơduah ĕp lăng lĕ arăng lăi ñu ruă pơ-iă drơi ƀlĕ pơđeh, rai truh pơ̆ anai kah mơ̆ng thâo djơ̆ hmơi. Ƀuh ƀing čơđai đih sang ia jrao tui anai mơ̆ng thâo truh vaccine pơgang djơ̆ hmơi, tui anai khom ba nao čơđai klâ̆o pơgang hlôm hlâo mơtăm. Ră anai rai pơ̆ sang ia jrao lĕ pơ̆ sang lu bruă kiăng ngă, laih anun ñu ruă đơi kâo huĭ mơn, bơngot biă”.

Ơi ia jrao Trần Thị Thúy Minh, Khua Anom pơjrao tơlơi ruă čơđai muai, Sang ia jrao prong kual Dap Kơdư, brơi thâo, ră anai tơlơi ruă djơ̆ hmơi glăk lar hyu tañ hăng lu čơđai ruă kraih. Amăng mrô rơbêh kơ 60 čô mơnuih ruă glăk pơjrao ƀơi kual čơlah, lu čơđai pơplih ngă bơbrah kơsô̆, bơbrah mơta hăng čroh kian kraih.

 “Tơlơi ruă djơ̆ hmơi lĕ sa amăng hơdôm tơlơi ruă huĭ rơhyưt hăng ngă lar hyu tañ, yap biă ñu lar tañ hloh wot COVID-19. Khă hnun hai, hmâo sa tơlơi tơphă lĕ lu ñu tơlơi ruă djơ̆ hmơi hmâo klâ̆o pơgăng vaccine lĕ kah hăng abih bang ƀu hmâo ngă ôh. Anai lĕ tơlơi ruă amra dưi pơgang hlôm hlâo hăng vaccine. Tơdah ƀu dưi pơgang hlôm hlâo vaccine lar tưp thơ ñu amra ngă kơtang biă hăng mrô mơnuih djơ̆ hmơi lu”.

Ơi Hoàng Hải Phúc, Khua Anom wai lăng tơlơi duam ruă tơring čar Dak Lak, tơlơi pơhing, ƀơi anăp tơlơi klin djơ̆ hmơi đĭ lu, gơnong bruă ia jrao hmâo pok pơhai laih lu bruă mă kiăng wai lăng klin ruă. Amăng anun kơtưn lăng tui anih klin ngă, klâ̆o huĕt, klâ̆o pơ ala nao vaccine kơ čơđai akă klâ̆o djop, pơsir anih anom dô̆ ƀơi hơdôm kual hmâo mơnuih ruă hăng pơtrut kơtang lăi pơhing pioh pơđĭ tơlơi pơmin mơ̆ng mơnuih ƀôn sang.

  “Ƀing gơmơi hmâo pơphô brơi kơ Gơnong bruă ia jrao pioh pok pơhai bruă pơgang pơgăn klin djơ̆ hmơi ƀơi anai, amăng anun hmâo klâ̆o pơgang djơ̆ hmơi, rubela hăng črâo ba hơdôm pơ̆ hơdôm bôh tơring glông bruă ia jrao, laih anun pơtrut tañ bruă klâ̆o pơgang hlôm hlâo. Biă ñu ƀing gơmơi kơtưn bruă lăi pơhing, lăi pơthâo truh hơdôm kual asuek, ataih, kual neh wa djuai ania ƀiă anăp nao pioh ba anăn amăng hră klâ̆o pơgang hlôm hlâo pioh klâ̆o pơgang hlôm hlâo”.

 Tui hăng Anom bruă pơgang tơlơi ruă (Ding jum ia jrao), mơ̆ng akô̆ thun truh ră anai, đơ đam dêh čar čih hmâo rơbêh kơ 52.000 čô mơnuih djơ̆ hmơi, lu biă ñu lĕ hơdôm bôh tơring čar gah kual Dơnung. Tơdơi kơ kông điêng mơ̆ng Khua dêh čar amăng blan 11/2024 kơ kơtưn pơgang pơgăn djơ̆ hmơi, lu anih anom rơkâo vaccine samơ̆ ƀu lu ôh. Hrŏm hăng anun dong lĕ, bruă pơphun klâ̆o pơgang hlôm hlâo kah hăng kơnong kơ hmâo gơnong bruă ia jrao đôč mă bruă, hơdôm gơnong bruă pơkon ƀu hmâo gum hrŏm lu ôh, ƀu dưi iâo pơhrui mơnuih ƀôn sang nao klâ̆o pơgang hlôm hlâo. Tui hăng Nai prin tha Hoàng Minh Đức, Khua Anom pơgang tơlơi ruă, ră anai dô̆ sa dua anih anom hmâo tơlơi kaih ngă kaih amăng bruă pơgang pơgăn klin ruă:

 “Bruă anai bơdjơ̆ nao biă ñu bruă pơphun klâ̆o pơgang hlôm hlâo vaccine, anun lĕ pơsit kơčăo bruă, pơpha ngăn drăp kơnuk kơna, blơi prăp gơnam mă yua… Ră anai mrô mơnuih ruă đĭ lu lĕ yua kơ rơnoh klâ̆o pơgang hlôm hlâo kaih hloh rơnoh lar tưp hyu mơ̆ng tơlơi ruă djơ̆ hmơi anai”.

Juăt ñu, tơdơi kơ klâ̆o pơgang hlôm hlâo 2 rơwang hrơi tơjuh čơđai amra dưi pơgang tơlơi ruă. Amăng tơlơi klih djơ̆ hmơi ăt ngă tơnap kah hăng ră anai, amĭ ama khom ba čơđai mơ̆ng 6 truh kơ 10 thun akă klâ̆o pơgang ƀudah klâ̆o pơgang akă djop vaccine pơgang djơ̆ hmơi khom ba nao klâ̆o pơgang. Tơdah amĭ ama ƀu hơdor rơđah klâ̆o djop hă akă ƀu djop lĕ tâ̆o hloh klâ̆o pơhrua nao yua kơ vaccine djơ̆ hmơi huăi ngă sat kơ tơlơi suaih pral čơđai muai ôh./.