Ƀơi anai, lu mơnuih apăn bruă gah gơnong bruă ia jrao lăi nao tơlơi gun kiăng tañ pơsir hĭ. Sa amăng hơdôm bruă kiăng hloh lĕ bruă kaih duh prăk khăm pơjrao tui hră pơhlôm nua ia jrao rơgao hăng mrô jŭ yap đăo lăng hlâo. Ơi Nguyễn Đăng Giáp, Khua sang ia jrao prong kual Dap kơdư brơi thâo, sang ia jrao hơmâo rơgao mrô jŭ yap rơbêh 54 klai prăk samơ̆ truh ră anai aka ƀu duh glăi, ngă tơnap tap. Ñu rơkâo kiăng pơplih bruă ngă ƀudah brơi mă hlâo.

Laih dong, lu tơlơi bơngŏt kơ bruă pơmut să, tơring glông amra bơdjơ̆ nao bruă mă amăng anih anom ia jrao ƀon lan, sit biă ñu sang ia jrao kual ataih, asuek. Kư tri rơkâo kiăng hơmâo jơlan gah hăng hơdră lăp djơ̆ tơlơi sit nik rĭm boh ƀon lan. Hơdôm tơlơi pơgôp hiăp ăt lăi nao tơlơi tơnap tap amăng juă nua blơi jrao, kơƀah mơnuih ngă bruă bơdjơ̆ nao tơlơi phiăn, prăk apah dŏ aset hăng bruă lăi pơthâo gơnam bơbuă drơi jăn soh glăi ƀuh lu. Ƀing khua pơ ala mơnuih ƀôn sang tơring čar ƀuăn tum pơƀut, rơkâo djop ding jum, gơnong bruă amăng jơnum Khua pơ ala mơnuih ƀôn sang dêh čar pơ anăp.