- Tơlơi phiăn čih pơkra glăi, pơhrua tui hơdôm tơlơi mơ̆ng Tơlơi phiăn hră pơhlôm nua ia jrao kiăng pơđĭ tui tơlơi dưi kơ mơnuih ƀôn sang hiư̆m pă thơ?

Yă Đàm Thị Thanh Quế: Tơlơi phiăn hră pơhlôm nua ia jrao čih pơkra glăi, pơhrua tui thun 2024 hơmâo Khua mua pơ ala mơnuih ƀôn sang pơsit lơ 27/11/2024 hăng dưi mă yua mơ̆ng lơ 1/7/2025 hơmâo lu tơlơi pơplih phrâo kiăng hơmâo tơlơi dưi hloh, hăng hơmâo pơgang ba lu hloh mơ̆ng Keh prăk pơhlôm nua ia jrao đơ đam dêh čar. Amăng anun, hơdôm tơlơi hơmâo mơnuih blơi hră pơhlôm nua lăp đing nao lĕ tơlơi dưi mơ̆ng mơnuih blơi ăt kah hăng rơnoh djru lơ̆m nao khăm pơjrao hăng hră pơhlôm nua ia jrao.

Tơlơi phiăn hră pơhlôm nua ia jrao phrâo pok prong hơdôm mơta bruă khăm pơjrao hơmâo keh prăk pơhlôm nua ia jrao tla brơi, djru kơ mơnuih ruă hơmâo tơlơi djru ba klă hloh mơ̆ aka ƀu hơmâo djơ̆ ôh mơ̆ng hlâo. Lăp đing nao biă ñu lĕ hăng mơnuih hơmâo tơlơi ruă ƀu thâo pơjrao, tơlơi ruă ƀuh hui mơnuih đôč dưi pơjrao sui, pơjrao klă hloh ƀơi hơdôm boh sang ia jrao prong mơ̆ ƀu kiăng ngă hră plih sang ia jrao tui hăng hlâo adih. Tơlơi anai djru plai ƀiă rơngiă mông, dưi pơjrao tañ hloh, klă hloh. Rơngiao kơ anun, Tơlơi phiăn phrâo ăt pơhrua tui mơn mơnuih hơmâo mă 100% prăk pơhlôm nua ia jrao lơ̆m nao khăm pơjrao pơ hơdôm anih čih anăn rơkâo khăm pơjrao blung a mơtăm. Tal dua lĕ tla brơi 100% mrô prăk đih pơ sang ia jrao hơmâo kĭ hră khăm pơjrao ƀơi sang ia jrao găp ƀrô đơ đam dêh čar. Hơmâo djru ba abih tih prăk khăm pơjrao lơ̆m nao khăm pơjrao ƀơi hơdôm boh sang ia jrao gưl găp ƀrô hăng gưl pơjrao dlăm hloh tơdah pơsit hlâo lơ 1/1/2025 sang ia jrao anai lĕ sang ia jrao tơring glông.

Hăng mơnuih djuai ƀiă, sang anŏ tơnap glăk hơdip pơ plơi pla tơnap tap ƀudah rin kơtang kơtit, kual plơi pla pơ bul pơtâo ia rơsĭ amra hơmâo tla brơi abih tih prăk khăm pơjrao pơ sang ia jrao gưl prong.

Hăng tơlơi ruă ƀu phiah hơmâo đơi, tơlơi ruă brŭ asar kiăng pơjrao, kiăng breh lĕ prăk pơhlôm nua ia jrao amra tla abih tih prăk hăng rơnoh dưi tŭ mă tui tơlơi pơkă lơ̆m pơjrao pơ sang ia jrao prong. Ngă gêh gal brơi mơnuih ruă dưi pơjrao pơ anih pơjrao rơgơi hloh laih anun huăi tơnap đơi kơ prăk kăk.

Hăng Tơlơi phiăn phrâo, sa tơlơi lăp đing nao dong lĕ tơlơi dưi pơjrao ruă mơta, mơta lăng bơbrui hăng mơta ƀlêng ăt hơmâo pơplih mơn. Hlâo adih, prăk pơhlôm nua ia jrao kơnong djru kơ ƀing čơđai yŭ 6 thun đôč, truh ră anai hơmâo pok prong hnưr thun dưi tŭ mă tơlơi gêh gal anai laih, djru ba lu mơnuih dưi pơjrao hloh.

- Tơlơi phiăn čih pơkra, pơhrua tui hơdôm tơlơi mơ̆ng Tơlơi phiăn pơhlôm nua ia jrao hơmâo lu tơlơi pơplih, amăng anun hơmâo hră pơ-ar khăm pơjrao hăng hră pơhlôm nua ngă amuñ ƀiă, mơnuih ƀôn sang ƀu kiăng pơdah hră pơhlôm nua hăng hla pơ-ar ôh. Rơkâo kơ ih brơi thâo rơđah hloh kơ tơlơi anai?

Yă Đàm Thị Thanh Quế: Kiăng ngă klă hloh kơčăo bruă pơmut abih bang anăn păn, anih dŏ, hăng pơsit điện tử bơwih brơi kơ bruă dêh čar mă yua boh thâo mrô. Kiăng pơplih klă hloh bruă ngă hră pơ-ar, ngă amuñ, plai ƀiă hơmâo lu đơi hră pơ-ar, plai ƀiă rơngiă mông hăng prăk nao khăm pơjrao. Ngă tui tơlơi pơtrun hrŏm mơ̆ng anom bruă pơhlôm nua mơnuih mơnam Việt Nam, Anom bruă pơhlôm nua mơnuih mơnam Dak Lăk amra pơdơi in hră pơhlôm nua ia jrao dong mơ̆ng lơ 1/6/2025. Mơnuih hơmâo hră pơhlôm nua ia jrao lơ̆m nao khăm ăt mă yua mơn hră pơhlôm nua ia jrao hơmâo plih hlâo kơ anun ƀudah mă hră căn cước công dân tĕp čip ƀudah mă rup hră pơhlôm nua ia jrao amăng glông djă pioh VssID (Hră pơhlôm nua mơnuih mơnam mrô) ƀudah mă yua glông djă pioh VneID pơdah pơƀuh lơ̆m nao khăm pơjrao. Kơnong kơ in hră pơhlôm nua ia jrao hăng ƀing ƀu dưi dưm pơmut VssID ƀudah VneID ƀudah ƀu hơmâo căn cước công dân tĕp čip.

Hăng ƀing tơnap či pơmut VssID lĕ kiăng nao pơ anom bruă pơhlôm nua mơnuih mơnam giăm plơi đah mơ̆ng hơmâo djru brơi.

- Pơ anăp anai, kiăng ngă amuñ brơi ăt kah hăng pơhlôm tơlơi dưi kơ mơnuih blơi hră pơhlôm nua ia jrao, anom bruă pơhlôm nua mơnuih mơnam hơmâo hơdră ngă bruă hiư̆m pă, ơ yă?

Yă Đàm Thị Thanh Quế: Hrơi blan rơgao, bruă pơđĭ klă tui Hră pơhlôm nua ia jrao ƀơi Dak Lăk lêng hơmâo tơlơi lăng ba, git gai črâo bruă mơ̆ng Anom bruă pơhlôm nua mơnuih mơnam Việt Nam, mơ̆ng Ping gah tơring čar, Jơnum min pơ ala mơnuih ƀôn sang, Jơnum min mơnuih ƀôn sang tơring čar Dak Lăk laih anun hơmâo ngă hrŏm lăp djơ̆ mơ̆ng djŏp gơnong bruă hăng anom bruă čih hră pơhing. Pơ anăp anai, kiăng ngă amuñ brơi kơ mơnuih blơi hră pơhlôm nua, anom bruă pơhlôm nua mơnuih mơnam tơring čar Dak Lăk ăt ba tơbiă hơdôm hơdră tui anai: anun lĕ khŏm hơmâo tơlơi gum ngă mơ̆ng djŏp gưl ping gah, gong gai, anai jing tơlơi yôm phun pơsit anŏ tŭ yua pơphun ngă tui hơdră djru mơ̆ng hră pơhlôm nua mơnuih mơnam, pơhlôm nua ia jrao ƀơi tơring čar.

Tui anun, anom bruă pơhlôm nua mơnuih mơnam Dak Lăk amra brơi lu grup nao mă bruă pơ hơdôm plơi pla či pơtŏng glăi bruă pơhrui, pơhrŏ trun prăk hnưh hăng bruă pơđĭ lu tui mơnuih blơi hră pơhlôm nua, ăt kah hăng pơtŏng glăi tơlơi tơnap, tơlơi pơgăn amăng bruă ngă tui, mơ̆ng anun hơmâo hơdră pơsir lăp djơ̆, khut khăt hloh đah mơ̆ng ngă truh kih bruă jao thun 2025. Kiăo tlôn lĕ pơtrut pôr pơhing hơdôm hơdră djru mơ̆ng hră pơhlôm nua ia jrao, pơhlôm nua mơnuih mơnam. Gơñăm bruă pôr pơhing kah hăng jơnum pơbưp, pôr pơthâo, pôr amăng glông čih pioh hră pơhlôm nua tơring čar, amăng plang internet kah hăng fanpage facebook, zalo ƀudah tui mrô telephôn djru bruă mơ̆ng Anom bruă pơhlôm nua mơnuih mơnam tơring čar.

- Bơni kơ ih hơmâo pioh mông lăi pơthâo hăng ƀing gơmơi!