Tui djơ̆ tơlơi lăi pơhing mơng hlâo, amai Nguyễn Thị Diễm Thương, plơi Dăk Kual 2, să Dak N’drung ba ană đah kơmơi giăm truh 6 blan pơ̆ Sang ia jrao să pioh tlâ̆o ară tal 3 vaccine 5 amăng 1 pơgang hơdôm tơlơi ruă bơbrah rơkông đok, pơtuk or, ruă kơañak, jô drơi jăn hăng bơbrah kơsô̆, bơbrah klĭ lôm glô yua kơman Hib ba truh. Ñu brơi thâo, bruă tlâ̆o pơgang hlôm hlâo djop anun ană ñu brô̆ prong suaih pral.

 “Mơnuih mă bruă ia jrao lăi pơthâo hrơi tlâ̆o pơgang hlôm hlâo kơ pô, laih anun jê̆ nao tlâ̆o lĕ nai ia jrao iâu pô hlâo sa hrơi kiăng kơ nao tlâ̆o. Lăi hrom čơđai rơnuk anai ñu pha ra hăng đưm, rim tơlơi duam ruă ta ƀu thâo hlâo anun ta khom tlâ̆o pơgang hlôm hlâo kiăng bĕ brơi kơ čơđai”.

Ăt kah hăng amai Nguyễn Thị Diễm Thương, gơnang kơ dưi lăi pơthâo kơ bôh tơhnal mơng bruă tlâ̆o pơgang hlôm hlâo, anun khă ataih mơng sang ia jrao, rơdêh nao rai tơnap tap, samơ̆ amai Thị Bân ƀơi plơi Bu N’drung, să Dak N’drung, tơring glông Dak Song ăt tlâ̆o pơgang brơi djop mơn, djơ̆ hrơi pơkă kơ 3 čô ană:

 “Ba ană nao tlâ̆o djop tơdơi anai ta ăt plai mơn bơngot, lăi hrom hơđong pran jua biă. 3 čô ană kâo yap wot ƀu hmâo rơdêh kâo ăt rơbat tơkai mơn kiăng nao tlâ̆o pơgang. Pikian ăt nao tlâ̆o mơn lăi hrom djop abih mơtăm yơh”.

Dak Song lĕ sa amăng hơdôm anih anom ba jơlan hlâo amăng bruă tlâ̆o pơgang pơhư prong ƀơi Daknông. Tui hăng ơi Nguyễn Văn Sơn, Sang ia jrao tơring glông Dak Song, kiăng mơnuih ƀôn sang đăo gơnang, Sang ia jrao hmâo kơtưn git gai hơdôm bôh anom pơtrut kơtang hyu lăi pơhing pơđĭ tui tơlơi pơmin, hrom hăng anun, pel ĕp, hơkrŭ đĭ hơdôm tơlơi kiăng kơ anih anom mă yua, măi mok, vaccine, pơhlôm klă tlâ̆o pơgang hlôm hlâo... Amăng hơdôm hrơi tlâ̆o pơgang, Sang ia jrao pơpha mơnuih mă bruă lăi tui hơdôm bôh sang ia jrao să ngă tui djơ̆ tơlơi pơkă tlâ̆o pơgang hlôm hlâo.

 “Dong mơng rơnuč thun ƀing gơmơi hmâo gum hrom laih hăng plơi pla pơphun pel ĕp rim čơđai, dua lĕ mă mơng măi ƀing gơmơi hmâo wai lăng klă laih hơdôm mơnuih kiăng tlâ̆o pơgang. Amăng măi hmâo tơlơi pơhing lăi nao rơđah ƀing gơmơi lăi pơthâo, sa dua čô mơnuih dưi nao mă pô lĕ gêh gal, bơ̆ hlơi ƀu hmâo tơlơi gal ƀudah hmâo bôh than pơkon hơpă mơ̆ akă dưi nao tlâ̆o pơgang lĕ amra jao kơ anom ia jrao plơi pioh gơñu pel ĕp glăi mơnuih hmâo amăng plơi mơn kiăng thâo mơnuih akă tlâ̆o pơgang ƀudah akă djop pioh pơphun tlâ̆o huĕt abih hơdôm mơnuih anun kiăng pơhlôm brơi pran gơgrong kơ čơđai muai”.

Ơi Huỳnh Thanh Huynh, Kơ-iăng Khua Gơnong bruă ia jrao tơring čar Daknông brơi thâo, khă tơ̆i đưn tlâ̆o pơgang hlôm hlâo yua bơbeč mơng klin Covid-19 amăng 2 thun rơgao, samơ̆ tơlơi ngă tui khut khăt, gơgrong mơng gơnong bruă ia jrao, tơlơi gum hrom mơng mơnuih ƀôn sang anun mrô mơnuih tlâ̆o vaccine amăng jơlan hơdră pok prong mơng tơring čar ba glăi bôh tơhnal klă. Abih 3 blan tal 3 thun 2022, mrô mơnuih tlâ̆o pơhư prong mơng đơ đam tơring čar hmâo 70% kơčăo bruă. Amăng 3 blan rơnuč thun 2022, tơring čar tlâ̆o pơgang pơhư prong hmâo 90% mrô mơnuih tlâ̆o vaccine. Tui hăng ơi Huỳnh Thanh Huynh, ră anai Daknông glăk djă pioh 150 bôh anih tlâ̆o pơgang hlôm hlâo hơđong hăng amra pơplih dong hơdôm anih tlâ̆o pơgang ba hyu tơdah kiăng. Gơnong bruă ia jrao ăt prăp lui djop mơnuih mă bruă, gơnam mă yua hăng ia jrao gun pioh pơhlôm bruă tlâ̆o pơgang hlôm hlâo ba glăi bôh tơhnal, pơhlôm klă:

 “Gơnong bruă ia jrao črâo ba hăng nao pơ̆ hơdôm anih anom kiăng pel ĕp glăi mơnuih kiăng tŭ ư hrom. Dua lĕ lom pel ĕp ƀing gơmơi hrom hăng sang ia jrao, gong gai plơi pla kiăng pơpha anih tlâ̆o pơgang hlôm hlâo djơ̆ kiăng mơnuih ƀôn sang gêh gal hloh, yap ba hơdôm hrơi gêh gal brơi kơ gơñu, bơhmutu ñu sa dua čô mơnuih nao pơ̆ hmua rơnuč rơwang hrơi tơjuh glăi lĕ ƀing gơmơi pơhruă hrom hăng hơdôm mơnuih hmâo arăng hmư̆ tui amăng plơi pla hăng pơsur adơi amai dưi tlâ̆o pơgang ƀơi sang”.

Hơdôm tơlơi gir run amăng bruă tlâ̆o pơgang hlôm hlâo pơhư prong ƀơi Daknông hmâo amăng ƀrư̆ pơđĭ tui bruă bơwih brơi tơlơi suaih pral, pơgang bĕ hơdôm klin ruă huĭ rơhyư̆t amăng hơdôm anih mơnuih ƀôn sang dô̆; djru ngă plai ƀiă bruă pel ĕp pơjrao tơlơi ruă kơ hơdôm bôh anom ia jrao./.