Bruă mă sit nik anun hmâo djru laih ƀing ƀun rin duam ruăi kraih hơđong pơjrao tơlơi ruă.

Čơkă mă gơnam lĕ prăk mơta rơbêh kơ 20 klăk prăk mơng tơlơi tô nao rai mơng Grŭp mă bruă mơnuih mơnam mơng Sang ia jrao prong kual Dăp Kơdư hăng ƀing thâo khăp păp kiăng djru Phan Đình Cương ruă kraih yua kơ ngui mlăi, amai Hồ Thị Hồng Phương amĭ nô Cương, dô̆ ƀơi thôn 1, să Ea Păl, tơring glông Ea Kar ƀu tơtlaih tơlơi mơ-ak hăng ol kơdol pran jua. Amai Phương brơi thâo, sang anô̆ ñu hmâo 3 čô ană, amăng anun Cương lĕ ană kơčua. Blan 2 phrâo rơgao, yua kơ pơmin či lông lăng, anun ană ñu hrom hăng ayong gŏp djuai ngui mlăi hơduah blơi amăng plăng niternet hăng ngă pơtuh mlăi. Ñu ruă kơtang ƀơi ƀô̆ hăng khom breh pơjrao trơ̆i lui 2 ƀĕ tơngan. Khă hmâo hyu rơkâo čan ƀơi djop anih, samơ̆ rơkơi bơnai ñu ăt ƀu djop pioh prăk pơjrao brơi mơn. Gơnang kơ Grŭp mă bruă mơnuih mơnam mơng sang ia jrao tô nao rai hăng hơdôm ƀing thâo khăp păp gum djru brơi kơ ñu plai ƀiă tơnap tap. Ƀu djơ̆ kơnong kơ hnun ôh, Grŭp mă bruă mơnuih mơnam dô̆ dưi ĕp hmâo mơnuih gum djru brơi abih bang breh gep tơngan kơ nô Cương dong.

 “Dong mơng hrơi nô ba nao pơjrao ƀing ơi ia jrao ăt kah hăng ƀing bơwih brơi kơ mơnuih ruă ƀơi Sang ia jrao brơi kơ nô anet hur har pran jua biă hăng păp kơ ñu biă, hăng gơnang kơ ƀing ơi ia jrao ƀơi sang ia jrao kual hmâo iâu pơthưr ƀing thâo khăp păp djru brơi kơ nô anet hăng sang anô̆ hơdor tơngiă biă. Pơ ala kơ sang anô̆ bơni kơ ƀing thâo khăp păp hơdôm hrơi rơgao hmâo djru laih nô̆ anet lu biă”.

Adơi Y Hoan Êban (20 thun) ƀơi ƀôn Ju, să Ea Tu, plơi prong Buôn Ma Thuột hmâo tơlơi truh ƀơi jơlan glăi mơng mă bruă. Ba nao sang ia jrao lom drơi jăn rơka ruă tơlang rŏng, jôh tơlang rŏng, klôh glô tơlang hăng jô dua ƀĕ tơkai. Khă Y Hoan hmâo yak rơgao laih tơlơi djai, samơ̆ yua kơ ruă kơtang đơi anun ñu khom breh pơjrao lu wot. Y Hoan drit druai amĭ ama mơng 13 thun, hơdip hăng anong, prăk mă yua pơjrao rơgao kơ rơnoh dưi hmâo mơng sang anô̆. Gơnang kơ tơlơi iâu pơthưr hmao tlôn mơng Grŭp mă bruă mơnuih mơnam, Y Hoan dưi hmâo ƀing thâo khăp păp djru brơi giăm truh 50 klăk prăk, djop pioh prăk pơjrao brơi. Ơi Y Băn Êban, anong Y Hoan lăi pơthâo:

 “Tơlơi hơdip mơda mơng ñu tơnap tap biă, ƀu hmâo ama, ƀu hmâo amĭ. Ñu prong đĭ hyu mă bruă arăng apah, ră anai hmâo tơlơi truh, rai pơ̆ anai ơi ia jrao pơjrao ječ, laih anun pơjrao brơi tơlơi ruă kơ ñu laih anun iâu pơthưr mơnuih thâo khăp păp gum djru brơi hmâo prăk pioh pơjrao kơ ñu, kâo ƀu thâo lăi hơget dong tah, kâo rơkâo bơni lu biă”.

Ayong Hồ Sĩ Phú – Khua Anom bruă bơwih brơi kơ mơnuih ruă, gơgrong gah Grŭp mă bruă mơnuih mơnam mơng Sang ia jrao prong kual Dăp Kơdư brơi thâo, mơng thun 2022 truh ră anai, grŭp mă bruă mơnuih mơnam mơng Sang ia jrao hmâo iâu pơthưr rơbêh kơ 1 klai 500 klăk prăk hăng giăm truh 1.000 anung gơnam ƀơk brơi ƀing mơnuih ruă tơnap tap. Hrom hăng bruă gum djru, Grŭp mă bruă mơnuih mơnam dô̆ ngă tui bruă bơwih brơi kơ mơnuih ruă, pơtô brơi hơdôm hơdră ngă, bruă brơi pel ĕp, pơjrao tơlơi ruă glăk pok pơhai ƀơi Sang ia jrao; Pơtô brơi mơnuih ruă hơdôm hơdră ngă hră pơ-ar či kiăng djơ̆ hăng mơnuih lom nao pel ĕp hăng pơjrao tơlơi ruă; Djru pơblang brơi hơdôm tơlơi ƀu rơđah mơng sang anô̆ pô ruă, pơtô brơi bruă pơjrao mơng ơi ia jrao, bơwih brơi mơnuih ruă ƀơi sang: Tơlơi dưi hăng bruă gơgrong mơng mơnuih ruă hăng mơnuih mơng sang anô̆. Ayong Hồ Sĩ Phú brơi thâo:

 “Grŭp mă bruă mơnuih mơnam gơgrong tŭ mă hơdôm tơlơi pơhing mơng ƀing mơnuih ruă tơnap tap kơ prăk mă yua pơjrao ƀudah prăk yua mơng hơdôm anom pơjrao hăng anom bruă ƀing gơmơi amra nao lăi pơdah tơlơi pơhing anun djơ̆ mơn kiăng iâu pơthưr arăng mơn. Tơdơi kơ anun anom bruă ƀing gơmơi gơgrong hlâo tô nao rai, lăi pơthâo hơdôm mơnuih thâo khăp păp kiăng ƀing gơñu ƀơi anăp jao kơ mơnuih ruă kiăng djru ƀơƀiă prăk pioh pơjrao ăt kah hăng pioh mă yua kơ mơnuih ruă ƀong huă mơn. Anom ăt pơsit ngă mơn, ngă hiưn hơpă hơđong pran jua kơ bruă pơjrao, ƀu bơngot pơmin kơ prăk yua pioh pơjrao hăng prăk mă yua lom dô̆ pơjrao”.

Tui hăng ơi ia jrao CKII Nguyễn Đại Phong – Khua Sang ia jrao prong kual Dăp Kơdư, Grŭp mă bruă mơnuih mơnam mơng Sang ia jrao dưi pơjing mơng thun 2016. Truh thun 2021 dưi pơmut amăng Anom bruă bơwih brơi kơ mơnuih ruă. Pơsit kơ bôh tơhnal mă bruă mơng Grŭp mă bruă mơnuih mơnam mơng Sang ia jrao, ơi ia jrao Nguyễn Đại Phong brơi thâo:

 “Grŭp mă bruă mơnuih mơnam jing pô yôm phăn amăng abih bang bruă tô nao rai ƀing gum djru kiăng djru brơi mơnuih tơnap tap. Blung hlâo lĕ pơsur mơnuih mă bruă, pơsur ƀing thâo khăp păp, đa lĕ iâu pơthưr ƀing pôr pơhing kiăng dưm đĭ rŭp hăng hơdôm tơlơi lăi pơthâo lĕ ăt dưi hmâo tơlơi gum djru lu mơn mơng ƀing thâo khăp păp hăng ƀing gum djru ngă brơi mơnuih ruă plai ƀiă tơnap tap hăng hmâo prăk mă yua dô̆ glăi pơjrao tơlơi ruă. Rơngiao kơ grŭp mă bruă mơnuih mơnam ăt dưi ngă laih mơn lu bruă anun lĕ pơtô brơi, djru mơnuih ruă amăng abih bang bruă mơ̆ mơnuih ruă ƀu thâo bơwih mă pô, ngă brơi mơnuih ruă ăt kah hăng pô sang mơnuih ruă gơñu lăng djơ̆ pran jua biă”.

Bruă pok pơhai truh kih bruă mă mơnuih mơnam amăng Sang ia jrao kiăng djru mơnuih ruă pơsir hơdôm tơlơi kiăng sit lom nao pel ĕp, pơjrao tơlơi ruă ƀơi Sang ia jrao lĕ sa yak phrâo amăng bruă bơwih brơi hăng djru brơi mơnuih ruă, djru plai ƀiă hơdôm tơlơi ruă nuă, kơƀah tơnap yua kơ duam ruă mơng lu mơnuih tơnap; đĭ lu tui tơlơi mơ-ak, tâ̆o yâu, pơ ala glăi hơdôm anô̆ yôm klă hiam amăng tơlơi hơdip./.