Bơtơ̆t kơryan dà lềng Ƀòn Rớ gơwèt sơnah ƀòn Phú Yên, càr Dăk Lăk, ală ngai rềp ndo gơ hòi gơ jà uă ngan làng bol mờ năc lòt nhơl. Nhơm trồ tiah lơngơm mrềt, niam ngan, kềng gah là anih ơhò ka Đông Tác, tềng đăp mat là mpồng dà lềng Đà Diễn mờ plung lik plung rê. Sền tiah đah Tô là bơnơm Chóp Chài mờ tiah drà Tuy Hoà. Sền sơlơ̆u wơl tus tiah đah mat tơngai mut là rbàng Hùng Vương tơbă gan dà dờng Đà Rằng. Jơh ală bơta gơ gơs rùp hin dờng ơnàng bơh trồ tiah dê.

Pơgăp 3 nam do, mut tàm kàl rơlô bơkang, tiah do gơ hòi gơ jà uă ngan bơyô kơnòm să tus pah tŭ trồ mho. Bơh dùl ƀòn gơtìp dà tih lơh aniai, tŭ do Ƀòn Rớ gơ gơs tiah tus bơh năc lòt nhơl dê lơh làng bol kis tàm dà lềng chờ hờp ngan. Dùl nă làng bol brơn brài pà gĭt:

"Tŭ do lơh niam wơl, sơng wơl bè do năc lòt nhơl gal ngan. Den tàng  làng bol tàm tiah do tơrgùm tus kă bro kung uă sơl, den tàng kung ờ hoan bòl glar đau sơl”.

 Bơta gơ kờñ bơh bơtơ̆t kơryan Ƀòn Rớ dê geh kờp bơh nggùl nhai 6 pa do, tŭ ală jrong bê tông kơryan rơya dà lềng geh “soh ào pa” mờ ală dà tơlir, pơr hê, rơmĭt, dum phồng... niam ngan tàm trồ tơngai mờ dà lềng tơlir niam. Uă ngan làng bol tiah do mờ năc lòt nhơl tus sền, cùp rùp, is ồn tàm drim gờñ mờ mho jơla, tŭ mat tơngai lơh geh ală bơta sòl àng mờ mat sền krơi is ngan. Dùl nă năc lòt nhơl chờ hờp đơs:

 "Lài do oh neh tus rao, tŭ pa sơng wơl là oh tus tai. Ngan là view tơlak dolar ngan hơ̆, niam ngan”.

Bơh dà sơng bơh dùl nă cau dong kờl, sơnah ƀòn Phú Yên neh hòi jà ală cau dong kờl is bal mờ bàr pe nă cau gĭt sơng lơh dơ̆ sơng wơl ai ală jrong brê tông kơryan rơya dà lềng Ƀòn Rớ. Ală cau dong kờl is pà gĭt, oh mi lơh bal tàm tŭ trồ tơngai duh, broă sơng mờ tê mờ ală broă lơh bơh lơh sàng goh mat jrong bê tông, sơng tai, sơng glòm jơh... mơya khi gơ lơh chờ hờp ngan tŭ geh uă cau dờp rò:

 "Pa niam, niam rlau ai sơnah ƀòn he in, oh mi sền gŏ kung ờ hoan bòl sơl đau. Lơh gĭt nđờ ngai gŏ cồng nha he dê lơh geh mờ geh tơl nă cau lơh jat bal añ chờ hờp ngan”.

Broă “soh ào pa” ai ală jrong be tông kơryan rơya dà lềng Ƀòn Rớ ờ mìng dong lơh niam ù tiah jat kềng gah dà lềng lơm mờ gam lơh geh tai phan bơna sền gĭt ai năc lòt nhơl tàm kàl lòt nhơl rơbô bơkang nam 2026 in. Do ờ mìng ngui niam bơta kwơ ù tiah geh is sơlơ tơnguh tai bơtàu tơnguh lòt nhơl ƀòn lơgar dê lơm mờ gam pà gŏ bơta gơ hòi gơ jà năc lòt nhơl ờ duh pal tus bơh ală bơnah priă bơcri uă ngan lơm mờ gơtùi lơh geh bơh broă lơh niam bơh gơnoar atbồ mờ mpồl bơtiàn gơwèt mờ ù tiah hàng niam ƀòn lơgar he dê.