Sap sơng gơr pa jañ, oh Siu Nhi, kơnòm bơsram ơdŭ 8A, Hìu bơsram ơm sa bic tơn kâp 1 mờ kâp 2 Ia Puch bal mờ ală bơyô rơndap wơl sră pơ àr, chờ hờp tơm boh bơr tơnơ̆ ƀùi bơsram àng drim. Ală bơyô geh hìu ơm rềp hìu bơsram den rê wơl tàm hìu nàng sa ngai, ai Siu Nhi mờ ală bơyô ơm ngài den ai ală hộp piang mờ mè bèp neh rơcang bơh àng drim, bal mờ gơp nggui sa hơ̆ sồng ơm rlô tơn tàm hìu bơsram nàng pơn jat tai bơsram ƀùi mho. Do là broă lơh ing dong gàr sùm broă bơsram 2 ƀùi pah ngai, tàm tŭ kơp hìu sa, hìu ƀềp mờ tiah ơm sa bic tơn geh lơh gơs. Gơ wèt mờ Siu Nhi, hìu bơsram pa cèng wơl uă bơta sền git mờ sơlơ geh tai bơta gơn kơnờm nàng oh pơnđơl rlau tai:

“Bè ờs den oh mìng gŏ hìu bơsram bè do tàm tivi halà tàm ală hìu bơsram ndai lơm gời. Tŭ do, oh geh bơsram tàm hìu bơsram dờng, ơnàng mờ niam bè do, oh chờ hờp ngan. Oh rơp lơh ngan gơ lòng sồr mờ bơsram jak”.

Ală sèng tờm chi pa tam tàm ƀlàng Hìu bơsram Ia Puch neh sơn đờm tơt cồng tơlir sơn rờp. Tiah nhàr lơgar ală nam lài ngềt ngơt ngan, tŭ do neh mpong ntas sap sền sră. Bơdìh mờ ală sèng cơldŭ bơsram, tơl mpồl cau lơh phan crăp mpồng, sờng wơl ală kơlik dut ndơl, lơh sir tiah lơh phan sa, tiah pìh phan, ìs phan tàm gah hìu ơm sa bic tơn. Ồng Phan Thành Tiến - Lam bồ hìu bơsram ơm sa bic tơn kâp 1 mờ kâp 2 Ia Puch pà git, bơnah broă gam wơl ờ uă mơya gơ jat bal tơn mờ tơl dơ̆ sàu sa, bic ơm mờ rài kis pah ngai kơnòm bơsram dê den tàng pal geh sền swì nền nòn lài mờ tŭ ai ngui.

Hìu bơsram ơnàng rlau 5 lồ, mờ 23 ơdŭ bơsram mờ ală broă lơh, drơng jơnau kờñ bơsram, ơm sa bic tơn mờ ơm sa ngai bơh rlau 700 nă kơnòm bơsram dê. Bơdìh mờ cau lơh broă jat khà geh ai, càr Gia Lai ai gơnoar ală hìu bơsram kĭ tai sră pơrgon mờ cau sền gàr hìu bơsram, cau drơng broă mờ cau atbồ kơnòm bơsram bơdìh tŭ jơ bơsram; mờ kung rơndap ai priă jền nàng crăp camera tàm ală tiah pal geh tàm ƀlàng hìu bơsram. Ồng Phan Thành Tiến pà git, hìu bơsram neh sền wơl, rơndap ai mpồl pơgru, cau lơh broă ròng siam, cau sền gàr mờ mpồl atbồ kơnòm bơsram bơdìh tŭ jơ bơsram. Jơnau kờñ là tŭ hìu sa mờ tiah ơm bic geh tơl bơta nàng ngui, ală broă rơndap lơh gròi sền, ròng siam mờ atbồ kơnòm bơsram kung crăp rơcang:

“Mut tàm nam bơsram pa, nùs nhơm kơnòm bơsram mờ mè bèp kơnòm bơsram dê chờ hờp ngan, chờ hờp tài geh hìu bơsram, ơdŭ bơsram dờng niam. Hìu bơsram bơt bơtàu broă rơndap lơh dipal mờ broă lơh tơrlòng lài hìu bơsram ơm sa bic tơn mờ bơta geh ngan kơnòm bơsram tàm ƀòn lơgar. Is ồn là bè pơlam tàp jơnau git wă bơsram sră”.

Tiah nhàr lơgar, hìu bơsram ơm sa bic tơn kung dờp geh bơta sền gròi bơh mpồl ling sền gàr tiah nhàr lơgar ƀòn lơgar dê. Đại tá Đoàn Ngọc Báu, Phó Chính ủy Gah đơng lam Ling klàng càr Gia Lai pà git: hìu bơsram ơm sa bic tơn ờ mìng dờng niam bè phan bơna mờ gam là rùp lơh lài bè rơndap tap sèng broă sàu sa, ơm kis, pơlam tàp nàng ală oh in dờng pràn tơl làm. Bè hơ̆ den tàng, mpồl ling rơp dong kờl hìu bơsram bơt bơtàu tơngai sàu sa, bic tơm, jơnau pal jat, dipal mờ tơl sơnam:

“Do là kơnòl broă kuơmàng ngan. Bol hi sồr ală pôs ling sền gàr tiah nhàr lơgar dờp lơh oh mi mờ ală hìu bơsram ơm sa bic tơn bàr kâp tàm tiah nhàr lơgar; lam lơh mblàng yal tus ală kơnòm bơsram, cau pơgru bè jơnau pal jat. Ală jơnum lơh broă pơgồp bal mờ ală mpồl lơh broă tàm ƀòn lơgar bal mờ pơgru gàr sùm jơnau pal jat tàm ngai, jơnau pal duh rơngòt tàm hìu bơsram, gàr ală sau geh bơta rơndap tap sèng niam bơh ală ngai bơh chờm tơn”.

Bơh ală poh bơsram sơn rờp, dùl gùng pa gam pờ tơlik tus mờ pơgru mờ kơnòm bơsram Hìu bơsram Ia Puch. Tàm tiah nhàr lơgar, sap kơnòm bơsram mpong ntas pah ngai, rơsìh tai bơta pin dờn mờ bơt bơtàu ală bơta kơp kờñ bè dùl tơnơ̆ do dờng ơnàng bơh hìu bơsram do.